2010ന് ശേഷം ചെന്നൈയില് ഡല്ഹി നേടുന്ന ആദ്യ ജയമാണിത്. ഈ മൈതാനത്ത് തുടര്ച്ചയായ ആറ് മത്സരം തോറ്റ ശേഷമാണ് മുംബൈക്കെതിരേ ഡല്ഹി ഇറങ്ങിയത്. ശ്രേയസ് അയ്യര് പോലും പരാജയപ്പെട്ട സ്ഥലത്ത് റിഷഭിന്റെ ക്യാപ്റ്റന്സിയില് ഡല്ഹി ചെന്നൈയിലും വിജയക്കൊടി പാറിച്ചിരിക്കുകയാണ്. അതും കരുത്തരായ മുംബൈ ഇന്ത്യന്സിനെതിരെയാണ് ജയം നേടിയതെന്നത് ഡല്ഹിയുടെ ജയത്തിന്റെ മധുരം ഇരട്ടിയാക്കുന്നു.
കൂടാതെ മുംബൈ ഇന്ത്യന്സിനെതിരായ തുടര് തോല്വികളുടെ കണക്കുകള്ക്കും ഡല്ഹി ബ്രേക്കിട്ടിരിക്കുകയാണ്. ഈ മത്സരത്തിന് മുമ്പ് മുംബൈക്കെതിരേ അവസാനം കളിച്ച അഞ്ച് മത്സരത്തിലും മുംബൈയോട് ഡല്ഹി തലകുനിച്ചിരുന്നു. എന്നാല് ആറാം മത്സരത്തില് വിജയവഴിയിലെത്താന് ഡല്ഹിക്ക് സാധിച്ചു. ഈ നേട്ടം റിഷഭ് പന്ത് എന്ന ക്യാപ്റ്റന്റെ മികവിനുള്ള അംഗീകാരമാണ്.
ഏഴാം തവണയും രോഹിത് ശര്മയെ പുറത്താക്കി അമിത് മിശ്ര. മുംബൈ ഇന്ത്യന്സ് നായകനെ ഐപിഎല്ലില് കൂടുതല് തവണ പുറത്താക്കുന്ന ബൗളറെന്ന റെക്കോഡ് ഒരിക്കല്ക്കൂടി അരക്കെട്ടുറപ്പിക്കാന് അമിത് മിശ്രക്കായി. അമിത് മിശ്രയുടെ നാല് വിക്കറ്റ് പ്രകടനമാണ് മുംബൈയെ തകര്ത്തത്.
ഡല്ഹിക്കെതിരേ 30 പന്തില് മൂന്ന് വീതം സിക്സും ഫോറും ഉള്പ്പെടെ 44 റണ്സാണ് രോഹിത് ശര്മ നേടിയത്. ഇതോടെ ഡല്ഹിക്കെതിരേ കൂടുതല് സിക്സര് നേടുന്ന താരമായി രോഹിത് മാറി. നിലവില് 40 സിക്സുകളാണ് ഡല്ഹിക്കെതിരേ രോഹിതിന്റെ പേരിലുള്ളത്. ക്രിസ് ഗെയ്ലിന്റെ 37 സിക്സര് റെക്കോഡിനെയാണ് മറികടന്നത്.
മുംബൈക്കെതിരേ ധവാന് 793 റണ്സ് ഇക്കാലയളവില് നേടി. മുംബൈക്കെതിരേ കൂടുതല് റണ്സ് നേടിയവരില് ആര്സിബിയുടെ എബി ഡിവില്ലിയേഴ്സിനെ (774) മറികടക്കാന് ധവാനായി. കീറോണ് പൊള്ളാര്ഡിന്റെ പന്തില് വിക്കറ്റിന് മുന്നില് കുടുങ്ങിയാണ് സ്റ്റീവ് സ്മിത്ത് പുറത്തായത്.ടൂര്ണമെന്റ് ചരിത്രത്തില് ഇത് മൂന്നാം തവണ മാത്രമാണ് സ്മിത്ത് എല്ബിയില് പുറത്താകുന്നത്.
മുംബൈക്കെതിരേ നാല് ഓവറില് 24 റണ്സ് വഴങ്ങി നാല് വിക്കറ്റാണ് അമിത് വീഴ്ത്തിയത്. ഇത് അഞ്ചാം തവണയാണ് നാല് വിക്കറ്റ് പ്രകടനം അമിത് നടത്തുന്നത്. ഇന്ത്യന് താരങ്ങളില് ഈ നേട്ടത്തിലെ തലപ്പത്താണ് മിശ്ര.
ജസ്പ്രീത് ബുംറക്ക് മുന്നില് ഒരിക്കല്ക്കൂടി ഉത്തരമില്ലാതെ റിഷഭ് പന്ത്. ഇത് ആറാം തവണയാണ് റിഷഭിനെ ബുംറ പുറത്താക്കുന്നത്. മറ്റൊരു ബൗളറും മൂന്ന് തവണയില് കൂടുതല് റിഷഭിനെ പുറത്താക്കിയിട്ടില്ല.
ഡല്ഹിക്കെതിരേ ഗോള്ഡന് ഡെക്കായാണ് ഹര്ദിക് പാണ്ഡ്യ പുറത്തായത്. നേരിട്ട ആദ്യ പന്തില്ത്തന്നെ അമിത് മിശ്രയെ സിക്സര് പറത്താന് ശ്രമിച്ചാണ് താരം പുറത്തായത്. ടൂര്ണമെന്റ് ചരിത്രത്തില് ഇത് രണ്ടാം തവണ മാത്രമാണ് ഹര്ദിക് ഗോള്ഡന് ഡെക്കാവുന്നത്.
മുംബൈക്കെതിരേ ഡല്ഹിയുടെ 13ാം ജയമാണിത്. മുംബൈയെ തട്ടകത്തിന് പുറത്ത് കൂടുതല് തവണ പരാജയപ്പെടുത്തിയ ടീമെന്ന റെക്കോഡ് ഡല്ഹിക്കാണ്.