IPL 2026: ഹാർദിക്കും ക്രുണാലും തമ്മിൽ കടുത്ത വിള്ളൽ; നടാഷയുമായുള്ള വിവാഹമോചനവും തട്ടിപ്പ് കേസും വില്ലനായോ?

ഇന്ത്യൻ ക്രിക്കറ്റിലെ ഏറ്റവും പ്രശസ്തമായ സഹോദര ബന്ധങ്ങളിൽ ഒന്നായ 'പാണ്ഡ്യ ബ്രദേഴ്സ്' തകർച്ചയുടെ വക്കിലാണെന്ന സൂചനകൾ നൽകി ഐപിഎൽ 2026ലെ ദൃശ്യങ്ങൾ. വാംഖഡെ സ്റ്റേഡിയത്തിൽ മുംബൈ ഇന്ത്യൻസും ആർസിബിയും ഏറ്റുമുട്ടിയപ്പോൾ ആരാധകർ ഉറ്റുനോക്കിയത് ഹാർദിക്കും ക്രുണാലും തമ്മിലുള്ള ആ പഴയ സ്നേഹപ്രകടനങ്ങൾക്കായിരുന്നു. എന്നാൽ മൈതാനത്ത് കണ്ടത് തികച്ചും വിപരീതമായ കാഴ്ചകളാണ്. പരസ്പരം കണ്ണിൽ നോക്കാനോ ഒരു വാക്ക് സംസാരിക്കാനോ തയ്യാറാകാത്ത വിധം ഇരുവരും അകലം പാലിച്ചത് അണിയറയിലെ വലിയ തർക്കങ്ങളുടെ സൂചനയായാണ് വിലയിരുത്തപ്പെടുന്നത്.

വിവാഹമോചനവും കുടുംബത്തിലെ ഭിന്നതയും

ഹാർദിക് പാണ്ഡ്യയും നടാഷ സ്റ്റാൻകോവിച്ചും തമ്മിലുള്ള വിവാഹമോചനമാണ് ഈ അകൽച്ചയ്ക്ക് പ്രധാന കാരണമായി പറയപ്പെടുന്നത്. വിവാഹമോചനത്തിന് ശേഷവും ക്രുണാലും ഭാര്യ പങ്കൂരിയും നടാഷയുമായി അടുത്ത സൗഹൃദം പുലർത്തുന്നതും അവരോടൊപ്പം പരിപാടികളിൽ പങ്കെടുക്കുന്നതും ഹാർദിക്കിനെ ചൊടിപ്പിച്ചതായാണ് റിപ്പോർട്ടുകൾ. ഇതിനു വിപരീതമായി ഹാർദിക് തന്റെ പുതിയ സുഹൃത്തായ മഹികയ്ക്കൊപ്പം പൊതുവേദികളിൽ പ്രത്യക്ഷപ്പെടുന്നതും പാണ്ഡ്യ കുടുംബത്തിനുള്ളിൽ വലിയ അഭിപ്രായവ്യത്യാസങ്ങൾക്ക് കാരണമായെന്ന് കരുതപ്പെടുന്നു. ഹാർദിക് അടുത്തിടെ ഐസിസി ടി20 ലോകകപ്പ് ട്രോഫി ഉയർത്തിയപ്പോൾ പോലും ക്രുണാലോ ഭാര്യയോ സോഷ്യൽ മീഡിയയിൽ ഒരു അഭിനന്ദനക്കുറിപ്പ് പോലും പങ്കുവെക്കാതിരുന്നത് ഈ സംശയങ്ങൾക്ക് ആക്കം കൂട്ടി.

