കൂടുതല് സെഞ്ച്വറികള്
ലോകകപ്പില് ഏറ്റവും കൂടുതല് സെഞ്ച്വറികള് നേടിയ താരമെന്ന ലോക റെക്കോര്ഡ് നിലവില് സച്ചിനൊപ്പം പങ്കിടുകയാണ് രോഹിത്. ഇരുവരും ആറു സെഞ്ച്വറികള് വീതമാണ് കരിയറില് ഇതുവരെ കളിച്ച ലോകകപ്പുകളില് നിന്നും നേടിയത്. ഒന്നു കൂടി നേടാന് കഴിഞ്ഞാല് സച്ചിനെ പിന്തള്ളി റെക്കോര്ഡിന്റെ ഏക അവകാശി രോഹിത്തായി മാറും.
ന്യൂസിലാന്ഡിനെതിരേ ടൂര്ണമെന്റില് തന്റെ ആറാം സെഞ്ച്വറി കുറിക്കാമെന്ന് സ്വപ്നം കാണുകയാണി ഹിറ്റ്മാന്.
കൂടുതല് റണ്സ്
ലോകകപ്പിന്റെ ഒരു എഡിഷനില് ഏറ്റവും കൂടുതല് റണ്സ് നേടിയ താരമെന്ന സച്ചിന്റെ മറ്റൊരു ലോക റെക്കോര്ഡ് രോഹിത്തിന് കൈയെത്തുംദൂരത്താണ്. 27 റണ്സ് കൂടി നേടിയാല് 673 റണ്സെന്ന സച്ചിന്റെ ഓള്ടൈം റെക്കോര്ഡ് തകര്ക്കപ്പെടും.
നിലവില് ഈ ലോകകപ്പില് എട്ട് ഇന്നിങ്സുകളില് നിന്നും 647 റണ്സ് ഹിറ്റ്മാന് അടിച്ചെടുത്തു കഴിഞ്ഞു. 92.43 എന്ന അമ്പരപ്പിക്കുന്ന ശരാശരിയിലാണ് അദ്ദേഹം ഇത്രയും റണ്സെടുത്തത്.
ഇന്ത്യയുടെ തുറുപ്പുചീട്ട്
ടൂര്ണമെന്റില് ഇന്ത്യയുടെ തുറുപ്പുചീട്ടായി രോഹിത് മാറിക്കഴിഞ്ഞു. ലോകകപ്പിനായി ഇംഗ്ലണ്ടിലെത്തുമ്പോള് അദ്ദേഹത്തിന്റെ ഫോം മികച്ചതായിരുന്നില്ല. ഐപിഎല്ലില് മുംബൈ ഇന്ത്യന്സിനൊപ്പവും പ്രതീക്ഷിച്ച പ്രകടനമല്ല ഹിറ്റ്മാന് കാഴ്ചവച്ചത്. എന്നാല് ലോകകപ്പില് പുതിയൊരു രോഹിത്തിനെയാണ് കണ്ടത്.
ആദ്യ കളിയില് തന്നെ സെഞ്ച്വറിയുമായി തുടങ്ങിയയ അദ്ദേഹം പിന്നീട് നാലു തവണ കൂടി ഇതാവര്ത്തിക്കുകയായിരുന്നു. സ്ഥിരം ഓപ്പണിങ് പാര്ട്ട്നറായ ശിഖര് ധവാന് പരിക്കു കാരണം പുറത്തായിട്ടും അത് ഇന്ത്യയെ കാര്യമായി ബാധിക്കാതിരുന്നത് രോഹിത്തിന്റെ ഗംഭീര പ്രകടനം കൊണ്ടാണ്.