IPL 2026: കെകെആറിനുമുണ്ട് ഒരു സഞ്ജു സാംസൺ! വാട്സന്റെ പ്രസ്ഥാവനയിൽ ഞെട്ടൽ, അതാരെന്ന് തിരഞ്ഞ് ആരാധകർ

ഐപിഎൽ ചരിത്രത്തിലെ എക്കാലത്തെയും മികച്ച ഓൾറൗണ്ടർമാരിൽ ഒരാളായ ഷെയ്ൻ വാട്സൺ യുവപ്രതിഭകളെ കണ്ടെത്തുന്നതിൽ പ്രത്യേക വൈദഗ്ധ്യമുള്ള വ്യക്തിയാണ്. രാജസ്ഥാൻ റോയൽസിന്റെ സുവർണ്ണകാലത്ത് മലയാളി താരം സഞ്ജു സാംസണിന്റെ വളർച്ച നേരിട്ട് കണ്ട അദ്ദേഹം, ഇപ്പോൾ കൊൽക്കത്ത നൈറ്റ് റൈഡേഴ്സ് ക്യാമ്പിൽ അത്തരമൊരു പ്രതിഭയെ കൂടി കണ്ടെത്തിയിരിക്കുകയാണ്. അത് മറ്റാരുമല്ല, ഈ സീസണിൽ കെകെആറിനായി വെടിക്കെട്ട് ബാറ്റിംഗ് നടത്തുന്ന അങ്കൃഷ് രഘുവംശിയാണ്.

സഞ്ജു സാംസണെന്ന 'വണ്ടർ കിഡ്'

വാട്സന്റെ വാക്കുകളിൽ സഞ്ജുവിനോടുള്ള ബഹുമാനം വ്യക്തമാണ്. "വർഷങ്ങളായി ഐപിഎല്ലിൽ വിശ്വസിക്കാനാവാത്ത പ്രതിഭയുള്ള നിരവധി യുവ ക്രിക്കറ്റർമാരെ കാണാൻ എനിക്ക് ഭാഗ്യം ലഭിച്ചിട്ടുണ്ട്. 17 വയസ്സുള്ള സഞ്ജു സാംസണെ ആദ്യമായി കണ്ടത് ഞാൻ ഇന്നും ഓർക്കുന്നു. അന്നത്തെ അവന്റെ സ്കിൽ ലെവൽ കണ്ട് ഞാൻ അക്ഷരാർത്ഥത്തിൽ അമ്പരന്നുപോയി (Blown away). അത്രമേൽ അനായാസമായാണ് അവൻ പന്തിനെ നേരിട്ടിരുന്നത്. ഇപ്പോൾ അങ്കൃഷിനെ കാണുമ്പോൾ എനിക്ക് അതേ സഞ്ജുവിനെയാണ് ഓർമ്മ വരുന്നത്," വാട്സൺ പറഞ്ഞു.

അങ്കൃഷ് രഘുവംശിയുടെ അസാമാന്യ പ്രതിഭ

നിലവിൽ 21 വയസ്സുള്ള അങ്കൃഷ് രഘുവംശി കളിക്കളത്തിൽ പുലർത്തുന്ന പക്വതയും ഷോട്ട് സെലക്ഷനുമാണ് വാട്സണെ ആകർഷിച്ചത്. "21-ാം വയസ്സിൽ അവൻ തന്റെ ബാറ്റിംഗ് ശൈലി വികസിപ്പിച്ചെടുത്ത രീതി സത്യസന്ധമായി പറഞ്ഞാൽ അമ്പരപ്പിക്കുന്നതാണ്. അവന് എന്ത് ചെയ്യാൻ കഴിയുമെന്നതിന്റെ ചെറിയ സൂചനകൾ മാത്രമേ നമ്മൾ ഇതുവരെ കണ്ടിട്ടുള്ളൂ. വരാനിരിക്കുന്ന മത്സരങ്ങളിൽ ഇതിലും വലിയ ഇന്നിംഗ്സുകൾ അവനിൽ നിന്ന് പ്രതീക്ഷിക്കാം," വാട്സൺ കൂട്ടിച്ചേർത്തു. സഞ്ജു സാംസൺ പണ്ട് രാജസ്ഥാൻ നിരയിൽ കാണിച്ച അതേ നിർഭയമായ ബാറ്റിംഗ് ശൈലിയാണ് അങ്കൃഷും പിന്തുടരുന്നത്.

ഭാവിയിലെ വാഗ്ദാനം

സഞ്ജു സാംസൺ ഇന്ന് ഐപിഎല്ലിലെ ഏറ്റവും മികച്ച നായകന്മാരിൽ ഒരാളായും മികച്ച ബാറ്ററായും വളർന്നു കഴിഞ്ഞു. സഞ്ജുവിനെപ്പോലെ തന്നെ ഇന്ത്യൻ ക്രിക്കറ്റിന്റെ ഭാവി വാഗ്ദാനമാകാൻ അങ്കൃഷിന് കഴിയുമെന്നാണ് വാട്സന്റെ പ്രവചനം. പവർപ്ലേയിൽ പന്തുകളെ നേരിടുന്ന രീതിയിലും സ്പിന്നർമാർക്കെതിരെ കടന്നാക്രമിക്കുന്നതിലും സഞ്ജുവിന്റെ അതേ ശൈലി അങ്കൃഷിനുമുണ്ടെന്ന് ആരാധകരും നിരീക്ഷിക്കുന്നു.

കെകെആറിനെ സംബന്ധിച്ചിടത്തോളം പ്ലേ ഓഫ് മോഹങ്ങൾക്ക് ഏതാണ്ട് അവസാനിച്ച മട്ടാണ്. ഋതുരാജ് ഗെയ്‌ക്‌വാദ് ചെന്നൈയെ പക്വതയോടെ നയിക്കുമ്പോഴും വിരാട് കോഹ്‌ലി ബംഗളൂരുവിനായി റൺസ് അടിച്ചുകൂട്ടുന്നതിനിടയിലും, അങ്കൃഷിനെപ്പോലെയുള്ള യുവതാരങ്ങളുടെ പ്രകടനം ടൂർണമെന്റിനെ കൂടുതൽ ആവേശകരമാക്കുന്നു. കഴിഞ്ഞ ദിവസം ആർസിബിക്കെതിരെ പരാജയപ്പെട്ടെങ്കിലും അങ്കൃഷിന്റെ പ്രകടനം ശ്രദ്ധേയമായിരുന്നു. ഈ സീസണിൽ കെകെആറിനായി ഏറ്റവും കൂടുതൽ റൺസ് നേടുന്ന താരവും അങ്കൃഷ് തന്നെയാണ്. 11 മത്സരങ്ങളിൽ നിന്നും 340 റൺസാണ് ഈ യുവ താരത്തിന്റെ സമ്പാദ്യം. കഴിഞ്ഞ ദിവസം നേടിയ 71 റൺസാണ് താരത്തിന്റെ സീസണിലെ മികച്ച പ്രകടനം.