ലോകകപ്പ്: ധവാനില്ല, ഭുവിക്കും പരിക്ക്... ഇന്ത്യക്ക് കാലിടറുമോ? ഗാംഗുലി പറയുന്നു

ഇന്ത്യ സെമിയിലെത്തും

ധവാന്റെ പിന്‍മാറ്റവും ഭുവനേശ്വറിന്റെ പരിക്കുമൊന്നും ലോകകപ്പില്‍ ഇന്ത്യക്കു അത്ര വലിയ തിരിച്ചടിയാവില്ലെന്ന് ഗാംഗുലി ചൂണ്ടിക്കാട്ടി. കൈവിരലിനേറ്റ പരിക്കു കാരണമാണ് ധവാന്‍ നാട്ടിലേക്കു മടങ്ങുന്നത്. കണംകാലിനു പരിക്കേറ്റ ഭുവിക്കു അടുത്ത രണ്ടോ, മൂന്നോ മല്‍സരങ്ങളില്‍ പുറത്തിരിക്കേണ്ടി വരികയും ചെയ്യും.
ധവാന്റെ അഭാവത്തിലും ഭുവി കുറച്ച് ഓവര്‍ മാത്രം ബൗള്‍ ചെയ്തിട്ടും പാകിസ്താനെതിരേ ആധികാരിക ജയമാണ് ഇന്ത്യ നേടിയത്. ടീം മികച്ച ഫോമില്‍ തന്നെയാണ്. ധവാന് എത്രയും വേഗം പരിക്ക് ഭേദവമാവട്ടെയെന്നു ആഗ്രഹിക്കുന്നതായും ഗാംഗുലി പറഞ്ഞു.

പരിക്ക് നിയന്ത്രിക്കാനാവില്ല

പരിക്ക് കളിയുടെ ഭാഗം തന്നെയാണ്. അതിനെ നിയന്ത്രിക്കാന്‍ ആര്‍ക്കും സാധിക്കില്ലെന്ന് ഗാംഗുലി അഭിപ്രായപ്പെട്ടു. ടീമിലെ മറ്റുള്ളവര്‍ നല്ല പ്രകടനം നടത്തുമെന്ന് തന്നെയാണ് വിശ്വസിക്കുന്നത്.
ഭുവിയുടെ അഭാവത്തില്‍ പാകിസ്താനെതിരായ കളിയില്‍ വിജയ് ശങ്കര്‍ ബൗളിങില്‍ മികച്ച പ്രകടനമാണ് പുറത്തെടുത്തത്. ഈ ഇന്ത്യന്‍ ടീം വളരെ മികച്ചതാണ്. അതുകൊണ്ടു തന്നെ സെമി ഫൈനലില്‍ തീര്‍ച്ചയായും ഇന്ത്യയുണ്ടാവുമെന്നും ദാദ വിശദമാക്കി.

ഇന്ത്യ മാത്രമല്ല

ലോകകപ്പിലെ ഇതുവരെയുള്ള ടീമുകളുടെ പ്രകടനം വിലയിരുത്തിയാല്‍ ഇന്ത്യയാണ് ഏറ്റവും മികച്ചു നില്‍ക്കുന്നതെന്നു ദാദ പറഞ്ഞു. വിരാട് കോലിക്കു കീഴില്‍ ഗംഭീരമായാണ് ഇന്ത്യ കളിച്ചു കൊണ്ടിരിക്കുന്നത്. ഇന്ത്യയെക്കൂടാതെ ആകര്‍ഷിച്ച രണ്ടു ടീമുകള്‍ നിലവിലെ ചാംപ്യന്‍മാരായ ഓസ്‌ട്രേലിയയും ആതിഥേയരായ ഇംഗ്ലണ്ടുമാണെന്നും അദ്ദേഹം കൂട്ടിച്ചേര്‍ത്തു.
ഇന്ത്യയുടെ അടുത്ത മല്‍സരം പോയിന്റ് പട്ടികയില്‍ അവസാനസ്ഥാനത്തു നില്‍ക്കുന്ന അഫ്ഗാനിസ്താനെതിരേയാണ്. ശനിയാഴ്ചയാണ് ഇന്ത്യയും അഫ്ഗാനും നേര്‍ക്കുനേര്‍ വരുന്നത്.