Click it and Unblock the Notifications
മത്സരത്തില് രോഹിത്തിന് അര്ധ സെഞ്ച്വറിയുണ്ട്. ക്വിന്റണ് ഡികോക്കിനൊപ്പം ഓപ്പണറായി എത്തിയ രോഹിത് 51 പന്തില് 68 റണ്സടിച്ചു. നാലു സിക്സും അഞ്ച് ഫോറും ഹിറ്റ്മാന്റെ ഇന്നിങ്സിലുണ്ട്. ആന്റിച്ച് നോര്ക്കിയയുടെ 17 ആം ഓവറില് രോഹിത് പുറത്താവുമ്പോഴേക്കും ജയത്തിന് തൊട്ടരികെ മുംബൈ ഇന്ത്യന്സ് എത്തിയിരുന്നു. ഇതേസമയം, ഫൈനലില് അര്ധ സെഞ്ച്വറി തികയ്ക്കാന് സാധിച്ചതില് ടീമിലെ സഹതാരം സൂര്യകുമാര് യാദവിനോട് രോഹിത് ശര്മ കടപ്പെടുന്നുണ്ട്.
സ്കോര്ബോര്ഡ് അനായാസം മുന്നോട്ടുപോകവെ അനാവശ്യ റണ്ണിനായി ഓടിയ രോഹിത് ശര്മ സൂര്യകുമാര് യാദവിനെ പുറത്താക്കുകയാണ് ചെയ്തത്. രവിചന്ദ്രന് അശ്വിന് എറിഞ്ഞ 11 ആം ഓവറിലാണ് ഈ സംഭവം. ഓവറിലെ അഞ്ചാം പന്തിനെ ബാക്ക് ഫൂട്ടില് നിന്നുകൊണ്ട് രോഹിത് എക്സ്ട്രാ കവറിലേക്ക് പതിയെ ഡ്രൈവ് ചെയ്യുന്നു. പന്ത് നേരെ ചെല്ലുന്നത് പ്രവീണ് ദൂബെയുടെ കൈകളിലേക്ക്. സിംഗിളിനുള്ള സാവകാശം എങ്ങുമില്ല. എന്നാല് ഡ്രൈവ് ചെയ്തതിന് പിന്നാലെ മനസില് പാതി സംശയവുമായി രോഹിത് ഓടി.
ഈ സമയം, 33 പന്തില് 47 റണ്സെടുത്ത് നില്ക്കുകയാണ് മുംബൈ നായകന്. മൂന്നു റണ്സ് അകലെ അര്ധ സെഞ്ച്വറി. രോഹിത്തിന്റെ സാന്നിധ്യം മുംബൈയ്ക്ക് ഏറെ അനിവാര്യം. മറുപുറത്ത് നിന്ന് സൂര്യകുമാര് ഉറക്കെ വിലക്കിനോക്കി, ഓടരുതെന്ന്. പക്ഷെ മുന്നറിയിപ്പൊന്നും രോഹിത് ഗൗനിച്ചില്ല. റിഷഭ് പന്തിലേക്ക് ത്രോ വരുന്നത് കണ്ട സൂര്യകുമാര് യാദവ് ഒടുവില് രോഹിത്തിന് വേണ്ടി സ്വയം ബലിയാടാകാന് തീരുമാനിച്ചു. റണ്ണൗട്ടാകുമെന്ന് അറിഞ്ഞുകൊണ്ടുതന്നെ ഇദ്ദേഹം ക്രീസ് വിട്ടിറങ്ങി ഹിറ്റ്മാനെ സുരക്ഷിതനാക്കി.
തന്റെ പിഴവില് സൂര്യകുമാര് യാദവ് പുറത്താകുന്നത് വളരെ നിരാശയോടെയാണ് രോഹിത് ശര്മ കണ്ടുനിന്നത്.
ഇതേസമയം, സൂര്യകുമാര് യാദവിന്റെ നിസ്വാര്ത്ഥമായ പ്രവൃത്തിയെ മുംബൈ ക്യാംപ് നിറകയ്യടികളോടെ എതിരേറ്റു. 20 പന്തില് 19 റണ്സുമായാണ് സൂര്യകുമാര് തിരിച്ചെത്തിയത്. അഞ്ചാം ഓവറില് ഡികോക്ക് പുറത്തായ ശേഷം ക്രീസിലെത്തിയ ഇദ്ദേഹം ഫോമിലുള്ള രോഹിത്തിന് സ്ട്രൈക്ക് കൈമാറാനാണ് പരമാവധി ശ്രദ്ധിച്ചതും.
എന്തായാലും മത്സരശേഷം സംഭവത്തില് വലിയ നിരാശയുണ്ടെന്ന് രോഹിത് ശര്മ തുറന്നുസമ്മതിച്ചു. സൂര്യകുമാറിന് പകരം താനായിരുന്നു വിക്കറ്റ് ത്യജിക്കേണ്ടിയിരുന്നത്. കാരണം സീസണില് മികച്ച ഫോമിലാണ് സൂര്യകുമാര്. ടൂര്ണമെന്റിലുടനീളം മുംബൈയെ പലതവണ സൂര്യകുമാര് രക്ഷിച്ചിട്ടുണ്ട്. അദ്ദേഹത്തിന്റെ ബാറ്റിങ് മികവില് ആര്ക്കും സംശയമില്ല, രോഹിത് ശര്മ വ്യക്തമാക്കി. സീസണില് 480 റണ്സാണ് സൂര്യകുമാര് യാദവ് മുംബൈക്കായി നേടിയത്.
Continue with Google