IPL 2021: അവന്‍ കക്കൂസിലായിരുന്നോ? ബെയര്‍സ്‌റ്റോയെ ഇറക്കാത്തതിനെ പരിഹസിച്ച് സെവാഗ്

ഡല്‍ഹി ക്യാപിറ്റല്‍സ് ഉയര്‍ത്തിയ 160 എന്ന വിജയ ലക്ഷ്യം പിന്തുടര്‍ന്നിറങ്ങിയ ഹൈദരാബാദിനായി വെടിക്കെട്ട് ബാറ്റിംഗാണ് ബെയര്‍‌സ്റ്റോ കാഴ്ചവച്ചത്. 18 പന്തുകളില്‍ നിന്നും 38 റണ്‍സാണ് താരം നേടിയത്. 51 പന്തുകളില്‍ നിന്നും 66 റണ്‍സെടുത്ത വില്യംസണും അവസാന ഓവറുകളില്‍ ആറ് പന്തുകള്‍ മാത്രം നേരിട്ട് 14 റണ്‍സെടുത്ത ജഗദീഷ സുചിത്തും ചേര്‍ത്താണ് ഹൈദരാബാദിനെ ഒപ്പമെത്തിച്ചത്.

കളി സൂപ്പര്‍ ഓവറിലേക്ക് നീങ്ങിയപ്പോള്‍ ബെയര്‍ സ്‌റ്റോയും വില്യംസണും ആയിരിക്കും ഹൈദരാബാദിനായി ഇറങ്ങുക എന്നായിരുന്നു എല്ലാവരും പ്രതീക്ഷിച്ചിരുന്നത്. എന്നാല്‍ പ്രതീക്ഷകളെല്ലാം തെറ്റിച്ച് ഡേവിഡ് വാര്‍ണര്‍ വില്യംസണിനൊപ്പം ഇറങ്ങുകയായിരുന്നു. ഇരുവരും ചേര്‍ന്ന് ഏഴ് റണ്‍സാണ് അക്‌സര്‍ പട്ടേല്‍ എറിഞ്ഞ ഓവറില്‍ നേടിയത്. ഡല്‍ഹിക്കായി നായകന്‍ ഋഷഭ് പന്തും ശിഖര്‍ ധവാനുമാണ് ഇറങ്ങിയത്. റാഷിദ് ഖാനായിരുന്നു പന്തെറിഞ്ഞത്. അനായാസം ഡല്‍ഹി ജയം സ്വന്തമാക്കുകയായിരുന്നു.

ബെയര്‍‌സ്റ്റോയെ ഇറക്കാതിരുന്ന തീരുമാനത്തെ പരിഹസിച്ചു കൊണ്ട് രംഗത്ത് എത്തിയിരിക്കുകയാണ് വീരേന്ദര്‍ സെവാഗ്. ബെയര്‍‌സ്റ്റോ കക്കൂസിലായിരുന്നുവെങ്കില്‍ ഒഴികെ, സൂപ്പര്‍ ഓവരില്‍ അവന്‍ നിങ്ങളുടെ ആദ്യ ചോയ്‌സ് ആകാതിരിക്കാനുള്ള കാരണം മനസിലാകുന്നില്ല. മെയിന്‍ ഇന്നിംഗ്‌സില്‍ 18 പന്തുകളില്‍ നിന്നും 38 റണ്‍സ് നേടിയതാണ്. ക്ലീനായി ഹിറ്റ് ചെയ്യുന്നുണ്ടായിരുന്നു. ഹൈദരാബാദ് നന്നായി പോരാടി, പക്ഷെ അസാധാരണ തീരുമാനങ്ങള്‍ക്ക് അവര്‍ക്ക് സ്വയം പഴിക്കാതെ വേറെ മാര്‍ഗ്ഗമില്ല എന്നായിരുന്നു സേവാഗ് ട്വീറ്റ് ചെയ്തത്.

അതേസമയം കളിച്ച അഞ്ച് കളിയില്‍ നാലെണ്ണവും ഹൈദരാബാദ് പരാജയപ്പെട്ടിരിക്കുകയാണ്. ഇതോടെ ഹൈദരാബാദ് പോയന്റ് പട്ടികയില്‍ ഏഴാം സ്ഥാനത്തേക്ക് വീണു, നാല് ജയവും ഒരു തോല്‍വിയുമായി ഡല്‍ഹി രണ്ടാം സ്ഥാനത്തേക്ക് കയറുകയും ചെയ്തു. അടുത്ത മത്സരത്തില്‍ ഹൈദരാബാദ് നേരിടുക കട്ട ഫോമിലുള്ള ചെന്നൈ സൂപ്പര്‍ കിംഗ്‌സിനെയാണ്. അമ്പേ പരാജയമായ മധ്യനരിയാണ് ഹൈദരാബാദിനെ വലയ്ക്കുന്ന ഘടകം. ബുധനാഴ്ചയാണ് ഹൈദരാബാദിന്റെ അടുത്ത മത്സരം.