ബാബയുടെ വിയോഗം; സച്ചിന്‍ ഭക്ഷണം ഉപേക്ഷിച്ചു

ഹൈദരാബാദ്: ആത്മീയാചാര്യനായ സായി ബാബയുടെ വിയോഗം സച്ചിന്‍ ടെന്‍ഡുല്‍ക്കര്‍ക്കു കനത്ത ആഘാതമായി. ഡെക്കാന്‍ ചാര്‍ജ്ജേഴ്‌സിനെതിരായ ഐ.പി.എല്‍ മത്സരത്തില്‍ പങ്കെടുക്കാന്‍ ശനിയാഴ്ച രാത്രി വൈകി ഹൈദരാബാദിലെത്തിയ സച്ചിന്‍ ഞായറാഴ്ച പ്രഭാത ഭക്ഷണം ഉപേക്ഷിച്ചു.

ഹൈദരാബാദിലെ ഗ്രാന്റ് കകാഡിയ ഹോട്ടലില്‍ താമസിക്കുന്ന സച്ചിന്‍ മുറിയില്‍ നിന്ന് പുറത്തിറങ്ങാന്‍ കൂട്ടാക്കുന്നില്ലെന്നും ടീം മാനേജര്‍ അറിയിച്ചു. സന്ദര്‍ശകരെ ആരെയും മുറിയിലേക്ക് കടത്തി വിടേണ്ടെന്നും സച്ചിന്‍ നിര്‍ദ്ദേശം നല്‍കിയിട്ടുണ്ട്. മുറിയ്ക്ക് മുന്നില്‍ 'ശല്യപ്പെടുത്തരുത്' എന്ന ബോര്‍ഡും തൂക്കിയിട്ടുണ്ട്.

മുംബൈ ഇന്ത്യന്‍സ് ക്യാപ്റ്റനായ സച്ചിന്‍ ഞായറാഴ്ചത്തെ മത്സരത്തില്‍ കളിക്കുമോയെന്ന് ഉറപ്പില്ല. ബാബയുടെ ആരോഗ്യനില മോശമായതറിഞ്ഞ് ജന്മദിനാഘോഷം സച്ചിന്‍ വേണ്ടെന്നു വച്ചിരുന്നു.