നിലവിലെ ഫോം
സമീപകാലത്തെ ഫോം പരിശോധിക്കുമ്പോള് കഗിസോ റബാദയെക്കാള് ഒരുപടി മുന്നിലാണ് ആന്റിച്ച് നോക്കിയേ. അവസാന ഐപിഎല്ലിലെ പ്രകടനവും ഇക്കഴിഞ്ഞ ടി20 ലോകകപ്പിലെ പ്രകടനവും പരിശോധിച്ചാല് റബാദയെക്കാള് മികവ് കാട്ടിയിരുന്നത് നോക്കിയേയാണെന്ന് പറയാം. ടി20 ലോകകപ്പില് 8ന് മുകളിലായിരുന്നു റബാദയുടെ ഇക്കോണമി. ഗ്രൂപ്പുഘട്ടത്തില് ഇംഗ്ലണ്ടിനെതിരേ ഹാട്രിക്ക് നേടിയതാണ് റബാദക്ക് സമീപകാലത്തെ എടുത്തുപറയാവുന്ന നേട്ടം.
ഐപിഎല്ലിലെ റബാദ 50 മത്സരത്തില് നിന്ന് 76 വിക്കറ്റാണ് നേടിയത്. 21 റണ്സ് വിട്ടുകൊടുത്ത് നാല് വിക്കറ്റ് വീഴ്ത്തിയതാണ് മികച്ച പ്രകടനം. 8.21 ആണ് ഇക്കോണമി. നോക്കിയേ 24 മത്സരത്തില് നിന്ന് 34 വിക്കറ്റാണ് നേടിയത്. ഇക്കോണമി 7.65 ആണ്. ഈ കണക്കുകളില് നിന്ന് തന്നെ റബാദയെക്കാള് നോക്കിയേ മുന്നിലാണ് വ്യക്തം.
ഡെത്ത് ഓവറിലെ മികവ്
കഗിസോ റബാദക്ക് മികച്ച ലൈനും ലെങ്തും കണ്ടെത്താന് സമീപകാലത്തായി കഴിയുന്നില്ല. വരുന്ന സീസണില് ഇന്ത്യയിലാണ് മത്സരം. അതിനാല് മികച്ച ലൈനും ലെങ്തുമില്ലാത്ത ബൗളര്മാര് തല്ലുവാങ്ങിക്കൂട്ടുമെന്നുറപ്പാണ്. റബാദ അതിവേഗ യോര്ക്കറുകളെറിയാന് മിടുക്കനാണെങ്കിലും സ്ഥിരത കുറവാണ്. അതിനാല് ഡെത്ത് ഓവറില് നന്നായി തല്ലുവാങ്ങാറുമുണ്ട്. റണ്സ് വിട്ടുകൊടുക്കാന് യാതൊരു മടിയും താരം കാട്ടുന്നില്ല.
അതേ സമയം നോക്കിയേ ഡെത്ത് ഓവറില് റണ്സ് വിട്ടുകൊടുക്കാന് നല്ല പിശുക്കുകാട്ടുന്നു. വ്യത്യസ്തമായി പന്തെറുകളെറിഞ്ഞ് ബാറ്റ്സ്മാനെ ആശയക്കുഴപ്പത്തിലാക്കാനും മിടുക്കനാണ്. മികച്ച ലൈനും ലെങ്തും കാത്തുസൂക്ഷിച്ച് പന്തെറിയാന് കെല്പ്പുള്ള നോക്കിയേ വിക്കറ്റ് വീഴ്ത്താനും മിടുക്കനാണ്. അതിനാല് റബാദയെക്കാള് നോക്കിയേയാണ് ടീമിന് കൂടുതല് ഗുണം ചെയ്യുക.
വിക്കറ്റ് വീഴ്ത്താനുള്ള കഴിവ്
നോക്കിയേ തുടക്കത്തിലേ വിക്കറ്റ് വീഴ്ത്താന് കെല്പ്പുള്ള ബൗളറാണ്. ന്യൂബോളില് നല്ല വേഗം മാത്രമല്ല സ്വിങ്ങും ലൈനും ലെങ്തും കണ്ടെത്താന് സാധിക്കുന്ന നോക്കിയേ പവര്പ്ലേയില് വിക്കറ്റ് വീഴ്ത്താനും റണ്സ് നിയന്ത്രിക്കാനും മിടുക്കനാണ്. എന്നാല് റബാദയെ കൂടുതലും മധ്യ ഓവറിലേക്കാണ് പരിഗണിക്കുന്നത്. തുടക്കത്തില് വിക്കറ്റ് വീഴ്കത്തുന്നതില് റബാദയെക്കാള് മികച്ചവന് നോക്കിയേയാതിനാല് ഡല്ഹിയുടെ നീക്കം ഡല്ഹിക്ക് ഗുണം ചെയ്യാനാണ് സാധ്യത കൂടുതല്. തന്റെ ഉയരക്കൂടുതലിനെ കളത്തില് നന്നായി ഉപയോഗിക്കുന്ന ബൗളറാണ് നോക്കിയേ.