ഇഷാന് കിഷന്
മുംബൈ ഇന്ത്യന്സ് നിരയില് നിര്ണ്ണായക സ്വാധീനമുള്ള താരമാണ് ഇഷാന് കിഷന്. ആര്സിബിക്കെതിരേ ക്വിന്റന് ഡീകോക്ക് കളിക്കുന്നില്ലാത്തതിനാല് രോഹിത് ശര്മക്കൊപ്പം ഇന്നിങ്സ് ഓപ്പണ് ചെയ്യുക ഇഷാന് കിഷനാവും. ഇന്ത്യന് ടീമിലടക്കം അരങ്ങേറ്റം കുറിച്ച ഇഷാന് അവസാന ഐപിഎല്ലില് 516 റണ്സാണ് നേടിയത്. ഇത്തവണയും വളരെ പ്രതീക്ഷയോടെയാണ് ഇഷാനെ മുംബൈ കാണുന്നത്.
സച്ചിന് ബേബി
കേരള ക്രിക്കറ്റ് ടീം ക്യാപ്റ്റനും ഓള്റൗണ്ടറുമായ സച്ചിന് ബേബിയെ 20 ലക്ഷം രൂപയ്ക്കാണ് ആര്സിബി ടീമിലെടുത്തത്. പരിചയസമ്പന്നനായ സച്ചിന് 80 ടി20യില് നിന്ന് 1499 റണ്സാണ് നേടിയത്. ഇതില് 7 അര്ധ സെഞ്ച്വറിയും ഉള്പ്പെടും. ഉദ്ഘാടന മത്സരത്തില് ആര്സിബി നിരയില് സച്ചിന് അവസരം ലഭിക്കാന് സാധ്യത കുറവാണ്. എങ്കിലും ഓള്റൗണ്ട് മികവ് കൊണ്ട് ടീമിന് കരുത്തേകാന് കെല്പ്പുള്ള താരമാണ് അദ്ദേഹം.
മുഹമ്മദ് അസ്ഹറുദ്ദീന്
കേരളത്തില് നിന്നുള്ള വലം കൈ ബാറ്റ്സ്മാനെ 20 ലക്ഷം രൂപയ്ക്കാണ് ആര്സിബി സ്വന്തമാക്കിയത്. കോവിഡ് മുക്തനായെങ്കിലും ആദ്യ മത്സരം കളിക്കാന് ദേവ്ദത്ത് പടിക്കല് ഉണ്ടാകില്ല. ഈ സാഹചര്യത്തില് ഓപ്പണിങ്ങില് കോലിക്കൊപ്പം അസ്ഹറുദ്ദീന് ഇറങ്ങിയേക്കുമെന്നാണ് റിപ്പോര്ട്ടുകളുള്ളത്. സയ്യിദ് മുഷ്താഖ് അലി ട്രോഫിയില് മുംബൈക്കെതിരേ നേടിയ തകര്പ്പന് സെഞ്ച്വറിയതോടെ പ്രശസ്തനായി മാറിയ അസ്ഹറുദ്ദീന് ഇത്തവണ വലിയ പ്രതീക്ഷ നല്കുന്ന താരമാണ്.
കെയ്ല് ജാമിസന്
ആര്സിബി ഇത്തവണ ടീമിലെത്തിച്ച പേസറായ കെയ്ല് ജാമിസന്. 6.5 അടി ഉയരക്കാരനായ ജാമിസന് ബിബിഎല്ലിലടക്കം ശ്രദ്ധേയ പ്രകടനം കാഴ്ചവെച്ചിട്ടുള്ള താരമാണ്. ടെസ്റ്റ് മത്സരങ്ങളില് സജീവമായുള്ള താരം ഇത്തവണ ആര്സിബി പ്ലേയിങ് 11ല് ഉറപ്പാണ്. അതിനാല്ത്തന്നെ മുംബൈ ഇന്ത്യന്സിന് ശക്തമായ വെല്ലുവിളി ഉയര്ത്താന് കെയ്ല് ജാമിസന് സാധിച്ചേക്കും.
രാഹുല് ചഹാര്
മുംബൈ നിരയിലെ പ്രധാന സ്പിന്നറാണ് 21കാരനായ രാഹുല് ചഹാര്. അവസാന സീസണിലും മുംബൈക്കായി തിളങ്ങിയ രാഹുല് ഇത്തവണയും പ്ലേയിങ് 11ല് ഉണ്ടാവും. 15 മത്സരത്തില് നിന്ന് 15 വിക്കറ്റാണ് അവസാന സീസണില് അദ്ദേഹം വീഴ്ത്തിയത്. ഇന്ത്യയിലെ പിച്ച് സ്പിന്നിന് അനുകൂലമായതിനാല്ത്തന്നെ ഇത്തവണയും രാഹുലില് മുംബൈ പ്രതീക്ഷവെക്കുന്നു.