IPL 2026: ഏകദിന ലോകകപ്പിലും വൈഭവ് ടീമിൽ വേണോ? വിചിത്ര നിരീക്ഷണവുമായി ​ഗവാസ്കർ, കണ്ണുതള്ളി ആരാധകർ

ഐപിഎൽ 2026-ൽ രാജസ്ഥാൻ റോയൽസിനായി അവിശ്വസനീയ ബാറ്റിംഗ് പ്രകടനം പുറത്തെടുക്കുന്ന 15-കാരൻ വൈഭവ് സൂര്യവംശിയെ ഇന്ത്യൻ ടീമിലേക്ക് പരിഗണിക്കുന്നതിനെക്കുറിച്ച് വലിയ ചർച്ചകളാണ് ക്രിക്കറ്റ് ലോകത്ത് നടക്കുന്നത്. അടുത്തതായി വരാനിരിക്കുന്നത് ഐസിസി ഏകദിന ലോകകപ്പ് (50-ഓവർ ഫോർമാറ്റ്) ആയതുകൊണ്ട് തന്നെ, സൂര്യവംശിയെപ്പോലൊരു 'ഗൺ പ്ലെയറെ' എന്തുകൊണ്ട് ഇപ്പോഴേ ഏകദിന ടീമിലേക്ക് പരിഗണിക്കൂടാ എന്ന ചോദ്യത്തിന് മറുപടി നൽകുകയാണ് മുൻ ഇന്ത്യൻ ഇതിഹാസ താരം സുനിൽ ഗവാസ്കർ.

ആദ്യം ട്വന്റി-20, പിന്നീട് മാത്രം ഏകദിനം!

ലോകകപ്പിന് മുൻപ് ആവശ്യത്തിന് ഉഭയകക്ഷി പരമ്പരകൾ വരാനുണ്ടെങ്കിലും, സൂര്യവംശിയെ പെട്ടെന്ന് തന്നെ 50 ഓവർ ഫോർമാറ്റിലേക്ക് കൊണ്ടുവരുന്നതിനോട് ഗവാസ്കർ പൂർണ്ണമായി യോജിക്കുന്നില്ല. താരം ഘട്ടം ഘട്ടമായി മാത്രമേ ടീമിലേക്ക് എത്താവൂ എന്ന് അദ്ദേഹം വ്യക്തമാക്കുന്നു.

"അവനെ ആദ്യം ഏകദിന ഫോർമാറ്റിൽ പരീക്ഷിക്കുന്നതിന് മുൻപ് ട്വന്റി-20 (T20) ഫോർമാറ്റിലാണ് അവസരം നൽകേണ്ടത്. അതിനുശേഷം നമ്മുടെ ആഭ്യന്തര ഏകദിന മത്സരങ്ങളിലെയും മറ്റും അവന്റെ പ്രകടനം നമ്മൾ കൂടുതൽ നിരീക്ഷിക്കണം. അവിടെ അവൻ കാഴ്ചവെക്കുന്ന പ്രകടനത്തിന്റെ അടിസ്ഥാനത്തിൽ മാത്രമേ 50 ഓവർ ഫോർമാറ്റിലേക്ക് അവനെ പരിഗണിക്കുന്നതിനെക്കുറിച്ച് നമ്മൾ ചിന്തിക്കാൻ പാടുള്ളൂ."

ഇപ്പോഴത്തെ ഫോം വെച്ച് ഇംഗ്ലണ്ട് പര്യടനത്തിനുള്ള ടി20 ടീമിൽ വേണം!

വൈഭവ് സൂര്യവംശി നിലവിൽ പുറത്തെടുക്കുന്ന അസാധാരണ ഫോം കണക്കിലെടുക്കുമ്പോൾ വരാനിരിക്കുന്ന ഇംഗ്ലണ്ട് പര്യടനത്തിനുള്ള ഇന്ത്യൻ ടി20 ടീമിൽ താരം തീർച്ചയായും ഉണ്ടാകണമെന്നാണ് ഗവാസ്കറുടെ അഭിപ്രായം.

"ഏകദിന ഫോർമാറ്റിലേക്ക് അവനെ കൊണ്ടുവരാൻ സമയമെടുക്കുമെങ്കിലും, നിലവിലെ അവന്റെ തകർപ്പൻ ഫോം വെച്ച് ഇംഗ്ലണ്ടിൽ നടക്കാനിരിക്കുന്ന പരമ്പരയ്ക്കുള്ള ഇന്ത്യൻ (ടി20) ടീമിൽ അവൻ തീർച്ചയായും ഇടംപിടിക്കേണ്ടതുണ്ട്." ഗവാസ്കർ കൂട്ടിച്ചേർത്തു.

ഐപിഎൽ എലിമിനേറ്ററിൽ സൺറൈസേഴ്‌സ് ഹൈദരാബാദിനെതിരെ വെറും 29 പന്തിൽ 97 റൺസ് അടിച്ചുകൂട്ടി റെക്കോർഡിട്ട സൂര്യവംശിക്ക്, സുനിൽ ഗവാസ്കർ നിർദ്ദേശിച്ചതുപോലെ ഉടൻ തന്നെ ഇന്ത്യൻ കുപ്പായത്തിൽ അരങ്ങേറ്റം കുറിക്കാൻ അവസരം ലഭിക്കുമോ എന്ന് വരും ദിവസങ്ങളിൽ കണ്ടറിയാം.

ഇന്ന് നടക്കാനിരിക്കുന്ന രാജസ്ഥാൻ റോയൽസ് ​​ഗുജറാത്ത് ടൈറ്റൻസ് രണ്ടാം ക്വാളിഫയറിലും ഏവരും ഉറ്റുനോക്കുന്നത് വൈഭവിന്റെ പ്രകടനത്തെയാണ്. നിലവിൽ ഓറഞ്ച് ക്യാപ് സ്വന്തമാക്കിയിട്ടുള്ള വൈഭവ് രാജസ്ഥാനെ ഫൈനലിലേക്ക് എത്തിക്കുമോ എന്നാണ് ഏവരും ഉറ്റുനോക്കുന്നത്. 15 മത്സരങ്ങളിൽ നിന്നും 680 റൺസാണ് വൈഭവ് ഈ സീസണിൽ അടിച്ച് കൂട്ടിയത്. 242 എന്ന മാന്ത്രിക സ്ട്രൈക്ക് റേറ്റിലാണ് വൈഭവിന്റെ മിന്നും പ്രകടനങ്ങൾ. 65 സിക്സറുകളാണ് ഈ പതിനഞ്ചുകാരൻ രാജസ്ഥാൻ റോയൽസിനായി ഈ സീസണിൽ മാത്രം അടിച്ച് കൂട്ടിയത്. രാജസ്ഥാന്റെ വിജയങ്ങൾക്ക് പിന്നിൽ നട്ടെല്ലായി വൈഭവിന്റെ ഇന്നിങ്സുകളുണ്ട്. അത് ടീമിനെ ഫൈനലിൽ എത്തിക്കും എന്ന പ്രതീക്ഷയിലാണ് ആരാധകർ.