'ആദ്യമായല്ല, മുമ്പും ഇങ്ങനെ ദേഷ്യപ്പെട്ടിട്ടുണ്ട്', 2014ലെ തൊപ്പിയെറിഞ്ഞ സംഭവത്തെക്കുറിച്ച് ദ്രാവിഡ്

തലയിരുന്ന തൊപ്പി വലിച്ചെറിഞ്ഞ് ക്ഷുഭിതനായി ഡ്‌സിങ് റൂമിലേക്ക് പോയ ദ്രാവിഡിന്റെ മുഖം ഇന്നും ആരാധകര്‍ക്ക് മറക്കാനാവാത്തതാണ്. പതിവ് ശാന്തത കൈവിട്ട് കട്ടക്കലിപ്പിലായിരുന്നു ദ്രാവിഡ്. ജെയിംസ് ഫോക്‌നറുടെ ആ ഒരു പന്ത് രാജസ്ഥാന്റെ പ്ലേ ഓഫ് പ്രതീക്ഷകളെയെല്ലാം അവസാനിപ്പിക്കുന്നതായിരുന്നു. മികച്ച ടോട്ടല്‍ പടുത്തുയര്‍ത്തിയ ശേഷമാണ് ഇത്തരമൊരു തകര്‍ച്ച നേരിട്ടതെന്നതാണ് എടുത്തു പറയേണ്ട കാര്യം. ഇതാണ് ദ്രാവിഡിനെ പ്രകോപിപ്പിച്ചും. ഇപ്പോഴിതാ 2014ലെ തൊപ്പിയെറിയാനിടയായതിനെക്കുറിച്ച് ദ്രാവിഡ് തന്നെ ഇപ്പോള്‍ തുറന്ന് പറഞ്ഞിരിക്കുകയാണ്.

ക്രഡിന്റെ യൂട്യൂബ് ചാനലില്‍ നടത്തിയ അഭിമുഖത്തിലാണ് ദ്രാവിഡ് 2014ലെ സംഭവത്തെക്കുറിച്ച് മനസ് തുറന്നത്. 'എന്റെ നിയന്ത്രണം നഷ്ടപ്പെടുന്ന ആദ്യത്തെ സംഭവമല്ലത്. എന്നാല്‍ എന്റെ ദേഷ്യത്തെ നിയന്ത്രിച്ച് നിര്‍ത്താന്‍ എപ്പോഴും ശ്രമിക്കാറുണ്ട്. അന്താരാഷ്ട്ര ക്രിക്കറ്റില്‍ വലിയ സമ്മര്‍ദ്ദം നേരിടേണ്ടി വരും. നിരവധി കണ്ണുകള്‍ നിങ്ങളുടെ മേലുണ്ടാവും. നിങ്ങളുടെ ഓരോ നീക്കവും നിരീക്ഷിക്കപ്പെടുകയും ചെയ്യും. 2014ല്‍ തൊപ്പിയെറിഞ്ഞ തരത്തിലുള്ള ദേഷ്യം വരുന്നത് ആദ്യമായല്ല. അത് പല തവണ സംഭവിച്ചിട്ടുണ്ട്. എന്നാല്‍ ആദ്യമായി പൊതുയിടത്തില്‍ അങ്ങനെ സംഭവിച്ചു. മറ്റ് സംഭവങ്ങളെല്ലാം സ്വകാര്യ സമയത്തോ ഡ്രസിങ് റൂമിലോ ആയിരുന്നു'- ദ്രാവിഡ് പറഞ്ഞു.

ആര്‍സിബിക്കുവേണ്ടി അദ്ദേഹം കളിച്ചുകൊണ്ടിരുന്നപ്പോള്‍ മിച്ചല്‍ ജോണ്‍സണുമായി കൊമ്പുകോര്‍ക്കുകയും ചെയ്തിരുന്നു. എന്നാല്‍ നിലവില്‍ ഫ്രാഞ്ചൈസി ക്രിക്കറ്റുകളില്‍ നിന്നെല്ലാം അദ്ദേഹം വിട്ടുനില്‍ക്കുകയാണ്. നിലവില്‍ ദേശീയ ക്രിക്കറ്റ് അക്കാദമി തലവനെന്ന ചുമതലയാണ് ദ്രാവിഡിനുള്ളത്. ഇന്ത്യയുടെ ഭാവി താരങ്ങളെ വാര്‍ത്തെടുക്കുന്നതില്‍ നിര്‍ണ്ണായക പങ്കാണ് അദ്ദേഹം വഹിക്കുന്നത്.

കളത്തില്‍ ശാന്ത സ്വഭാവക്കാരനാണെങ്കിലും പരിശീലക വേഷത്തിലേക്കെത്തുമ്പോള്‍ അദ്ദേഹം കര്‍ക്കശക്കാരനാണെന്നാണ് താരങ്ങളില്‍ പലരും പറഞ്ഞിട്ടുള്ളത്. യാതൊരു വിധ വിട്ടുവീഴ്ചക്കും തയ്യാറാകാത്ത പരിശീലകനായ ദ്രാവിഡിനെ താരങ്ങള്‍ക്കെല്ലാം വലിയ ബഹുമാനവുമാണ്. അണ്ടര്‍ 19 ക്രിക്കറ്റ് ലോകകപ്പില്‍ ഇന്ത്യയെ കിരീടം ചൂടിക്കാന്‍ ദ്രാവിഡെന്ന പരിശീലകന് സാധിച്ചിരുന്നു. ടൂര്‍ണമെന്റില്‍ ഫോണടക്കം ഉപയോഗിക്കുന്നതില്‍ ദ്രാവിഡ് വിലക്കേര്‍പ്പെടുത്തിയിരുന്നുവെന്ന് അന്ന് ടീമിനെ നയിച്ച പൃഥ്വി ഷാ പിന്നീട് തുറന്ന് പറഞ്ഞിരുന്നു.

മികച്ച താരങ്ങളെ വാര്‍ത്തെടുക്കുന്നതില്‍ മാത്രമല്ല മികച്ച പെരുമാറ്റമുള്ള താരങ്ങളെ സൃഷ്ടിക്കാന്‍ ദ്രാവിഡിന് സാധിക്കുന്നുവെന്നതിലാണ് വലിയ കാര്യം. ദ്രാവിഡിന്റെ കീഴില്‍ പരിശീലിച്ച താരങ്ങളുടെയെല്ലാം വ്യക്തിത്വവും എപ്പോഴും എടുത്തുപറയാവുന്നതാണ്. രവി ശാസ്ത്രി ഇന്ത്യയുടെ മുഖ്യ പരിശീലകസ്ഥാനം ഒഴിയുമ്പോള്‍ പകരം ദ്രാവിഡിനോട് പരിശീലകനാവണമെന്ന് ബിസിസി ഐ ആവിശ്യപ്പെട്ടെങ്കിലും ദ്രാവിഡ് അത് നിരസിച്ചതായാണ് റിപ്പോര്‍ട്ട്. എന്നാല്‍ ടി20 ലോകകപ്പിന് പിന്നാലെ നടക്കുന്ന ന്യൂസീലന്‍ഡ് പര്യടനത്തില്‍ ദ്രാവിഡ് ഇന്ത്യയുടെ പരിശീലകനായേക്കും. നേരത്തെ ശ്രീലങ്കന്‍ പര്യടനത്തിലും ഇന്ത്യയുടെ പരിശീലകനായി ഉണ്ടായിരുന്നത് ദ്രാവിഡായിരുന്നു.