സൂര്യകുമാര് യാദവിന്റെ സ്ഥിരത
ഇഷാന് കിഷന് ആക്രമണോത്സുകതയുള്ള ബാറ്റ്സ്മാനാണ്. ഏത് പൊസിഷനിലും ബാറ്റ് ചെയ്യാന് ഇഷാന് മികവുമുണ്ട്. എന്നാല് സ്ഥിരത പരിഗണിക്കുമ്പോള് സൂര്യകുമാറിന് മുന്തൂക്കം അവകാശപ്പെടാം. 2018-2021വരെയുള്ള സീസണുകള് പരിശോധിക്കുമ്പോള് സൂര്യ എല്ലാ സീസണിലും 300 ലധികം റണ്സ് നേടിയിട്ടുണ്ട്. ഇഷാന് 2020 സീസണില് സൂര്യയെക്കാള് റണ്സ് നേടിയിട്ടുണ്ടെങ്കിലും മറ്റ് രണ്ട് സീസണിലും സൂര്യയെക്കാള് പിന്നിലാണ്. 2021ല് ഫോം ഔട്ടിനെത്തുടര്ന്ന് പല മത്സരങ്ങളിലും ഇഷാന് ടീമിന് പുറത്തായിരുന്നു. ഇതെല്ലാം പരിഗണിക്കുമ്പോള് സൂര്യകുമാര് യാദവിനെ മുംബൈ നിലനിര്ത്തിയതില് തെറ്റ് പറയാനാവില്ല.
സൂര്യകുമാര് യാദവിന്റെ ഫിനിഷിങ് മികവ്
ടീമിനെ വിജയത്തിലെത്തിക്കുന്നതില് വലിയ മിടുക്കുകാട്ടുന്ന താരമാണ് സൂര്യകുമാര് യാദവ്. പ്രധാനമായും റണ്സ് പിന്തുടരുമ്പോള് സ്ഥിരത കാട്ടാന് സൂര്യകുമാറിന് സാധിക്കുന്നുണ്ട്. അതിവേഗത്തില് റണ്സുയര്ത്താനും നിലയുറപ്പിച്ച് കളിക്കാന് സൂര്യക്ക് സാധിക്കും. സമ്മര്ദ്ദത്തിന് പെട്ടെന്ന് കീഴപ്പെടാത്ത താരംകൂടിയാണ് സൂര്യകുമാര്. അതുകൊണ്ട് തന്നെ വിശ്വസ്തനുമാണ്. എതിര് ബൗളര്മാരില് എപ്പോഴും സമ്മര്ദ്ദം നിലനിര്ത്താന് ഇഷാനെക്കാള് സൂര്യക്ക് സാധിക്കും. നിലയുറപ്പിച്ചാല് സൂര്യയുടെ വിക്കറ്റ് നേടുക വളരെ പ്രയാസമാണ്. അതുകൊണ്ട് തന്നെ സൂര്യകുമാറിനെ മുംബൈ കൂടുതല് വിശ്വാസം അര്പ്പിച്ചുവെന്ന് പറയാം.
മധ്യ ഓവറുകളില് റണ്സുയര്ത്താനുള്ള മികവ്
മറ്റ് ബാറ്റ്സ്മാന്മാരില് നിന്ന് സൂര്യകുമാറിനെ വ്യത്യസ്തനാക്കുന്നത് മധ്യ ഓവറുകളിലെ ബാറ്റിങ് മികവാണ്. പവര്പ്ലേക്ക് ശേഷമുള്ള മധ്യ ഓവറുകളിലാണ് മിക്ക ടീമും പ്രയാസപ്പെടുന്നത്. പ്രതീക്ഷിച്ച രീതിയില് റണ്സുയര്ത്താന് പല താരങ്ങള്ക്കും സാധിക്കാറില്ല. എന്നാല് സൂര്യകുമാര് അനായാസമായി റണ്സുയര്ത്തും. ബൗണ്ടറികളിലൂടെയും വ്യത്യസ്തമായ ഷോട്ടുകളിലൂടെയും റണ്സുയര്ത്താന് അദ്ദേഹത്തിന് സാധിക്കാറുണ്ട്. ബൗളര്മാരെ ആശയക്കുഴപ്പത്തിലാക്കുന്ന ഫുട് വര്ക്കും സൂര്യക്ക് അവകാശപ്പെടാം. മധ്യ ഓവറുകളിലെ ഈ മികവാണ് സൂര്യയെ നിലനിര്ത്താനുള്ള കാര്യങ്ങളിലൊന്ന്.
ഇഷാന്റെയും സൂര്യയുടെയും കരിയര്
23കാരനായ ഇഷാന് കിഷന് 61 ഐപിഎല് മത്സരങ്ങളാണ് കളിച്ചത്. 28.47 ശരാശരിയില് 1452 റണ്സാണ് ഇഷാന് നേടിയിട്ടുള്ളത്. ഒരു സെഞ്ച്വറി പോലും നേടാത്ത ഇഷാന്റെ ഉയര്ന്ന സ്കോര് 99 റണ്സാണ്. ഒമ്പത് അര്ധ സെഞ്ച്വറിയാണ് ഇഷാന് നേടിയിട്ടുള്ളത്.
31കാരനായ സൂര്യകുമാര് യാദവ് 115 ഐപിഎല് മത്സരങ്ങളില് നിന്ന് 28.9 ശരാശരിയില് നേടിയത് 2341 റണ്സാണ്. ഇതില് 13 അര്ധ സെഞ്ച്വറിയാണ് ഉള്പ്പെടുക. 82 റണ്സാണ് അദ്ദേഹത്തിന്റെ ഉയര്ന്ന സ്കോര്.