ജോസ് ബട്ലറെ വേഗം മടക്കണം
നിലവിലെ രാജസ്ഥാന് നിരയില് ഏറ്റവും അപകടകാരി ജോസ് ബട്ലറാണെന്നതില് സംശയമില്ല. നാല് സെഞ്ച്വറിയുള്പ്പെടെ സീസണില് 800 റണ്സും പിന്നിട്ട് ബട്ലര് കുതിക്കുകയാണ്. ഫൈനലില് ഗുജറാത്തിന്റെ മുന്നിലെ പ്രധാന വെല്ലുവിളി ബട്ലറുടെ ഫോമാണ്. നിലയുറപ്പിച്ചാല് അധികം പിഴവുകള് വരുത്താത്ത താരമാണ് ജോസ് ബട്ലര്. അതുകൊണ്ട് തന്നെ തുടക്കത്തിലേ ബട്ലറെ മടക്കാന് രാജസ്ഥാന് ശ്രദ്ധിക്കേണ്ടതായുണ്ട്. ഔട്ട് സ്വിങ്ങറുകള് ബട്ലറുടെ ദൗര്ബല്യമായാണ് പൊതുവേ വിലയിരുത്തപ്പെടുന്നത്. ഇതിനെ എത്രമാത്രം മുതലാക്കാന് ഗുജറാത്തിന് സാധിക്കുമെന്നതാണ് കണ്ടറിയേണ്ടത്.
ഷമിയും റാഷിദ് ഖാനും നിര്ണ്ണായകം
ബൗളിങ്ങില് മുഹമ്മദ് ഷമി നല്കുന്ന തുടക്കവും മധ്യ ഓവറുകളിലെ റാഷിദ് ഖാന്റെ പ്രകടനവും ഗുജറാത്തിന് നിര്ണ്ണായകമാവും. ഷമി സ്വിങ് ബൗളറാണ്. അഹമ്മദാബാദിലെ ഫ്ളാറ്റ് പിച്ചില് ആദ്യ ഓവറുകളില് അല്പ്പം സ്വിങ് പ്രതീക്ഷിക്കാം. അതുകൊണ്ട് തന്നെ ഷമി എറിയുന്ന ആദ്യത്തെ രണ്ട് ഓവറുകള് വളരെ നിര്ണ്ണായകം. രാജസ്ഥാന്റെ ടോപ് ത്രീ ബാറ്റിങ് നിരയിലാണ് ടീമിന്റെ കരുത്തിരിക്കുന്നത്. അതുകൊണ്ട് തന്നെ ഷമിക്ക് വലിയ പിന്തുണ ഗുജറാത്ത് നല്കേണ്ടതുണ്ട്. രണ്ട് വിക്കറ്റെങ്കിലും പവര്പ്ലേക്കുള്ളില് ഷമിക്ക് വീഴ്ത്താനായാല് അത് മത്സരത്തില് വലിയ സ്വാധീനമുണ്ടാക്കും. സഞ്ജു സാംസണെ കുരുക്കാന് റാഷിദ് ഖാനെ ഫലപ്രദമായി ഗുജറാത്ത് ഉപയോഗിക്കേണ്ടതായുണ്ട്.
തുടക്കം പാളരുത്
രാജസ്ഥാനെതിരായ ഒന്നാം ക്വാളിഫയറില് ഓപ്പണര് വൃദ്ധിമാന് സാഹ പൂജ്യത്തിന് പുറത്തായെങ്കിലും ഡേവിഡ് മില്ലര് ഗുജറാത്തിനെ വിജയത്തിലേക്ക് കൈപിടിച്ചുയര്ത്തി. എന്നാല് എപ്പോഴും ഇത് സംഭവിക്കണമെന്നില്ല. അതുകൊണ്ട് തന്നെ മികച്ച തുടക്കം ഗുജറാത്ത് ഉറപ്പ് വരുത്തണം. ടോപ് ത്രീ പെട്ടെന്ന് മടങ്ങിയാല് ഗുജറാത്തിന് കാര്യങ്ങള് എളുപ്പമാവില്ല. ട്രന്റ് ബോള്ട്ടിനെ ന്യൂബോളില് പേടിക്കുക തന്നെ ചെയ്യണം. പ്രസിദ്ധും ഒബെഡ് മക്കോയിയും മിന്നും ഫോമില്. അതുകൊണ്ട് തന്നെ വിക്കറ്റുകള് തുടക്കത്തിലേ അധികം നഷ്ടപ്പെടുത്താതിരിക്കാന് ഗുജറാത്ത് ശ്രദ്ധിക്കേണ്ടത് പ്രധാനപ്പെട്ട കാര്യമാണ്.