മൂന്നാം ടി20യില്‍ വിന്‍ഡീസിനെ നാണംകെടുത്തി ഇന്ത്യ; പരമ്പര സ്വന്തമാക്കി

ഗയാന: വെസ്റ്റിന്‍ഡീസിനെതിരായ ടി20 പരമ്പരയിലെ മൂന്നാമത്തെ മത്സരത്തിലും ഇന്ത്യന്‍ വനിതകള്‍ ജയം സ്വന്തമാക്കി. ഇതോടെ അഞ്ചു മത്സരങ്ങളുടെ പരമ്പരയില്‍ ഇന്ത്യ 3-0 എന്ന നിലയില്‍ അഭേദ്യമായ ലീഡുനേടി. ആദ്യം ബാറ്റ് ചെയ്ത വിന്‍ഡീസ് 20 ഓവറില്‍ 9 വിക്കറ്റ് നഷ്ടത്തില്‍ കേവലം 59 റണ്‍സിന് പുറത്തായപ്പോള്‍ ഇന്ത്യ 16.4 ഓവറില്‍ 3 വിക്കറ്റ് നഷ്ടത്തില്‍ ലക്ഷ്യത്തിലെത്തി.

ടോസ് നേടി ബാറ്റിങ്ങിനിറങ്ങിയ വിന്‍ഡീസിന് ബാറ്റിങ് ദുഷ്‌കരമായ പിച്ചില്‍ കാര്യമായൊന്നും ചെയ്യാനായില്ല. 11 റണ്‍സെടുത്ത ചെദീന്‍ നാഷനും, ചിനെല്ലി ഹെന്റിയുമാണ് ടോപ് സ്‌കോറര്‍മാര്‍. മറ്റു കളിക്കാര്‍ക്കൊന്നും രണ്ടക്കം കടക്കാനായില്ല. ഇന്ത്യയ്ക്കുവേണ്ടി രാധ യാദവ്, ദീപ്തി ശര്‍മ എന്നിവര്‍ 2 വിക്കറ്റുവീതം വീഴ്ത്തി. അനുജ പാട്ടീല്‍, പൂജ വസ്ത്രാകര്‍, ഹര്‍മന്‍പ്രീത് കൗര്‍, പൂനം യാദവ് എന്നിവര്‍ ഓരോ വിക്കറ്റുവീതവും സ്വന്തമാക്കി.

കുറഞ്ഞ സ്‌കോര്‍ ലക്ഷ്യമാക്കി ബാറ്റിങ്ങിനിറങ്ങിയ ഇന്ത്യയ്ക്കും കാര്യങ്ങള്‍ എളുപ്പമായിരുന്നില്ല. ആദ്യ രണ്ട് മത്സരങ്ങളില്‍ അര്‍ധശതകം നേടിയ ഷെഫാലി വര്‍മ റണ്ണൊന്നുമെടുക്കാതെയും സ്മൃതി മന്ദാന 3 റണ്‍സോടെയും പുറത്തായപ്പോള്‍ 40 റണ്‍സെടുത്ത ജമീമ റോഡ്രിഗസ് ആണ് ഇന്ത്യയ്ക്ക് കരുത്തായത്. ഹര്‍മന്‍പ്രീത് കൗര്‍ 7 റണ്‍സെടുത്ത പുറത്തായി. 7 റണ്‍സെടുത്ത ദീപ്തി ശര്‍മാണ് പുറത്താകാതെ നിന്ന ജമീമയ്ക്ക് കൂട്ടായി ഉണ്ടായിരുന്നത്.