ലോകകപ്പ് ടീമിൽ ഇടം നേടാത്തതിൽ വിഷമമില്ല, അച്ഛന്റെ അവസാന നാളുകളിൽ കൂട്ടിരിക്കാനായി; വികാരഭരിതനായി ജിതേഷ്

2026 ടി20 ലോകകപ്പിനുള്ള ഇന്ത്യൻ ടീമിൽ നിന്ന് തന്നെ ഒഴിവാക്കിയത് ഒരു അനുഗ്രഹമായി കാണുകയാണ് വിക്കറ്റ് കീപ്പർ ബാറ്റർ ജിതേഷ് ശർമ്മ. ലോകകപ്പ് ടീമിൽ ഉൾപ്പെടാത്തതിൽ തുടക്കത്തിൽ വിഷമം തോന്നിയെങ്കിലും, അസുഖബാധിതനായിരുന്ന അച്ഛന്റെ അവസാന നാളുകളിൽ അദ്ദേഹത്തിനൊപ്പം ചെലവഴിക്കാൻ സാധിച്ചതാണ് ഏറ്റവും വലിയ ഭാഗ്യമെന്ന് ജിതേഷ് പറയുന്നു. ലോകകപ്പ് തുടങ്ങുന്നതിന് ഏതാനും ദിവസങ്ങൾക്ക് മുൻപ്, ഫെബ്രുവരി 1-നായിരുന്നു ജിതേഷിന്റെ പിതാവിന്റെ വിയോഗം.

പരാതികളില്ലാത്ത മനസ്സുമായി ജിതേഷ്

കഴിഞ്ഞ വർഷം മുഴുവൻ ഇന്ത്യൻ ടി20 ടീമിന്റെ ഭാഗമായിരുന്ന ജിതേഷിനെ ലോകകപ്പ് ടീമിൽ നിന്ന് ഒഴിവാക്കിയത് ആരാധകരെ അമ്പരപ്പിച്ചിരുന്നു. എന്നാൽ ആ സമയത്താണ് തന്റെ അച്ഛൻ ഗുരുതരാവസ്ഥയിലായതെന്ന് ജിതേഷ് വെളിപ്പെടുത്തി. "ടീമിൽ നിന്ന് പുറത്തായ വാർത്ത കേട്ടപ്പോൾ ഒരു മനുഷ്യനെന്ന നിലയിൽ എനിക്ക് സങ്കടം തോന്നി. എന്നാൽ ഫെബ്രുവരി 1-ന് അച്ഛൻ മരിക്കുന്നതിന് മുൻപ് ആ ഏഴ് ദിവസം എനിക്ക് അദ്ദേഹത്തിനൊപ്പം നിൽക്കാൻ കഴിഞ്ഞു. പിന്നീട് എനിക്ക് മനസ്സിലായി, ലോകകപ്പിനേക്കാൾ ഉപരിയായി അച്ഛന് എന്നെയാണ് ആ സമയത്ത് ആവശ്യമുണ്ടായിരുന്നതെന്ന്," ജിതേഷ് പിടിഐക്ക് നൽകിയ അഭിമുഖത്തിൽ പറഞ്ഞു.

ദൈവത്തോട് നന്ദിയുണ്ടെന്നും അച്ഛന്റെ അവസാന കാലത്ത് അദ്ദേഹത്തെ പരിചരിക്കാൻ കഴിഞ്ഞതിൽ തനിക്ക് യാതൊരു ഖേദവുമില്ലെന്നും ജിതേഷ് കൂട്ടിച്ചേർത്തു.

ഇന്ത്യയുടെ കിരീടനേട്ടത്തിൽ ആഹ്ലാദം

ലോകകപ്പ് വിജയിച്ച ഇന്ത്യൻ ടീമിനെ ജിതേഷ് അഭിനന്ദിച്ചു. "വീട്ടിലിരുന്ന് ലോകകപ്പ് കാണുന്നത് കളിക്കുന്നതിനേക്കാൾ കൂടുതൽ സമ്മർദ്ദമുണ്ടാക്കുന്ന ഒന്നാണ്. കോച്ചിന്റെയും ക്യാപ്റ്റന്റെയും ടീമിന്റെയും വിഷൻ പൂർത്തിയാക്കാൻ ടീമിന് സാധിച്ചതിൽ വലിയ സന്തോഷമുണ്ട്. അവർ ഈ നേട്ടത്തിനായി അത്രയധികം കഠിനാധ്വാനം ചെയ്തിട്ടുണ്ട്," അദ്ദേഹം പറഞ്ഞു.

മാർച്ച് 28-ന് ആരംഭിക്കുന്ന ഐപിഎൽ 2026-ൽ റോയൽ ചലഞ്ചേഴ്സ് ബെംഗളൂരുവിന് (RCB) വേണ്ടി ജിതേഷ് വീണ്ടും കളത്തിലിറങ്ങും. കഴിഞ്ഞ സീസണിൽ ആർസിബിയുടെ ആദ്യ ഐപിഎൽ കിരീടനേട്ടത്തിൽ നിർണ്ണായക പങ്ക് വഹിച്ച താരമാണ് ജിതേഷ്. 2016ലാണ് ജിതേഷ് ആദ്യമായി ഐപിഎല്ലിലേക്ക് വരുന്നത്. മുംബൈ ഇന്ത്യൻസായിരുന്നു ജിതേഷിനെ വാങ്ങിയത്. തുടർന്ന് 2017ലും അവർ ജിതേഷിനെ റീട്ടെയിൻ ചെയ്തു. എങ്കിലും, ആ രണ്ട് വർഷത്തിനിടയ്ക്ക് ഒരു മത്സരം പോലും ജിതേഷിന് കളിക്കാൻ സാധിച്ചിരുന്നില്ല. 2022ലായിരുന്നു ജിതേഷിന്റെ കരിയറിലെ പ്രധാനപ്പെട്ട ഒരു സംഭവം നടക്കുന്നത്. ആ സീസണിൽ പഞ്ചാബ് കിങ്സിനായി കളത്തിലിറങ്ങിയ ജിതേഷ് ഫിനിഷർ റോളിൽ ഞെട്ടിച്ചു. 163 സ്ട്രൈക്ക് റേറ്റിൽ 234 റൺസാണ് ജിതേഷ് ആ സീസണിൽ നേടിയത്. അതോടെ ജിതേഷ് ശർമ്മ എന്ന വിക്കറ്റ് കീപ്പിങ് ഫിനിഷർ ശ്രദ്ധിക്കപ്പെട്ടു. തുടർന്ന് വന്ന സീസണിലും തന്റെ മികച്ച ഫോം തുടർന്നതോടെ ജിതേഷിന് ഇന്ത്യൻ ടീമിലേക്കുള്ള വിളിയുമെത്തി. 2023ൽ 309 റൺസാണ് ജിതേഷ് ഐപിഎല്ലിൽ നേടിയത്