സുരേഷ് റെയ്നയെ പിന്തള്ളി
ദക്ഷിണാഫ്രിക്കയ്ക്കെതിരേ രണ്ടു സിക്സറുകള് പറത്തിയാണ് രോഹിത് 12 റണ്സെടുത്തത്. ഇതോടെയാണ് ദക്ഷിണാഫ്രിക്കയ്ക്കെതിരേ കൂടുതല് സിക്സറുകള് നേടിയ ഇന്ത്യന് താരമെന്ന റെക്കോര്ഡിന് ഹിറ്റ്മാന് അവകാശിയായത്.
ടി20യില് ദക്ഷിണാഫ്രിക്കയ്ക്കെതിരേ 14 സിക്സറുകള് ഇപ്പോള് രോഹിത്തിന്റെ അക്കൗണ്ടിലുണ്ട്. 13 സിക്സറുകള് നേടിയ മുന് ഓള്റൗണ്ടര് സുരേഷ് റെയ്നയെയാണ് അദ്ദേഹം മറികടന്നത്.
വിക്കറ്റിനു മുന്നില് കുരുങ്ങി
12 പന്തില് നിന്നും രണ്ടു സിക്സറുകളോടെയാണ് രോഹിത് 12 റണ്സെടുത്തത്. മികച്ച ഫോമിലാണെന്നതിന്റെ സൂചനകള് നല്കിയ അദ്ദേഹം വലിയ സ്കോറിലേക്കു ബാറ്റ് വീശവെയാണ് പുറത്താവുന്നത്. ആന്ഡില് ഫെലുക്വാവോയുടെ ബൗളിങില് ഷോട്ടിനു ശ്രമിച്ച രോഹിത്തിനു പിഴച്ചു. വിക്കറ്റിനു മുന്നില് കുരുങ്ങി ഹിറ്റ്മാന് ക്രീസ് വിടുകയായിരുന്നു.
ലോകകപ്പില് കസറി
ഇംഗ്ലണ്ടില് സമാപിച്ച കഴിഞ്ഞ ഏകദിനത്തില് ഗംഭീര പ്രകടനമാണ് രോഹിത് കാഴ്ചവച്ചത്. അഞ്ചു സെഞ്ച്വറികളടക്കം 648 റണ്സാണ് താരം ടൂര്ണമെന്റില് വാരിക്കൂട്ടിയത്. ഇതോടെ ലോകകപ്പ് ചരിത്രത്തില് തന്നെ ഒരു എഡിഷനില് കൂടുതല് സെഞ്ച്വറികള് നേടിയ താരമെന്ന റെക്കോര്ഡും ഹിറ്റ്മാന് തന്റെ പേരില് കുറിച്ചിരുന്നു. ഇന്ത്യയെ പോയിന്റ് പട്ടികയില് ഒന്നാംസ്ഥാനക്കാരാക്കി ലോകകപ്പിന്റെ സെമി ഫൈനലിലെത്തിച്ചതില് ചുക്കാന് പിടിച്ചതും രോഹിത്തായിരുന്നു.