IPL 2021: തലപ്പത്തെത്തി ഡല്‍ഹി, നിരാശപ്പെടുത്തി പഞ്ചാബ്, തോല്‍വിയുടെ മൂന്ന് കാരണങ്ങളിതാ

പവര്‍പ്ലേ മുതലാക്കാന്‍ പഞ്ചാബിനായില്ല

പവര്‍പ്ലേ മുതലാക്കുന്നതില്‍ പഞ്ചാബിന് പിഴച്ചത് വമ്പന്‍ സ്‌കോര്‍ നേടുന്നതില്‍ നിന്ന് ടീമിനെ തടഞ്ഞു. ആറ് ഓവറില്‍ 39 റണ്‍സ് മാത്രമാണ് പഞ്ചാബ് നേടിയത്. ഇതില്‍ രണ്ട് വിക്കറ്റും ടീമിന് നഷ്ടപ്പെട്ടു. പ്രഭ്‌സിംറാന്‍ സിങ് (16 പന്തില്‍ 12),ക്രിസ് ഗെയ്ല്‍ (9 പന്തില്‍ 13) എന്നിവരുടെ വിക്കറ്റാണ് പഞ്ചാബിന് നഷ്ടമായത്. ഇതോടെ മധ്യ ഓവറുകളിലടക്കം ടീം സമ്മര്‍ദ്ദത്തിലായി. മികച്ച കൂട്ടുകെട്ടുകള്‍ സൃഷ്ടിക്കുന്നതിലും ടീം പരാജയപ്പെട്ടു. കൃത്യമായ ഇടവേളകളില്‍ പഞ്ചാബിന് വിക്കറ്റുകള്‍ നഷ്ടമായത് റണ്‍റേറ്റ് ഉയര്‍ത്തുന്നതിന് തിരിച്ചടിയായി.

ഡല്‍ഹിയുടെ ഓപ്പണിങ് കൂട്ടുകെട്ട്

ഡല്‍ഹി ക്യാപിറ്റല്‍സിന്റെ ഓപ്പണിങ് കൂട്ടുകെട്ടിന്റെ മികവ് പഞ്ചാബിന്റെ തോല്‍വിയുടെ പ്രധാന കാരണമാണ്. പൃത്ഥ്വി ഷായും (22 പന്തില്‍ 39) ശിഖര്‍ ധവാനും (47 പന്തില്‍ 69*) ചേര്‍ന്ന് ഒന്നാം വിക്കറ്റില്‍ 63 റണ്‍സാണ് ഡല്‍ഹിക്ക് നേടിക്കൊടുത്തത്. പവര്‍പ്ലേ അവസാനിച്ച ശേഷമുള്ള ആദ്യ പന്തിലാണ് ഈ കൂട്ടുകെട്ട് പൊളിഞ്ഞത്. അപ്പോഴേക്കും മികച്ച തുടക്കം ടീമിന് ലഭിച്ചിരുന്നു. മിന്നും ഫോമില്‍ കളിക്കുന്ന ഡല്‍ഹിയുടെ ഓപ്പണിങ് നിരയാണ് മിക്ക മത്സരങ്ങളിലും അവരുടെ ജയത്തിന് നിര്‍ണ്ണായകമാവുന്നത്.

പഞ്ചാബ് ബൗളര്‍മാര്‍ തീര്‍ത്തും നിരാശപ്പെടുത്തി

പഞ്ചാബ് കിങ്‌സ് ഇത്തവണ നേരിടുന്ന പ്രധാന പ്രശ്‌നങ്ങളിലൊന്ന് ബൗളര്‍മാരുടെ നിരാശപ്പെടുത്തുന്ന പ്രകടനമാണ്. ഡല്‍ഹിക്കെതിരേയും ബൗളര്‍മാര്‍ക്ക് തിളങ്ങാനായില്ല. മുഹമ്മദ് ഷമി മൂന്ന് ഓവറില്‍ 37 റണ്‍സ് വഴങ്ങിയെങ്കിലും വിക്കറ്റ് നേടാനായില്ല. രവി ബിഷ്‌നോയ് നാല് ഓവറില്‍ 42 റണ്‍സ് വിട്ടുകൊടുത്തെങ്കിലും വിക്കറ്റ് നേടുന്നതില്‍ പരാജയപ്പെട്ടു.ക്രിസ് ജോര്‍ദാന്‍ രണ്ട് ഓവറില്‍ 21 റണ്‍സ് വിട്ടുകൊടുത്ത് ഒരു വിക്കറ്റ് വീഴ്ത്തി. ബൗളര്‍മാര്‍ അവസരത്തിനൊത്ത് ഉയരാത്തത് പഞ്ചാബിന് വിജയം നേടുന്നതിന് കടുത്ത പ്രതിസന്ധിയാവുകയാണ്.