ജൂലൈ- സപ്തംബര് മാസം
പുതിയ റിപ്പോര്ട്ടുകള് പ്രകാരം ഈ വര്ഷം ജൂലൈ- സപ്തംബര് മാസങ്ങളിലായി ഐപിഎല് സംഘടിപ്പിക്കുന്നതിനെ കുറിച്ച് ബിസിസിഐ ആലോചിക്കുന്നതായാണ് വിവരം. ഇംഗ്ലണ്ടും പാകിസ്താനുമൊഴികെ മറ്റു ടീമുകള്ക്കൊന്നും ഈ കാലയളവില് കാര്യമായി മല്സരങ്ങളില്ല. പാകിസ്താന് താരങ്ങള്ക്കാവട്ടെ നേരത്തേ തന്നെ ഐപിഎല്ലില് കളിക്കാന് അനുമതിയുമില്ല.
ജുലൈ- സപ്തംബര് മാസങ്ങളിലായി ഐപിഎല് സംഘടിപ്പിച്ചാല് ഇംഗ്ലണ്ടൊഴികെ മറ്റു രാജ്യങ്ങളില് നിന്നുള്ളവര്ക്ക് ഐപിഎല്ലില് കളിക്കാനാവുമെന്നതും ബിസിസിഐയുടെ നീക്കത്തിന് ശക്തി പകരുന്നുണ്ട്.
ഏഷ്യാ കപ്പ്
സപ്തംബര് മാസത്തില് ഏഷ്യാ കപ്പ് നടക്കുന്നുണ്ടെന്നത് ബിസിസിഐയെ സംബന്ധിച്ച് ചെറിയ വെല്ലുവിളിയാണ്. കൂടാതെ ജൂണ്/ ജൂലൈ മാസങ്ങളിലായി ശ്രീലങ്കയില് ദൈര്ഘ്യം കുറഞ്ഞ പരമ്പരയും ഇന്ത്യയെ കാത്തിരിക്കുന്നുണ്ട്. ഈ സാഹചര്യത്തില് ഐപിഎല്ലും ഇതിനിടെ സംഘടിപ്പിച്ചാല് അത് താരങ്ങള്ക്കു തിരിച്ചടിയാവുമോയെന്നതാണ് ബിസിസിഐയുടെ ആശങ്ക. തുടര്ച്ചയായ മല്സരങ്ങള് കാരണം താരങ്ങള്ക്കു പരിക്കേല്ക്കാനുള്ള സാധ്യതയും കൂടുതലാണ്.
2009ലെ ഐപിഎല്
2009ലെ ഐപിഎല്ലിനു ദക്ഷിണാഫ്രിക്ക വേദിയായപ്പോള് 37 ദിവസങ്ങള്ക്കുള്ളില് ടൂര്ണമെന്റ് തീര്ക്കാന് കഴിഞ്ഞിരുന്നു. അതായത് വെറും അഞ്ചാഴ്ചയും രണ്ടു ദിവസവും കൊണ്ട് ഐപിഎല് അവസാനിച്ചിരുന്നു. സമാനമായ ഷെഡ്യൂള് തയ്യാാറാക്കിയാല് ഐപിഎല് പകുതി ഇന്ത്യയിലും പകുതി വിദേശത്തുമായി നടത്താന് കഴിയും. അല്ലെങ്കില് ടൂര്ണമെന്റ് മുഴുവനായും വിദേശത്തു നടത്താം. കൊറോണവൈറസ് ബാധയുടെ സാഹചര്യം കൂടി പരിഗണിച്ചായിരിക്കണം ഇക്കാര്യം തീരുമാനിക്കേണ്ടതെന്നും ബിസിസിഐയുമായി ബന്ധപ്പെട്ട ചില വൃത്തങ്ങള് പറയുന്നു.
ഫ്രാഞ്ചൈസി ഉടമകളുടെ ചര്ച്ച
ഐപിഎല്ലിന്റെ ഭാവിയെക്കുറിച്ച് ചര്ച്ച ചെയ്യുന്നതിനായി ഫ്രാഞ്ചൈസി ഉടമകള് തിങ്കളാഴ്ച ടെലി-കോണ്ഫറന്സിങ് വഴി യോഗം ചേര്ന്നിരുന്നു. ഗൗരവമുള്ള വിഷയങ്ങളൊന്നും ചര്ച്ചയില് വന്നില്ലെന്നും വെറുമൊരു ഫോളോഅപ്പ് മീറ്റിങായിരുന്നു കഴിഞ്ഞതെന്നുമായിരുന്നു ഒരു ഫ്രാഞ്ചൈസി ഉടമയുടെ പ്രതികരണം. മുന് സാഹചര്യങ്ങളില് പ്രത്യേകിച്ചു മാറ്റമൊന്നുമുണ്ടായിട്ടില്ല. അതുകൊണ്ടു തന്നെ ഐപിഎല് നടക്കുമോയെന്ന് ഇപ്പോഴും പറയാന് സാധിക്കില്ലെന്നും അദ്ദേഹം വ്യക്തമാക്കിയിരുന്നു.