Click it and Unblock the Notifications
കരുത്തോടെ മുംബൈ
നിലവിലെ ഒന്നാം സ്ഥാനക്കാരായ ചെന്നൈ സൂപ്പര്‍ കിങ്‌സിനെയടക്കം മുട്ടുകുത്തിച്ച മുംബൈ നിര സംതുലിതമായ ടീമാണ്. ബാറ്റിങ്ങില്‍ പിഴച്ചാല്‍ ബൗളിങ്ങില്‍ തിരിച്ചുപിടിക്കാനുള്ള താരസമ്പത്ത് അവര്‍ക്കുണ്ട്. ബാറ്റിങ് നിരയിലേക്ക് രോഹിത് ശര്‍മ മടങ്ങിയെത്തുന്നത് ടീമിന് കരുത്താകും. ക്വിന്റന്‍ ഡീ കോക്ക് ഓപ്പണിങ്ങില്‍ മിടുക്കുകാട്ടുന്നു. സൂര്യകുമാര്‍ യാദവും തരക്കേടില്ലാതെ കളിക്കുന്നു. നാലാം നമ്പറില്‍ യുവരാജ് സിങ്ങിന് പകരമെത്തിയ ഇഷാന് കിഷന് കാര്യമായൊന്നും സംഭാവന ചെയ്യാനായിട്ടില്ല. മധ്യനിരയിലെ പാണ്ഡ്യ സഹോദരങ്ങളുടെ പ്രകടനം മുംബൈക്ക് അടിത്തറപാകും. ഹര്‍ദിക് കൂറ്റന്‍ ഷോട്ടുകളുമായി അതിവേഗം റണ്‍സുയര്‍ത്താന്‍ മിടുക്കനാണ്. പഞ്ചാബിനെതിരേ വെടിക്കെട്ട് അര്‍ധ സെഞ്ച്വറിയുമായി മുംബൈയുടെ വിജയശില്‍പ്പിയായി മാറിയ കീറോണ്‍ പൊള്ളാര്‍ഡും മുംബൈയുടെ സാധ്യതകളെ സജീവമാക്കുന്നു.
ജസ്പ്രീത് ബൂംറയുടെ ബൗളിങ്ങാണ് മുംബൈയുടെ വജ്രായുധം. ബെഹറന്‍ഡോര്‍ഫിന് പകരം ലസിത് മലിംഗ മുംബൈ നിരയില്‍ ഇന്ന് കളിക്കുമെന്നാണ് റിപ്പോര്‍ട്ടുകളുള്ളത്. മലിംഗകൂടിയെത്തുന്നതോടെ മുംബൈയുടെ പേസ് നിര എതിരാളികള്‍ക്ക് കടുത്ത ഭീഷണിയാവും. യുവ പേസര്‍ അല്‍സാരി ജോസഫും സ്പിന്‍ ബൗളിങ്ങില്‍ രാഹുല്‍ ചഹാറും ടീമില്‍ സ്ഥാനം നിലനിര്‍ത്തിയേക്കും.
ബാറ്റിങ്ങില്‍ പഴിപറഞ്ഞ് രാജസ്ഥാന്
എടുത്തുപറയാന്‍ ടീമില്‍ ബാറ്റ്‌സ്മാന്‍മാരുണ്ടെങ്കിലും ഒരാള്‍ക്കും സ്ഥിരതയില്ല. അവസാന സീസണില്‍ രാജസ്ഥാനുവേണ്ടി തകര്‍ത്തടിച്ച ജോസ് ബട്‌ലര്‍ ഈ സീസണില്‍ നിരാശപ്പെടുത്തി. കൂറ്റന്‍ ഷോട്ടുകള്‍ കളിച്ച് തുടങ്ങുമെങ്കിലും ക്രീസില്‍ പിടിച്ചുനില്‍ക്കാനാകുന്നില്ല.രഹാനെ ഓപ്പണിങ്ങില്‍ തുടര്‍ പരാജയമാവുകയാണ്. സഞ്ജു സാംസണ്‍,സ്റ്റീവ് സ്മിത്ത്,രാഹുല്‍ ത്രിപാതി എന്നിവരെല്ലാം ബാറ്റിങ്ങില്‍ ദുരന്തമാവുകയാണ്. ഇംഗ്ലണ്ടിന്റെ വെടിക്കെട്ട് ഓള്‍റൗണ്ടര്‍ ബെന്‍സ്‌റ്റോക്‌സ് പ്രതീക്ഷിച്ചതിന്റെ നാലിലൊന്ന് നിലവാരം പോലും കാട്ടുന്നില്ല. ചെന്നൈയ്ക്ക് അവസാന ഓവറില്‍ 18 റണ്‍സ് വിജയിക്കാന്‍ വേണ്ടിയിരുന്നെങ്കിലും സ്‌റ്റോക്‌സിനത് പ്രതിരോധിക്കാനായില്ല. ബൗളിങ്ങില്‍ ജോഫ്ര ആര്‍ച്ചര്‍,ശ്രേയസ് ഗോപാല്‍ എന്നിവര്‍ തരക്കേടില്ലെങ്കിലും മറ്റുള്ളവരെല്ലാം നിരാശപ്പെടുത്തുന്നു.
കണക്കില്‍ മുംബൈ മുന്നില്‍
ഇതുവരെ 19 തവണ നേര്‍ക്കുനേര്‍ ഏറ്റുമുട്ടിയപ്പോള്‍ 10 തവണയും ജയം മുംബൈയ്ക്കായിരുന്നു. എട്ട് തവണ രാജസ്ഥാനും ജയിച്ചപ്പോള്‍ ഒരു മത്സരം ഫലമില്ലാതെ അവസാനിച്ചു.
