മികച്ച തുടക്കം
പൃഥ്വി ഷായും ശിഖര് ധവാനും ചേര്ന്ന് മികച്ച തുടക്കമാണ് ഡല്ഹിക്കു നല്കിയത്. ഓപ്പണിങ് വിക്കറ്റില് 94 റണ്സ് കൂട്ടിച്ചേര്ക്കാന് ഈ സഖ്യത്തിനു കഴിഞ്ഞു. 2016നു ശേഷം ഐപിഎല്ലില് ഡല്ഹിയുടെ ഏറ്റവും മികച്ച ഓപ്പണിങ് കൂട്ടുകെട്ട് കൂടിയാണിത്.പൃഥ്വിയായിരുന്നു കൂടുതല് അപകടകാരി. ദീപക് ചഹറിന്റെ ഇന്നിങ്സിലെ ആദ്യ ഓവറിലെ മൂന്നാമത്തെ പന്ത് തന്നെ ബൗണ്ടറിയിലേക്കു പറത്തി പൃഥ്വി തന്റെ ഉദ്ദേശം വ്യക്തമാക്കിയിരുന്നു. കവറിലൂടെ വെടിയുണ്ട കണക്കെയായിരുന്നു പൃഥ്വിയുടെ ബാറ്റില് നിന്നും പന്ത് ബൗണ്ടറി ലൈന് കടന്നത്.തൊട്ടടുത്ത പന്തിലും മറ്റൊരു മനോഹരമായ ഷോട്ട്. അതും ഫലം ഒന്നുതന്നെ.
പിയൂഷ് ചൗള, രവീന്ദ്ര ജഡേജ , സാം കറെന് തുടങ്ങി ബൗള് ചെയ്തവരെല്ലാം പൃഥ്വിയുടെ ബാറ്റിന്റെ ചൂടറിഞ്ഞു. 11ാം ഓവറിലെ നാലാമത്തെ പന്തില് ചൗളയാണ് സിഎസ്കെയ്ക്കു ആദ്യ ബ്രേക്ക്ത്രൂ നല്കിയത്. ധവാനായിരുന്നു ഇര. റിവേഴ്സ് സ്വീപ്പിനു ശ്രമിച്ച ധവാന് ടൈമിങ് പിഴച്ചപ്പോള് നേരെ പതിച്ചത് പാഡുകളിലായിരുന്നു. 27 പന്തില് മൂന്നു ബൗണ്ടറികളും ഒരു സിക്സറുമടക്കം 35 റണ്സാണ് ധവാന് നേടിയത്.
പൃഥ്വിയും വീണു
ഫിഫ്റ്റി തികച്ച് മികച്ച ഫോമില് മുന്നേറുകയായിരുന്ന പൃഥ്വിയായിരുന്നു രണ്ടാമതായി ക്രീസ് വിട്ടത്. അമിതാവേശം താരത്തിനു വിനയാവുകയായിരുന്നു. ചൗള തന്നെയായിരുന്നു ഈ വിക്കറ്റുമെടുത്തത്. ക്രീസില് നിന്നും പുറത്തേക്കു ചാടിയിറങ്ങി വമ്പന് ഷോട്ടിനു ശ്രമിച്ച പൃഥ്വിയുടെ കണക്കുകൂട്ടലുകള് തെറ്റി.
ബാറ്റിന് അരികില് തട്ടി പിന്നിലേക്കു വീണ പന്ത് ധോണി അസാമാന്യ മെയ്വഴക്കത്തോടെ സ്റ്റംപിലേക്ക് കൊള്ളിക്കുമ്പോള് പൃഥ്വി ക്രീസീനു പുറത്തു തന്നെയായിരുന്നു.
ശ്രേയസ്- പന്ത് കൂട്ടുകെട്ട്
മൂന്നാം വിക്കറ്റില് ശ്രേയസ്- റിഷഭ് പന്തും ചേര്ന്ന് അര്ധസെഞ്ച്വറി കൂട്ടുകെട്ടുണ്ടാക്കിയതോടെ ഡല്ഹിയുടെ നില ഭദ്രമായി. 58 റണ്സാണ് ടീം സ്കോറിലേക്കു ഇരുവരും കൂട്ടിച്ചേര്ത്തത്. 19ാം ഓവറിലെ അവസാന പന്തിലായിരുന്നു ശ്രേയസ് മടങ്ങിയത്. സാം കറെന്റെ ഓഫ് സ്റ്റംപിന് പുറത്തേക്കു പോയ പന്ത് ശ്രേയസിന്റെ ബാറ്റിന് അരികില് തട്ടിത്തെറിച്ചപ്പോള് വലതു വശത്തേക്കു മുഴുനീളെ ഡൈവ് ചെയ്ത് ധോണി പിടിയിലൊതുക്കുകയായിരുന്നു. 25 ബോളില് അഞ്ചു ബൗണ്ടറികളോടെ 35 റണ്സുമായി റിഷഭ് പന്തും അഞ്ചു റണ്ണുമായി മാര്ക്കസ് സ്റ്റോയ്ണിസും പുറത്താവാത നിന്നു.
പ്ലെയിങ് ഇലവന്
കഴിഞ്ഞ മല്സരത്തിലെ ടീമില് ഒരു മാറ്റവുമായാണ് സിഎസ്കെ ഇറങ്ങിയത്. ദക്ഷിണാഫ്രിക്കന് പേസര് ലുംഗി എന്ഗിഡിക്കു പകരം ഓസ്ട്രേലിയന് പേസര് ജോഷ് ഹേസല്വുഡ് കളിച്ചു. ഡല്ഹി ടീമില് രണ്ടു മാറ്റങ്ങള് വരുത്തി. ആര് അശ്വിനു പകരം അമിത് മിശ്രയും മോഹിത് ശര്മയ്ക്കു പകരം ആന്റിച്ച് നോര്ട്ടെയും ടീമിലെത്തി.
ചെന്നൈ സൂപ്പര് കിങ്സ്- മുരളി വിജയ്, ഷെയ്ന് വാട്സന്, ഫാഫ് ഡുപ്ലെസി, സാം കറെന്, റുതുരാജ് ഗെയ്ക്വാദ്, കേദാര് ജാദവ്, എംഎസ് ധോണി (ക്യാപ്റ്റന്), രവീന്ദ്ര ജഡേജ, ജോഷ് ഹേസല്വുഡ്, ദീപക് ചഹര്, പിയൂഷ് ചൗള.
ഡല്ഹി ക്യാപ്പിറ്റല്സ്- പൃഥ്വി ഷാ, ശിഖര് ധവാന്, ഷിംറോണ് ഹെറ്റ്മെയര്, ശ്രേയസ് അയ്യര് (ക്യാപ്റ്റന്), റിഷഭ് പന്ത്, മാര്ക്കസ് സ്റ്റോയ്ണിസ്, അക്ഷര് പട്ടേല്, കാഗിസോ റബാദ, അമിത് മിശ്ര, ആന്റിച്ച് നോര്ട്ടെ, ആവേശ് ഖാന്.