ന്യൂസിലാന്ഡിനെതിരേ അവരുടെ നാട്ടില് നടന്ന ടെസ്റ്റില് ആദ്യ സെഷന് അതിജീവിച്ചാണ് മായങ്ക് നേട്ടത്തിന് ഉടമയായത്. 30 വര്ഷത്തിനു ശേഷം ഇതാദ്യമായണ് ഇന്ത്യയുടെ ഒരു ഓപ്പണര് ആദ്യ സെഷന് മുഴുവന് ന്യൂസിലാന്ഡിനെതിരേ ബാറ്റ് ചെയ്തത്.
ഇതിനു മുമ്പ് 1990ല് നാപ്പിയര് ടെസ്റ്റില് മനോജ് പ്രഭാകറാണ് കിവികളുടെ ന്യൂബോള് ആക്രമണത്തിനു മുന്നില് ആദ്യ സെഷനില് വിക്കറ്റ് കൈവിടാതെ കളിച്ചത്. അന്നു പ്രഭാകര് 268 പന്തില് 95 റണ്സ് നേടിയിരുന്നു.
ലഞ്ച് ബ്രേക്കിനു ശേഷമായിരുന്നു മായങ്ക് തന്റെ വിക്കറ്റ് കൈവിട്ടത്. 84 പന്തുകളില് അഞ്ചു ബൗണ്ടറികളോടെ 34 റണ്സെടുത്ത മായങ്കിനെ സ്റ്റാര് പേസര് ട്രെന്റ് ബോള്ട്ടാണ് പുറത്താക്കിയത്.
പുള് ഷോട്ടിനു ശ്രമിച്ച മായങ്കിന് പിഴയ്ക്കുകയായിരുന്നു. ബാറ്റിന് അരികില് തട്ടിത്തെറിച്ച പന്ത് ലോങ് ലെഗില് ജാമിസണ് അനായാസം പിടികൂടുകയായിരുന്നു.
പേസ് ബൗളിങിനെ അകമഴിഞ്ഞ് തുണയ്ക്കുന്ന, പച്ചപ്പുള്ള പിച്ചില് മറ്റു ബാറ്റ്സ്മാന്മാരെല്ലാം പിടിച്ചുനില്ക്കാന് പാടുപെട്ടപ്പോള് ആത്മവിശ്വാസത്തോടെ കളിച്ചത് മായങ്കായിരുന്നു പേസും ബൗണ്സും വേണ്ടുവോളം ഉണ്ടായിരുന്ന പിച്ചില് മായങ്ക് മികച്ച ബാറ്റിങ് തന്നെ കാഴ്ചവച്ചു. അതു കൊണ്ടാണ് അദ്ദേഹത്തിനു ആദ്യ സെഷന് മുഴുവന് ബാറ്റ് ചെയ്യാന് കഴിഞ്ഞത്. എന്നാല് തനിക്കു ലഭിച്ച മികച്ച തുടക്കം മുതലാക്കുന്നതില് മായങ്ക് പരാജയപ്പെട്ടു. ദൈര്ഘ്യമേറിയ ഇന്നിങ്സ് കളിച്ച് ടീമിന് ശക്തമായ അടിത്തറയിടാനുള്ള അവസരമാണ് താരം പാഴാക്കിയത്.