പവര്പ്ലേയില് വിക്കറ്റ് വീഴ്ത്താനായില്ല
മുംബൈ ഇന്ത്യന്സിന്റെ ഓപ്പണിങ് കൂട്ടുകെട്ട് പൊളിക്കാന് വൈകിയത് സിഎസ്കെയ്ക്ക് തിരിച്ചടിയായി. രോഹിത് ശര്മയും (35) ക്വിന്റന് ഡീകോക്കും (38) ചേര്ന്ന് ഒന്നാം വിക്കറ്റില് 71 റണ്സ് കൂട്ടുകെട്ടാണുണ്ടാക്കിയത്. ഇത് ടീമിന് അടിത്തറയേകി. ന്യൂബോളില് മികവ് കാട്ടാറുള്ള ദീപക് ചഹാറിന് വിക്കറ്റ് നേടാന് സാധിക്കാത്തത് ടീമിനെ ബാധിച്ചു. പവര്പ്ലേയില് സിഎസ്കെയെക്കാള് മികച്ച പ്രകടനം നടത്തിയത് മുംബൈ ഇന്ത്യന്സായിരുന്നു. പവര്പ്ലേയില് ശര്ദുല് ഠാക്കൂറിന് ധോണി ഓവര് നല്കിയിരുന്നില്ല. എട്ടാം ഓവര് എറിയാനെത്തിയ ശര്ദുലാണ് രോഹിതിനെ മടക്കി മുംബൈയുടെ ഓപ്പണിങ് കൂട്ടുകെട്ട് പൊളിച്ചത്.
ജഡേജയുടെ ഓവറില് മുംബൈയുടെ തിരിച്ചുവരവ്
ചെറിയ ഇടവേളയില് മൂന്ന് വിക്കറ്റ് നഷ്ടമായതോടെ മുംബൈ ഇന്ത്യന്സ് സമ്മര്ദ്ദത്തിലായിരുന്നു. എന്നാല് ശക്തമായി മുംബൈ തിരിച്ചുവരവ് നടത്തിയത് രവീന്ദ്ര ജഡേജ എറിഞ്ഞ 13ാം ഓവറിലാണ്. മൂന്ന് സിക്സടക്കം 20 റണ്സാണ് പൊള്ളാര്ഡ് ജഡേജയുടെ ഓവറില് നേടിയത്. അത് മത്സരഗതിയെ മാറ്റി മറിച്ചു. ലൂങ്കി എന്ഗിഡി എറിഞ്ഞ 14ാം ഓവറില് 16 റണ്സും 15ാം ഓവര് എറിഞ്ഞ ശര്ദുല് ഠാക്കൂറിന്റെ ഓവറില് 23 റണ്സും മുംബൈ നേടി. ജഡേജയുടെ ഓവറിലാണ് കീറോണ് പൊള്ളാര്ഡ് ഫോമിലേക്കെത്തിയതെന്ന് പറയാം.
ഡുപ്ലെസിസ് കൈവിട്ട ക്യാച്ച്
18ാം ഓവര് എറിഞ്ഞ ശര്ദുല് ഠാക്കൂറിന്റെ ഓവറിലെ നാലാം പന്തില് ഫഫ് ഡുപ്ലെസിസ് ലോങ് ഓണില് കീറോണ് പൊള്ളാര്ഡിനെ വിട്ടുകളഞ്ഞത് മത്സരത്തിന്റെ വഴിത്തിരിവായി. നിര്ണ്ണായക സമയത്ത് ആ ക്യാച്ച് നേടിയിരുന്നെങ്കില് ജയം സിഎസ്കെയ്ക്ക് ഏറെക്കുറെ ഉറപ്പിക്കാമായിരുന്നു. എന്നാല് അനായാസമായ ക്യാച്ച് ഡുപ്ലെസിസിനെപ്പോലൊരു സൂപ്പര് താരം വിട്ടുകളഞ്ഞത് സിഎസ്കെയ്ക്ക് ജയമാണ് നഷ്ടപ്പെടുത്തിയത്. പൊള്ളാര്ഡിന്റെ ക്യാച്ച് നഷ്ടപ്പെടുത്തിയതാണ് തോല്വിക്ക് കാരണമെന്ന് മത്സരശേഷം എംഎസ് ധോണി തന്നെ വ്യക്തമാക്കിയിരുന്നു.