IPL 2026: ലക്നൗ ബൗളർമാരേ, സഞ്ജുവിനെ കരുതിയിരുന്നോളൂ! ലക്നൗവിനെതിരെയുള്ളത് കിടിലൻ റെക്കോർഡുകൾ

ചെന്നൈ സൂപ്പർ കിങ്സിനെ സംബന്ധിച്ചെടുത്തോളം ഇനി വരാനിരിക്കുന്ന ഓരോ മത്സരവും ജീവൻ മരണ പോരാട്ടങ്ങളാണ്. ലക്നൗവിനെതിരായ രണ്ട് മത്സരങ്ങളും അതിൽ അതിനിർണായകമാണ്. ഐപിഎൽ 2026-ലെ ഗ്ലാമർ പോരാട്ടത്തിൽ ലഖ്‌നൗ സൂപ്പർ ജയന്റ്‌സിനെ നേരിടാൻ ചെന്നൈ സൂപ്പർ കിംഗ്‌സ് ഒരുങ്ങുമ്പോൾ, ലഖ്‌നൗ ക്യാമ്പിനെ ഭയപ്പെടുത്തുന്നത് സഞ്ജു സാംസൺ എന്ന പേരാണ്. ലഖ്‌നൗവിനെതിരെ സഞ്ജുവിന് അവിശ്വസനീയമായ റെക്കോർഡാണുള്ളത്. പവർപ്ലേയിൽ മുഹമ്മദ് ഷമിയെയും പ്രിൻസ് യാദവിനെയും നേരിടാൻ സഞ്ജുവിനെക്കാൾ മികച്ചൊരു താരം നിലവിൽ ചെന്നൈ നിരയിലില്ല.

IPL 2026: ചെന്നൈയ്ക്ക് പ്ലേഓഫിലെത്തുക അത്ര എളുപ്പമല്ല, നാളെ തോറ്റാല്‍ കാല്‍ക്കുലേറ്റര്‍ എടുക്കേണ്ടി വരും
ലഖ്‌നൗവിനെ വിറപ്പിച്ച സഞ്ജുവിന്റെ റെക്കോർഡുകൾ

മുൻപ് രാജസ്ഥാൻ റോയൽസിന്റെ നായകനായിരിക്കെ ലഖ്‌നൗവിനെതിരെ കളിച്ച ആറ് ഇന്നിംഗ്‌സുകളിൽ നിന്ന് 200 റൺസാണ് സഞ്ജു അടിച്ചുകൂട്ടിയത്. ഇതിൽ പുറത്താകാതെ നേടിയ 82 റൺസാണ് സഞ്ജു എന്ന താരത്തിന്റെ ഏറ്റവും ഉയർന്ന സ്കോർ. ലഖ്‌നൗവിനെതിരെ സഞ്ജു തിളങ്ങിയപ്പോഴെല്ലാം തന്റെ ടീമിന് വിജയം സമ്മാനിക്കാൻ അദ്ദേഹത്തിന് സാധിച്ചിട്ടുണ്ട്.

ലഖ്‌നൗവിനെതിരായ സഞ്ജുവിന്റെ പോരാട്ടങ്ങൾ ഒറ്റനോട്ടത്തിൽ:

2024 (ജയ്പൂർ): 52 പന്തിൽ പുറത്താകാതെ 82 റൺസ് (രാജസ്ഥാൻ 20 റൺസിന് ജയിച്ചു)

2024 (ലഖ്‌നൗ): വെറും 33 പന്തിൽ 71* റൺസ് (രാജസ്ഥാൻ 7 വിക്കറ്റിന് ജയിച്ചു)

2022 (ബ്രബോൺ): 24 പന്തിൽ 32 റൺസ് (രാജസ്ഥാൻ 24 റൺസിന് ജയിച്ചു)

2025-ൽ പരിക്കേറ്റതും 2026-ൽ ചെന്നൈയിലേക്ക് മാറിയതും കാരണം ലഖ്‌നൗവിനെതിരെ സഞ്ജുവിന് കഴിഞ്ഞ തവണയും ഇത്തവണ ഇതുവരെയും കളിക്കാൻ സാധിച്ചിരുന്നില്ല. എന്നാൽ ഈ സീസണിലെ രണ്ട് നിർണ്ണായക മത്സരങ്ങളിൽ ലഖ്‌നൗവിനെ നേരിടുമ്പോൾ സഞ്ജു തന്റെ പഴയ ആധിപത്യം വീണ്ടെടുക്കുമെന്ന കാര്യത്തിൽ തർക്കമില്ല.

ഇപ്പോൾ ഈ സീസണിൽ ചെന്നൈയ്ക്കായി ഏറ്റവും കൂടുതൽ റൺസ് നേടിയ താരം സഞ്ജു സാംസൺ തന്നെയാണ്. 404 റൺസാണ് സഞ്ജുവിന്റെ ഇതുവരെയുള്ള സമ്പാദ്യം. അതിൽ രണ്ട് സെഞ്ച്വറികളും ഒരു 87 റൺസ് പ്രകടനവും ഒരു 48 റൺസ് ഇന്നിങ്സും ഉൾപ്പെടുന്നു. ചെന്നൈ ജയിച്ച അഞ്ച് മത്സരങ്ങളിൽ നാലിലും സഞ്ജു തന്നെയായിരുന്നു ടീമിന്റെ ടോപ് സ്കോറർ. അതിൽ മൂന്ന് മാൻ ഓഫ് ദി മാച്ച് പുരസ്കാരങ്ങളും ഉൾപ്പെടുന്നു.

ടി20 ക്യാപ്റ്റൻ സ്ഥാനത്ത് സൂര്യ അധികനാൾ തുടരില്ല; പരിഗണിക്കുന്നത് ശ്രേയസ് അയ്യരെ, ഈ കാര്യങ്ങൾ നിർണായകം
ലഖ്‌നൗവിന്റെ ബൗളിംഗ് നിരയും സഞ്ജുവിന്റെ തന്ത്രവും

മുഹമ്മദ് ഷമി നയിക്കുന്ന ലഖ്‌നൗ ബൗളിംഗ് നിരയെ നേരിടാൻ സഞ്ജുവിന് പ്രത്യേക പ്ലാനുകളുണ്ടെന്നാണ് വിദഗ്ധർ പറയുന്നത്. പവർപ്ലേയിൽ വിക്കറ്റ് കളയാതെ പിടിച്ചുനിന്നാൽ ലഖ്‌നൗവിന്റെ മറ്റ് ബൗളർമാരെ അടിച്ചൊതുക്കാൻ സഞ്ജുവിന് പ്രയാസമുണ്ടാകില്ല. സ്ലോ പിച്ചുകളിൽ ബാറ്റ് ചെയ്യാൻ പ്രത്യേക വൈഭവമുള്ള സഞ്ജുവിന്, ചെന്നൈയിലെ സാഹചര്യങ്ങൾ ഏറെ ഗുണകരമാകും. കഴിഞ്ഞ മത്സരങ്ങളിൽ പുറത്തെടുത്ത അതേ ആത്മവിശ്വാസത്തോടെ സഞ്ജു ബാറ്റ് വീശിയാൽ ലഖ്‌നൗവിന്റെ പ്ലാനുകൾ പാളും.