ഐപിഎൽ താരലേലം; ചില സർപ്രൈസുകൾ ഉറപ്പ്? 2 കോടി അടിസ്ഥാന വിലയുള്ള ഈ താരങ്ങൾ പണം വാരും.!

മുംബൈ: മിനി താരലേലത്തിനായി തയ്യാറെടുക്കുകയാണ് ഐപിഎൽ ടീമുകൾ എല്ലാം. നിലനിർത്തിയ കളിക്കാർക്ക് പുറമേ കൂടുതൽ താരങ്ങളെ സ്വന്തമാക്കാൻ ഇത് അവസരം നൽകും. ഇക്കുറി ആകെ 1355 കളിക്കാർ ലേലത്തിനായി രജിസ്‌റ്റർ ചെയ്‌തതിൽ, 45 താരങ്ങൾ 2 കോടി രൂപ അടിസ്ഥാന വില നിശ്ചയിച്ചു. അടുത്ത സീസണിന് മുന്നോടിയായി, ഈ 2 കോടി രൂപയുടെ നിലവാരത്തിൽ നിന്നും ലേലത്തിൽ ഏറ്റവും കൂടുതൽ വില ലഭിക്കാൻ സാധ്യതയുള്ള നാല് താരങ്ങൾ ആരൊക്കെയെന്ന് നോക്കാം.

കാമറൂൺ ഗ്രീൻ: ഐപിഎല്ലിൽ മികച്ച പ്രകടനം നടത്തിയിട്ടുള്ള താരമാണ് കാമറൂൺ ഗ്രീൻ. 2023-ൽ മുംബൈ ഇന്ത്യൻസിനെ പ്ലേഓഫിലെത്തിക്കുകയും റോയൽ ചലഞ്ചേഴ്‌സ് ബെംഗളൂരുവിനായി ഓൾറൗണ്ട് മികവ് കാട്ടുകയും ചെയ്‌ത ഗ്രീൻ പരിചയ സമ്പന്നനാണ്. കരിയറിൽ 41.59 ശരാശരിയിൽ 707 റൺസും 153.70 സ്ട്രൈക്ക് റേറ്റുമുണ്ട് താരത്തിന്. ആൻഡ്രേ റസ്സൽ വിരമിച്ചതിനാൽ, ലേലത്തിലെ ഏറ്റവും കരുത്തനായ ഓൾറൗണ്ടർ എന്ന നിലയിൽ ഗ്രീനിന് വലിയ ഡിമാൻഡ് ഉറപ്പാണ്.

വെങ്കിടേഷ് അയ്യർ: കൊൽക്കത്ത നൈറ്റ് റൈഡേഴ്‌സിനായി ബാറ്റുകൊണ്ട് പ്രതീക്ഷിച്ച നേട്ടം കൈവരിച്ചില്ലെങ്കിലും, വെൻകട്ടേഷ് അയ്യർക്ക് ഐപിഎല്ലിൽ മികച്ച ട്രാക്ക് റെക്കോർഡുകളുണ്ട്. ടൂർണമെന്റിൽ 1468 റൺസ് നേടിയ ഈ ഇടംകൈയ്യൻ ബാറ്ററുടെ ശരാശരി 29.96-ഉം സ്ട്രൈക്ക് റേറ്റ് 137.32-ഉം ആണ്.

മുൻപ് മികച്ച പ്രകടനം നടത്തിയിട്ടുള്ള ആഭ്യന്തര ക്രിക്കറ്റർ എന്നതും അദ്ദേഹത്തിന്റെ സാധ്യത ഉയർത്തുന്നു. പ്രധാനമായും മൂന്നാം നമ്പറിൽ അയ്യർ സ്ഥിരതയാർന്ന പ്രകടനമാണ് നടത്തിയത്. ഈ സ്ഥാനത്ത് 43.23 ശരാശരിയിൽ 562 റൺസ് നേടിയ അദ്ദേഹം, 168.77 എന്ന ഉയർന്ന സ്ട്രൈക്ക് റേറ്റും നിലനിർത്തി. ഒരു ആഭ്യന്തര ബാറ്ററെ തേടുന്ന ടീമുകൾക്ക് അയ്യർ നല്ല ഓപ്‌ഷൻ തന്നെ ആയിരിക്കും.

ലിയാം ലിവിംഗ്സ്റ്റൺ: മധ്യനിരയിൽ തകർപ്പൻ ബാറ്റിംഗിനൊപ്പം ലെഗ് സ്‌പിൻ ബൗളിംഗിലൂടെയും സംഭാവന ചെയ്യാൻ കഴിവുള്ള താരമാണ് ലിയാം ലിവിംഗ്സ്റ്റൺ. റോയൽ ചലഞ്ചേഴ്‌സ് ബാംഗ്ലൂർ ഒഴിവാക്കിയ ശേഷം വിവിധ ടി20 ലീഗുകളിൽ താരം മികച്ച ഫോമിലാണ്. 16 മത്സരങ്ങളിൽ 51.9 ശരാശരിയിൽ 571 റൺസും (168.9 സ്ട്രൈക്ക് റേറ്റ്), 13 വിക്കറ്റുകളും അദ്ദേഹം നേടി. ഗ്ലെൻ മാക്‌സ്‌വെൽ പിന്മാറിയതിനാൽ മികച്ച ഓൾറൗണ്ടർമാരുടെ ലഭ്യത കുറവ് താരത്തിന്റെ മൂല്യം വർധിപ്പിക്കും.

വാനിന്ദു ഹസരംഗ: കഴിഞ്ഞ സീസണിൽ ബാറ്റുകൊണ്ട് ശോഭിക്കാനായില്ലെങ്കിലും, രാജസ്ഥാൻ റോയൽസിനായി പന്തുകൊണ്ട് അദ്ദേഹം ശ്രദ്ധേയമായ പ്രകടനം നടത്തിയിരുന്നു. 22 സ്ട്രൈക്ക് റേറ്റിൽ 11 വിക്കറ്റുകൾ താരം നേടി. ഓൾറൗണ്ട് കഴിവുകളും സമീപകാല പ്രകടനവും ഈ ശ്രീലങ്കൻ താരത്തിനായി ലേലത്തിൽ വൻ തുക മുടക്കാൻ ഫ്രാഞ്ചൈസികളെ പ്രേരിപ്പിച്ചേക്കാം.

ഐപിഎല്ലിൽ 37 മത്സരങ്ങളിൽ ഒന്നിലധികം ഫ്രാഞ്ചൈസികളെ പ്രതിനിധീകരിച്ച് പരിചയസമ്പത്തുള്ള ഹസരംഗ, ലേലത്തിലെ ഏറ്റവും മികച്ച, ട്രാക്ക് റെക്കോർഡുള്ള വിദേശ കളിക്കാരിൽ ഒരാളാണ്. അദ്ദേഹത്തിന്റെ ബഹുമുഖ പ്രതിഭയും കളിക്കളത്തിലെ പോരാട്ടവീര്യം 2025-ലെ പ്രകടനവും ചേരുമ്പോൾ താരത്തിന് ലേലത്തിൽ വലിയ ഡിമാൻഡ് ഉറപ്പാണ്.