ഇംഗ്ലീഷുകാരെ നാണംകെടുത്തി ഇന്ത്യ, ചെകുത്താന്മാരേ വഴിമാറൂ, നമ്മുടെ പിള്ളേര്‍ മുന്നില്‍ നടന്നോട്ടെ

തുടര്‍ച്ചയായ 18ാം ടെസ്റ്റ് വിജയമാണ് ഇന്ത്യ ചെപ്പോക്കില്‍ നേടിയത്. 1985 സപ്തംബര്‍ മുതല്‍ 1987 മാര്‍ച്ച് വരെ കപില്‍ ദേവിന്റെ ടീം നേടിയ തുടര്‍ച്ചയായ 17 ജയങ്ങളെന്ന റെക്കോഡ് ഇതോടെ പഴങ്കഥയായി.
ഇന്ത്യയുടെ തുടര്‍ച്ചയായ അഞ്ചാം ടെസ്റ്റ് പരമ്പര വിജയം കൂടിയാണ് ഇന്നത്തേത്.

ആദ്യ ഇന്നിങ്‌സില്‍ ട്രിപ്പിള്‍ സെഞ്ച്വറിയോടെ മല്‍സരം ഇന്ത്യക്ക് അനുകൂലമാക്കിയ മറുനാടന്‍ മലയാളി കരുണ്‍ നായരാണ് മാന്‍ ഓഫ് ദി മാച്ചായി തിരഞ്ഞെടുക്കപ്പെട്ടത്.
പുറത്താവാതെ 303 റണ്‍സാണ് താരം നേടിയത്. ടെസ്റ്റില്‍ ട്രിപ്പിള്‍ നേടുന്ന ആദ്യ മലയാളി കൂടിയാണ് അദ്ദേഹം.

ടെസ്റ്റിന്റെ താരം കരുണ്‍ ആണെങ്കിലും പരമ്പരയുടെ താരം ഇന്ത്യന്‍ ക്യാപ്റ്റന്‍ വിരാട് കോലിയാണ്. അഞ്ചു ടെസ്റ്റുകളില്‍ നിന്ന് 655 റണ്‍സാണ് താരം വാരിക്കൂട്ടിയത്. മാന്‍ ഓഫ് ദി സീരീസായി തിരഞ്ഞെടുക്കപ്പെട്ടതും കോലിയാണ്. ഇംഗ്ലണ്ടിന്റെ ജോ റൂട്ടാണ് 491 റണ്‍സോടെ പട്ടികയില്‍ രണ്ടാമത്.

സ്പിന്നര്‍ ആര്‍ അശ്വിന്‍ ഒരിക്കല്‍ക്കൂടി ഇന്ത്യന്‍ ബൗളിങിന്റെ അമരക്കാരനായി. അഞ്ചു ടെസ്റ്റുകളില്‍ 28 വിക്കറ്റുകള്‍ നേടിയ അശ്വിനാണ് പട്ടികയില്‍ ഒന്നാമത്. രണ്ടു വിക്കറ്റുകള്‍ പിന്നിലായി ടീമംഗം രവീന്ദ്ര ജഡേജ തൊട്ടു താഴെയെത്തി.

ടെസ്റ്റില്‍ ഇംഗ്ലണ്ടിനെതിരേ ഇന്ത്യയുടെ ഏറ്റവും വലിയ പരമ്പര വിജയം കൂടിയാണിത്. 1992-93ലെ പരമ്പര 3-0ന് നേടിയതായിരുന്നു ഇതിനു മുമ്പത്തെ മികച്ചത്.