കെകെആറിനെതിരേ വലിയ റെക്കോഡുകളുള്ള ടീമാണ് മുംബൈ. നേര്ക്കുനേര് എത്തിയ മിക്കസമയത്തും ജയം മുംബൈക്കായിരുന്നു. 2019 ഏപ്രിലിന് ശേഷം ഇതാദ്യമായാണ് കെകെആര് മുംബൈ ഇന്ത്യന്സിനെ തോല്പ്പിക്കുന്നത്. ഹാട്രിക് കിരീടം തേടിയിറങ്ങിയ മുംബൈയില് നിന്ന് പ്രതീക്ഷിച്ച തരത്തിലുള്ള പ്രകടനമല്ല ഇപ്പോള് ഉണ്ടായിരിക്കുന്നത്. മുംബൈ നായകന് രോഹിത് കെകെആറിനെതിരേ 1000 റണ്സ് പൂര്ത്തിയാക്കുകയും 5500 റണ്സ് ക്ലബ്ബില് ഇടം പിടിക്കുകയും ചെയ്തെങ്കിലും തോല്വി വലിയ നാണക്കേടായിരിക്കുകയാണ്.
കെകെആര് വിക്കറ്റ് കീപ്പര് ദിനേഷ് കാര്ത്തിക് എംഎസ് ധോണിയെ മറികടന്ന് ഐപിഎല്ലില് ഏറ്റവും കൂടുതല് ക്യാച്ച് നേടുന്ന വിക്കറ്റ് കീപ്പറെന്ന നേട്ടം സ്വന്തമാക്കി. നിലവില് 115 ക്യാച്ചാണ് കാര്ത്തികിന്റെ പേരിലുള്ളത്. ധോണിയുടെ പേരില് 114 ക്യാച്ചും. സൂര്യകുമാര് യാദവിന്റെ ക്യാച്ച് എടുത്തതോടെയാണ് ഈ നേട്ടത്തിലേക്കെത്താന് കാര്ത്തികിനായത്. ക്രുണാല് പാണ്ഡ്യയുടെ ക്യാച്ച് കാര്ത്തിക് നഷ്പ്പെടുത്തിയിരുന്നു.
കെകെആറിനുവേണ്ടി ശുഭ്മാന് ഗില് 50 മത്സരം പൂര്ത്തിയാക്കി. ഇൗ നേട്ടത്തിലെത്തുന്ന 13ാമത്തെ താരമാണ് ശുഭ്മാന് ഗില്. കെകെആറിന്റെ സ്പിന്നര്മാരുടെ പ്രകടനമാണ് എടുത്തുപറയേണ്ടത്. കളിയിലെ താരമായ സുനില് നരെയ്ന് നാല് ഓവറില് 20 റണ്സ് വഴങ്ങി ഒരു വിക്കറ്റാണ് നേടിയത്. ഇത് 32ാം തവണയാണ് നാല് ഓവറില് 20 റണ്സില് താഴെ അദ്ദേഹം വിട്ടുകൊടുക്കുന്നത്. ഇതോടെ അശ്വിന്റെ റെക്കോഡിനൊപ്പമെത്താന് നരെയ്നായി. രോഹിത് ശര്മയുടെ വിക്കറ്റാണ് നരെയ്ന് നേടിയത്. ഐപിഎല്ലില് ഇത് ഏഴാം തവണയാണ് രോഹിതിനെ നരെയ്ന് പുറത്താക്കുന്നത്.
കെകെആര് യുവ ഓപ്പണര് ആദ്യ രണ്ട് മത്സരത്തിലൂടെത്തന്നെ തന്റെ മികവ് കാട്ടിത്തന്നു. രണ്ടാം മത്സരത്തില്ത്തന്നെ കന്നി അര്ധ സെഞ്ച്വറി വെങ്കടേഷ് അയ്യര് നേടി. നാല് ഫോറും മൂന്ന് സിക്സും ഉള്പ്പെടെ 176.66 സ്ട്രൈക്കറേറ്റിലായിരുന്നു വെങ്കടേഷ് അയ്യരുടെ ബാറ്റിങ്. ട്രന്റ് ബോള്ട്ടിനെയും ആദം മില്നെയും നേരിട്ട ആദ്യ പന്തില്ത്തന്നെ സിക്സര് പറത്തിയ വെങ്കടേഷ് ജസ്പ്രീത് ബുംറയെ ബൗണ്ടറിയോടെയാണ് വരവേറ്റത്. ഇടം കൈയന് ബാറ്റ്സ്മാനായ വെങ്കടേഷ് ഭയമില്ലാത്ത ബാറ്റിങ് ശൈലിയാണ് കാഴ്ചവെക്കുന്നത്.
കെകെആര് ടോപ് സ്കോററായ രാഹുല് ത്രിപതി ഏഴാം അര്ധ സെഞ്ച്വറിയാണ് കുറിച്ചത്. എട്ട് ഫോറും മൂന്ന് സിക്സും ഉള്പ്പെടെയായിരുന്നു അദ്ദേഹത്തിന്റെ പ്രകടനം. 176.19 എന്ന മികച്ച സ്ട്രൈക്കറേറ്റ് കാത്ത് സൂക്ഷിക്കാനും ത്രിപതിക്കായി. മുംബൈ ഇന്ത്യന്സ് സ്പിന്നര് ക്രുണാല് പാണ്ഡ്യ അവസാനം കളിച്ച നാല് ഐപിഎല് മത്സരത്തിലും നിരാശപ്പെടുത്തി. ഒരു വിക്കറ്റ് പോലും നേടാന് സ്പിന് ഓള്റൗണ്ടര്ക്കായിട്ടില്ല.