അശ്വിന് ക്യാപ്റ്റനാവണം
ശ്രേയസ് അയ്യരും റിഷഭ് പന്തുമല്ല മറിച്ച് ടീമിലെ പരിചയ സമ്പന്നനായ ആര് അശ്വിനായിരിക്കണം അടുത്ത സീസണില് ഡല്ഹി ക്യാപ്പിറ്റല്സിനെ നയിക്കേണ്ടതെന്നു ഗംഭീര് അഭിപ്രായപ്പെട്ടു. ഞാന് അശ്വിന്റെ വലിയൊരു ഫാനാണ്, ലോകത്തിലെ ഏറ്റവും മികച്ച സ്പിന്നര്മാരില് ഒരാളാണ് അദ്ദേഹം. ഇതു നിങ്ങള്ക്കു വിചിത്രമായി തോന്നിയേക്കാം, ഒരു പക്ഷെ ഞാന് മാത്രമായിരിക്കാം ഇങ്ങനെ ചിന്തിക്കുന്നത്. അടുത്ത വര്ഷം ഡല്ഹി ക്യാപ്പിറ്റല്സിന്റെ ക്യാപ്റ്റനായി അശ്വിനെ വരണമെന്നാണ് തന്റെ ആഗ്രഹമെന്നു ഗംഭീര് വ്യക്തമാക്കി.
ഐപിഎല്ലില് നേരത്തേ ക്യാപ്റ്റനായിട്ടുള്ള താരം കൂടിയാണ് അശ്വിന്. 2018, 18 സീസണുകളില് പഞ്ചാബ് കിങ്സിന്റെ (കിങ്സ് ഇലവന് പഞ്ചാബ്) നായകനായിരുന്നു അദ്ദേഹം.
അശ്വിനെ ടീമിലെടുക്കില്ലെന്നു മഞ്ജരേക്കര്
ഗൗതം ഗംഭീര് അശ്വിനെ ഡല്ഹി ക്യാപ്പിറ്റല്സ് ക്യാപ്റ്റനാക്കണമെന്നു ആവശ്യപ്പെടുമ്പോള് തീര്ത്തും വ്യത്യസ്തമായ അഭിപ്രായമാണ് മറ്റൊരു മുന് താരവും കമന്റേറ്ററുമായ സഞ്ജയ് മഞ്ജരേക്കര്ക്കുള്ളത്. തന്റെ ടി20 ടീമില് ഒരിക്കലും അശ്വിനെ ഉള്പ്പെടുത്തുക പോലും ചെയ്യില്ലെന്നു അദ്ദേഹം തുറന്നടിച്ചു.
അശ്വിനെക്കുറിച്ച് നമ്മള് ഒരുപാട് സംസാരിച്ചുകൊണ്ടിരിക്കുകയാണ്. ഒരു ടി20 ബൗളറെന്ന നിലയില് ഒരു ടീമിലും വലിയ ഇംപാക്ചുണ്ടാക്കുന്ന ബൗളറല്ല അദ്ദേഹം. അശ്വിന് മാറണമെന്നു നിങ്ങള് ആഗ്രഹിക്കുന്നുണ്ടെങ്കില് അതു നടക്കാനും പോവുന്നില്ല. കാരണം കഴിഞ്ഞ അഞ്ച്-ഏഴു വര്ഷമായി അദ്ദേഹം ഇങ്ങനെ തന്നെയാണ് ബൗള് ചെയ്തു കൊണ്ടിരിക്കുന്നതെന്നും മഞ്ജരേക്കര് വിലയിരുത്തി.
വിക്കറ്റെടുക്കുന്ന ബൗളറല്ല
ടി20 ഫോര്മാറ്റിനു ആവശ്യം റണ്സ് വങ്ങാതിരിക്കുന്ന ബൗളറെയല്ല, മറിച്ച് വിക്കറ്റെടുക്കാന് ശേഷിയുള്ള ബൗളറെയാണെന്നും മഞ്ജരേക്കര് ചൂണ്ടിക്കാട്ടി. കളിഞ്ഞ അഞ്ചു വര്ഷങ്ങളായി താന് ഒരേപോലെ തന്നെയാണ് ബൗള് ചെയ്തു കൊണ്ടിരിക്കുന്നതെന്നു നമുക്ക് അശ്വിന് കാണിച്ചു തന്നിരിക്കുകയാണ്. അശ്വിനെപ്പോലെയൊരു ബൗളറെ ഞാനൊരിക്കലും എന്റെ ടി20 ടീമില് കളിപ്പിക്കില്ല. ടേണിങ് വിക്കറ്റുകളാണ് എനിക്കു ലഭിക്കുന്നതെങ്കില് വരുണ് ചക്രവര്ത്തിയോ സുനില് നരെയ്നോ യുസ്വേന്ദ്ര ചഹലോ പോലെയുള്ള ബൗളര്മാരെയാണ് ഞാന് കളിപ്പിക്കുക. ഇവരാണ് നിങ്ങള്ക്കു വിക്കറ്റ് നേടിത്തരുകയെന്നും മഞ്ജരേക്കര് നിരീക്ഷിച്ചു.
അശ്വിന്റെ പ്രകടനം
ഈ സീസണിലെ ഐപിഎല്ലില് ഡല്ഹി ക്യാപ്പിറ്റല്സിനു വേണ്ട അത്ര മികച്ച പ്രകടനമായിരുന്നില്ല അശ്വിന്റേത്. അതുകൊണ്ടു തന്നെ അടുത്ത സീസണില് അദ്ദേഹത്തെ ഡിസി നിലനിര്ത്താനുള്ള സാധ്യതയും കുറവാണ്. 13 മല്സരങ്ങളില് നിന്നും 47 എന്ന മോശം ശരാശരിയില് ഏഴു വിക്കറ്റുകള് മാത്രമാണ് അശ്വിനു ലഭിച്ചത്. ഐസിസിയുടെ ടി20 ലോകകപ്പിനുള്ള ഇന്ത്യയുടെ 15 അംഗ ടീമിലും അദ്ദേഹം ഉള്പ്പെട്ടിട്ടുണ്ട്. ലോകകപ്പ് സംഘത്തിലെ ഏറ്റവും വലിയ സര്പ്രൈസും അശ്വിന്റെ മടങ്ങിവരവായിരുന്നു.