4 കോടിയുടെ വഞ്ചനാക്കേസ്

കുടുംബപരമായ പ്രശ്നങ്ങൾക്ക് പുറമെ സാമ്പത്തിക തർക്കങ്ങളും സഹോദരങ്ങൾക്കിടയിലെ വിള്ളലിന് ആക്കം കൂട്ടിയിട്ടുണ്ട്. 2024-ൽ ഇരുവരുടെയും സഹോദരൻ വൈഭവ് പാണ്ഡ്യ ഉൾപ്പെട്ട 4 കോടി രൂപയുടെ വഞ്ചനാക്കേസ് വലിയ വാർത്തയായിരുന്നു. ബിസിനസ് പങ്കാളിത്തവുമായി ബന്ധപ്പെട്ട് വൈഭവ് പാണ്ഡ്യ ഹാർദിക്കിനെയും ക്രുണാലിനെയും വഞ്ചിച്ചുവെന്നായിരുന്നു പരാതി. ഈ നിയമപോരാട്ടവും അതിനെത്തുടർന്നുണ്ടായ ആഭ്യന്തര പ്രശ്നങ്ങളും സഹോദരങ്ങൾക്കിടയിലെ വിശ്വാസത്തെ സാരമായി ബാധിച്ചിട്ടുണ്ടാകാം എന്ന് ക്രിക്കറ്റ് വൃത്തങ്ങൾ നിരീക്ഷിക്കുന്നു.

മൈതാനത്തെ അപ്രതീക്ഷിത 'അഗ്രഷൻ'

ഇന്നലെ കഴിഞ്ഞ മത്സരത്തിൽ ഈ അസ്വസ്ഥതകൾ പരസ്യമായി പ്രകടമായിരുന്നു. ഹാർദിക് ബാറ്റ് ചെയ്യുമ്പോൾ ക്രുണാലിനോട് കടുത്ത ദേഷ്യത്തിലാണ് പെരുമാറിയത്. എന്നാൽ ഇതിലും ഞെട്ടിച്ചത് ഹാർദിക് പുറത്തായപ്പോഴുള്ള ദൃശ്യങ്ങളാണ്. തന്റെ അനിയന്റെ വിക്കറ്റ് വീണപ്പോൾ ഒരു സഹോദരന്റെ വികാരങ്ങൾക്ക് പകരം കടുത്ത അഗ്രഷനോടെയാണ് അത് ആഘോഷിച്ചത്. ക്രുണാലിന്റെ ആക്രോശങ്ങളും ആംഗ്യങ്ങളും ഇരുവരും തമ്മിലുള്ള ബന്ധം എത്രത്തോളം വഷളായി എന്ന് തെളിയിക്കുന്നതായിരുന്നു. സാധാരണയായി എതിർ ടീമിലാണെങ്കിലും പരസ്പരം പ്രോത്സാഹിപ്പിച്ചിരുന്ന പാണ്ഡ്യ സഹോദരങ്ങളിൽ നിന്ന് ഇങ്ങനെയൊരു പെരുമാറ്റം ആരാധകർ പ്രതീക്ഷിച്ചിരുന്നില്ല.

ഈ സംഭവവികാസങ്ങളെക്കുറിച്ച് ഹാർദിക്കോ ക്രുണാലോ ഇതുവരെ ഔദ്യോഗികമായി പ്രതികരിച്ചിട്ടില്ല. എങ്കിലും പുറത്തുനിന്നുള്ള കാഴ്ചയിൽ പാണ്ഡ്യ സഹോദരങ്ങൾക്കിടയിലെ ആ പഴയ ആത്മബന്ധം ഇന്ന് ചരിത്രമായി മാറിയിരിക്കുകയാണ്. വ്യക്തിപരമായ തീരുമാനങ്ങളും സാമ്പത്തിക തർക്കങ്ങളും ഈ ഉറ്റ സഹോദരങ്ങളെ രണ്ട് ധ്രുവങ്ങളിലാക്കി മാറ്റിയിരിക്കുന്നു എന്നത് ഇന്ത്യൻ ക്രിക്കറ്റ് ആരാധകർക്ക് വലിയൊരു നിരാശയാണ് നൽകുന്നത്.