IPL 2021: കപ്പടിച്ചിട്ടില്ല, പക്ഷേ ആര്‍സിബിയുടെ ഈ മൂന്ന് റെക്കോഡ് ഒരിക്കലും തകര്‍ന്നേക്കില്ല

Bangalore owns three unbeatable records in IPL history | Oneindia Malayalam

ഐപിഎല്ലിലെ ഉയര്‍ന്ന സ്‌കോറുള്ള ടീം

ഐപിഎല്ലിന്റെ ചരിത്രത്തിലെ ഉയര്‍ന്ന ടീം ടോട്ടലെന്ന റെക്കോഡ് ആര്‍സിബിയുടെ പേരിലാണ്. അഞ്ച് വിക്കറ്റ് നഷ്ടത്തില്‍ 263 റണ്‍സാണ് ആര്‍സിബിയുടെ ഉയര്‍ന്ന ടീം ടോട്ടല്‍. 2013 ഏപ്രില്‍ 23ന് പൂനെ വാരിയേഴ്‌സിനെതിരെയാണ് ആര്‍സിബിയുടെ വമ്പന്‍ സ്‌കോര്‍ പിറന്നത്. ക്രിസ് ഗെയ്‌ലിന്റെ (175*) സെഞ്ച്വറി പ്രകടനമാണ് ആര്‍സിബിയെ മികച്ച സ്‌കോറിലേക്കെത്തിച്ചത്. 13 സിക്‌സും 13 ബൗണ്ടറിയുമാണ് ഗെയ്ല്‍ പറത്തിയത്. എബി ഡിവില്ലിയേഴ്‌സും (8 പന്തില്‍ 31) മികച്ച ടീം സ്‌കോറിലേക്കെത്താന്‍ ആര്‍സിബിയെ സഹായിച്ചു.

ഒരു സീസണില്‍ കൂടുതല്‍ സെഞ്ച്വറിയുള്ള ടീം

ടി20 ഫോര്‍മാറ്റില്‍ സെഞ്ച്വറി നേടുകയെന്നത് വലിയ പ്രയാസമുള്ള കാര്യമാണ്. ഒരു സീസണില്‍ കൂടുതല്‍ സെഞ്ച്വറി നേടിയ ടീമെന്ന റെക്കോഡ് ആര്‍സിബിയുടെ പേരില്‍ തകര്‍ക്കപ്പെടാതെയുണ്ട്. 2016 സീസണില്‍ അഞ്ച് സെഞ്ച്വറിയാണ് ആര്‍സിബി അടിച്ചെടുത്തത്. ഇതില്‍ നാല് സെഞ്ച്വറിയും നായകന്‍ വിരാട് കോലി നേടിയപ്പോള്‍ ഒരു സെഞ്ച്വറി എബി ഡിവില്ലിയേഴ്‌സും നേടി. കോലി കളം നിറഞ്ഞാടിയ ടൂര്‍ണമെന്റായിരുന്നു ഇത്. 81 ശരാശരിയില്‍ 973 റണ്‍സാണ് അദ്ദേഹം അന്ന് നേടിയത്. ഒരു സീസണില്‍ കൂടുതല്‍ സെഞ്ച്വറി,റണ്‍സ് എന്നീ നേട്ടങ്ങള്‍ ഇപ്പോഴും കോലിയുടെ പേരില്‍ത്തന്നെയാണ്.

ഉയര്‍ന്ന കൂട്ടുകെട്ട്

ഐപിഎല്ലിലെ ഉയര്‍ന്ന കൂട്ടുകെട്ട് എന്ന റെക്കോഡ് ആര്‍സിബി താരങ്ങളുടെ പേരിലാണ്. വിരാട് കോലിയും എബി ഡിവില്ലിയേഴ്‌സും ചേര്‍ന്ന് 229 റണ്‍സിന്റെ കൂട്ടുകെട്ടാണ് സൃഷ്ടിച്ചത്. ഇതും തകര്‍ക്കുക എളുപ്പമുള്ള കാര്യമല്ല. ഗുജറാത്ത് ലയണ്‍സിനെതിരേ രണ്ടാം വിക്കറ്റിലാണ് ഇരുവരും ചേര്‍ന്ന് ഈ റെക്കോഡ് കൂട്ടുകെട്ട് ഉണ്ടാക്കിയത്. 2018ല്‍ മുംബൈ ഇന്ത്യന്‍സിനെതിരേ 215 റണ്‍സിന്റെ കൂട്ടുകെട്ടും ഇരുവരും ചേര്‍ന്ന് സൃഷ്ടിച്ചിരുന്നു.