ഉമ്രാന്റെ പിതാവിന് അദ്ദേഹം കാര് സമ്മാനമായി നല്കുകയും ചെയ്തു. മകന്റെ നേട്ടങ്ങളില് താന് അതിയായ സന്തോഷവാനാണെന്ന് ഉമ്രാന്റെ പിതാവ് അബ്ദുല് റാഷിദ് ദേശീയ മാധ്യമങ്ങളോട് പറഞ്ഞു. 'ഉമ്രാനെ ഇന്ത്യന് ടീമിലേക്കെടുത്തത് ഫോണിലൂടെയാണ് അറിഞ്ഞത്. ഇത് എല്ലാവരും അറിഞ്ഞതോടെ നിരവധി ആളുകളാണ് എന്നെ പ്രശംസിക്കാനെത്തിയത്. രാജ്യത്തിനായി കളിക്കുകയെന്നതില് കൂടുതല് എന്താണ് ഒരു ക്രിക്കറ്റ് താരത്തിന് വേണ്ടത്. രാജ്യം ഉമ്രാന്റെ കഴിവിനെ പ്രശംസിക്കുന്നത് കാണുമ്പോള് അഭിമാനം തോന്നുന്നു'- ഉമ്രാന്റെ പിതാവ് പറഞ്ഞു.
'ഒരിക്കല് താന് വലിയ വിജയങ്ങള് നേടുന്ന താരമാവുമെന്ന് അവനുറപ്പുണ്ടായിരുന്നു. സ്വന്തം കഴിവില് വിശ്വസിച്ച ഉമ്രാന് തന്റെ സ്വപ്നങ്ങള് നേടിയെടുക്കാന് കഠിനമായി അധ്വാനിച്ചിരുന്നു. അവന്റെ അധ്വാനിത്തിന് ദൈവാനുഗ്രഹം കൂടി ലഭിച്ചു. താവി നദിയോട് ചേര്ന്നാണ് ഞങ്ങളുടെ വീട്. മണല് നിറഞ്ഞ സ്ഥലത്താണ് ഉമ്രാന് ചെറുപ്പത്തില് കളിച്ചിരുന്നത്. അതുകൊണ്ട് തന്നെ അവന്റെ ശരീരം നല്ല ഉറപ്പുള്ളതാണ്. 17 വയസിനുള്ളില് ജിമ്മിലൊന്നും പോകാതെ ഉമ്രാനെപ്പോലെ ഫിറ്റ്നസുള്ള അധികം താരങ്ങളെ കണ്ടിട്ടില്ല'- ഉമ്രാന്റെ പിതാവ് പറഞ്ഞു.
ഐപിഎല്ലില് പ്രതിഫലം ലഭിച്ചപ്പോള് എന്താണ് മകന് സമ്മാനമായി നല്കിയതെന്നും അദ്ദേഹത്തിന്റെ പിതാവ് പറഞ്ഞു. ' ഐപിഎല്ലിലെ പ്രതിഫലം ലഭിച്ചപ്പോള് അവന് എനിക്കൊരു കാര് സമ്മാനമായി നല്കി. അവന്റെ പ്രശ്നങ്ങളെക്കുറിച്ച് ഒരിക്കല് പോലും തുറന്ന് പറഞ്ഞിട്ടില്ല. എന്നെക്കാളും ഭാര്യയാണ് അവന് കൂടുതല് പിന്തുണ നല്കിയത്'- പിതാവ് കൂട്ടിച്ചേര്ത്തു.
ദക്ഷിണാഫ്രിക്കയ്ക്കെതിരായ ടി20 പരമ്പരയില് ഉമ്രാന് അവസരം ലഭിക്കുകയും തിളങ്ങുകയും ചെയ്താല് ഇന്ത്യയുടെ ടി20 ലോകകപ്പ് പദ്ധതികളില് ഉമ്രാനും ഇടം പിടിക്കും. ഇതിനോടകം ഉമ്രാന് ഇന്ത്യയുടെ ലോകകപ്പ് പദ്ധതികളുടെ ഭാഗമാണ്. എന്നാല് അന്താരാഷ്ട്ര ക്രിക്കറ്റിലെ പ്രകടനം കണ്ടറിയേണ്ടതായുണ്ട്. ദക്ഷിണാഫ്രിക്കന് പരമ്പരയിലെ ഉമ്രാന്റെ പ്രകടനം കരിയറില് താരത്തിന് നിര്ണ്ണായകമാവും.