സച്ചിന് ടെണ്ടുല്ക്കര് (3077)
ക്രിക്കറ്റ് ഇതിഹാസം സച്ചിന് ടെണ്ടുല്ക്കറാണ് കംഗാരുക്കള്ക്കെതിരേ ഏകദിനത്തില് ഏറ്റവും കേമന്. 1991-2012 കാലയളവില് 71 മത്സരങ്ങള് സച്ചിന് ഓസ്ട്രേലിയക്കെതിരേ ഏകദിനത്തില് കളിച്ചു. 44.59 ശരാശരിയില് 3077 റണ്സാണ് സച്ചിന് അടിച്ചെടുത്തത്. ഒമ്പത് സെഞ്ച്വറിയും 15 അര്ധ സെഞ്ച്വറിയും ഇതില് ഉള്പ്പെടും. 84.71 ആയിരുന്നു സ്ട്രൈക്കറേറ്റ്. ഓസ്ട്രേലിയക്കെതിരേ 175 റണ്സാണ് സച്ചിന്റെ ഉയര്ന്ന സ്കോര്. 2009ല് ഹൈദരാബാദിലായിരുന്നു ഈ ഇന്നിങ്സ്. 1998ല് ഷാര്ജയില് സച്ചിന് ഓസീസിനെതിരേ നേടിയ സെഞ്ച്വറി ഇപ്പോഴും ആരാധകരുടെ ഇഷ്ട ഇന്നിങ്സുകളിലൊന്നാണ്.
രോഹിത് ശര്മ (2208 റണ്സ്)
ഇന്ത്യയുടെ പരിമിത ഓവര് ഉപനായകനായ രോഹിത് ശര്മയാണ് രണ്ടാം സ്ഥാനത്ത്. 40 ഏകദിനങ്ങളില് നിന്നായി 61.33 ശരാശരിയില് 2208 റണ്സാണ് രോഹിത് നേടിയത്. എട്ട് സെഞ്ച്വറിയും അത്ര തന്നെ അര്ധ സെഞ്ച്വറിയും രോഹിതിന്റെ പേരിലുണ്ട്. 97.87 ആയിരുന്നു അദ്ദേഹത്തിന്റെ സ്ട്രൈക്കറേറ്റ്. രോഹിതിന്റെ കരിയറിലെ മൂന്ന് ഇരട്ട സെഞ്ച്വറികളില് ഒന്ന് ഓസ്ട്രേലിയക്കെതിരേ ആയിരുന്നു. 2013-14ലെ പരമ്പരയില് 158 പന്തില് 209 റണ്സാണ് രോഹിത് നേടിയത്. ബംഗളൂരുവിലായിരുന്നു ഈ ഇന്നിങ്സ്. 16 സിക്സും 12 ഫോറുമാണ് അന്ന് രോഹിത് പറത്തിയത്. മെല്ബണില് 138 റണ്സ് നേടിയതും ബ്രിസ്ബണില് 124 റണ്സ് നേടിയതുമെല്ലാം രോഹിതിന്റെ കംഗാരുക്കള്ക്കെതിരായ മനോഹര പ്രകടനങ്ങളാണ്. പരിക്കിന്റെ പിടിയിലുള്ള രോഹിത് ഇത്തവണ ഇന്ത്യന് ടീമിലില്ല എന്നത് വലിയ തിരിച്ചടിയാണ്.
വിരാട് കോലി (1910 റണ്സ്)
ഇന്ത്യന് നായകന് വിരാട് കോലിയാണ് പട്ടികയിലെ മൂന്നാമന്. 40 ഏകദിനത്തില് നിന്ന് 54.57 ശരാശരിയില് 1910 റണ്സാണ് കോലി അടിച്ചെടുത്തിട്ടുള്ളത്. എട്ട് വീതം സെഞ്ച്വറിയും അര്ധ സെഞ്ച്വറിയും കോലിയുടെ പേരിലുണ്ട്. 96.65 ആണ് സ്ട്രൈക്കറേറ്റ്. വിശാഖപട്ടണത്ത് 121 റണ്സ് നേടിയും 2013ല് 52 പന്തില് 100 റണ്സ് നേടിയതും നാഗ്പൂരില് 66 പന്തില് 115 റണ്സ് നേടിയതുമെല്ലാം ഓസ്ട്രേലിയക്കെതിരായ വിരാട് കോലിയുടെ മികച്ച പ്രകടനങ്ങളാണ്. അവസാന ഏറ്റുമുട്ടലിലും തകര്പ്പന് പ്രകടനം കാഴ്ചവെക്കാന് കോലിക്ക് സാധിച്ചിരുന്നു.