രവീന്ദ്ര ജഡേജയുടെ ഫീല്ഡിങ്
പഞ്ചാബ് കിങ്സ് 106 റണ്സിലേക്കൊതുങ്ങിയതിന് പ്രധാന കാരണം രവീന്ദ്ര ജഡേജയാണ്. അദ്ദേഹത്തിന്റെ തകര്പ്പന് ഫീല്ഡിങ്ങാണ് പഞ്ചാബിന്റെ നട്ടെല്ലായ ക്രിസ് ഗെയ്ലിനെയും കെ എല് രാഹുലിനെയും ഗാലറിയിലേക്ക് മടക്കിയത്. കെ എല് രാഹുലിനെ തകര്പ്പന് ത്രോയിലൂടെയാണ് ജഡേജ പുറത്താക്കിയത്. ക്രിസ് ഗെയ്ല് ഓഫ് സൈഡിലേക്ക് കളിച്ച പന്തില് സിംഗില് സാഹസമായിരുന്നെങ്കിലും ശ്രമത്തിന് മുതിര്ന്ന രാഹുലിനെ ജഡേജ മടക്കി അയച്ചു. ദീപക് ചഹാറിന്റെ പന്തില് ക്രിസ് ഗെയ്ല് പുറത്തായതും ജഡേജയുടെ തകര്പ്പന് ക്യാച്ചിലാണ്. പഞ്ചാബിന്റെ ഷാരൂഖ് ഖാന്റെയും ക്യാച്ചെടുത്തത് ജഡേജയായിരുന്നു. നിരവധി റണ്ണുകളും ജഡേജ തകര്പ്പന് ഫീല്ഡിങ്ങിലൂടെ സേവ് ചെയ്തു.
ദീപക് ചഹാറിന്റെ മാസ്മരിക ബൗളിങ്
ആദ്യ മത്സരത്തില് തല്ലുവാങ്ങിക്കൂട്ടിയ ദീപക് ചഹാര് രണ്ടാം മത്സരത്തില് ശക്തമായ തിരിച്ചുവരവാണ് നടത്തിയിരിക്കുന്നത്. പഞ്ചാബിന്റെ ടോപ് ഓഡറിന്റെ നടുവൊടിക്കാന് ദീപക് ചഹാറിനായി. മായങ്ക് അഗര്വാള്,ക്രിസ് ഗെയ്ല്,ദീപക് ഹൂഡ,നിക്കോളാസ് പുരാന് എന്നിവരുടെ വിക്കറ്റാണ് ദീപക് വീഴ്ത്തിയത്. നാല് ഓവറില് വെറും 13 റണ്സ് മാത്രം വഴങ്ങിയാണ് ദീപകിന്റെ നാല് വിക്കറ്റ് പ്രകടനം. അതില് ഒരു മെയ്ഡന് ഓവറും ഉള്പ്പെടും. ഒരു വൈഡ് മാത്രമാണ് അദ്ദേഹം എറിഞ്ഞത്. മത്സരത്തില് സിഎസ്കെയ്ക്ക് മുന്തൂക്കം നേടിക്കൊടുത്ത പ്രകടനമായിരുന്നു ഇത്.
മോയിന് അലിയുടെ ഓള്റൗണ്ട് മികവ്
മോയിന് അലിയുടെ പ്രകടനം സിഎസ്കെ നിരയില് നിര്ണ്ണായകമായിരുന്നു. പന്തെടുത്ത് ഷാരൂഖ് ഖാന്- ജൈ റിച്ചാര്ഡ്സന് കൂട്ടുകെട്ട് പൊളിച്ച മോയിന് അലി സമ്മര്ദ്ദത്തിലേക്ക് ടീമിനെ എത്തിക്കാതെ വെടിക്കെട്ട് ബാറ്റിങ്ങും കാഴ്ചവെച്ചു. 31 പന്തില് 7 ഫോറും 1 സിക്സും ഉള്പ്പെടെ 46 റണ്സാണ് അദ്ദേഹം നേടിയത്. ബൗണ്ടറി ലൈനില് മികച്ച ഫീല്ഡിങ് പ്രകടനവും അദ്ദേഹം നടത്തി. സിഎസ്കെയെ സംബന്ധിച്ച് ടീമിന്റെ നിര്ണ്ണായക താരമായി മോയിന് അലി മാറിക്കഴിഞ്ഞു. കോടികള് മുടക്കി സ്വന്തമാക്കിയ കൃഷ്ണപ്പ ഗൗതത്തിനെ പുറത്തിരുത്തിയാണ് അലിയെ സിഎസ്കെ പരിഗണിക്കുന്നത്.