വിശാഖപട്ടണം ടെസ്റ്റ്; ഓപ്പണിങ് അരങ്ങേറ്റത്തില്‍ സെഞ്ച്വറിയുമായി രോഹിത്; ഇന്ത്യ മികച്ച സ്‌കോറിലേക്ക്

രോഹിത്തിന്റെ സെഞ്ച്വറി തിളക്കം

അഞ്ച് സിക്‌സറുകളും 12 ഫോറും ഉള്‍പ്പെടുന്നതാണ് രോഹിത്തിന്റെ ഇന്നിങ്‌സ്. ഏകദിന ശൈലിയില്‍ ബാറ്റുവീശിയ താരം ദക്ഷിണാഫ്രിക്കന്‍ ബൗളര്‍മാര്‍ക്കെതിരെ ആധിപത്യം നേടി. ഓപ്പണറായി അരങ്ങേറി സെഞ്ച്വറി നേടുന്ന നാലാമത്തെ മാത്രം ഇന്ത്യന്‍ താരമാണ് രോഹിത്. ഓപ്പണറായി ഇറങ്ങി ക്രിക്കറ്റിന്റെ മൂന്ന് ഫോര്‍മാറ്റിലും സെഞ്ച്വറി നേടുന്ന ആദ്യ ഇന്ത്യക്കാരനെന്ന ബഹുമതിയും രോഹിത് സ്വന്തമാക്കി.

രോഹിത്തിനൊപ്പം മായങ്കും

രോഹിത്തിനൊപ്പമിറങ്ങിയ മായങ്കും മികവുറ്റ കളിയാണ് പുറത്തെടുത്തത്. 11 ബൗണ്ടറിയും 2 സിക്‌സറും മായങ്ക് കണ്ടെത്തിയപ്പോള്‍ ഇന്ത്യ ആദ്യ സെഷനില്‍ തന്നെ കളി കൈയ്യടക്കുകയായിരുന്നു. നേരത്തെ ടോസ് നേടിയ ഇന്ത്യന്‍ ക്യാപ്റ്റന്‍ വിരാട് കോലി ബാറ്റിങ് തെരഞ്ഞെടുക്കുകയായിരുന്നു. തുടക്കത്തില്‍ ബാറ്റിങ്ങിന് അനുകൂലമാകുന്ന പിച്ചില്‍ പിന്നീട് സ്പിന്നര്‍മാര്‍ക്ക് ആധിപത്യം ലഭിക്കും.

അശ്വിന്‍ തിരിച്ചെത്തി

ഇന്ത്യന്‍ ടീമില്‍ ഋഷഭ് പന്തിന് പകരം വൃദ്ധിമാന്‍ സാഹ ടീമില്‍ ഇടം കണ്ടെത്തിയപ്പോള്‍ ആര്‍ അശ്വിനും തിരിച്ചെത്തിയിട്ടുണ്ട്. ജഡേജയ്‌ക്കൊപ്പം അശ്വിനാകും ഇന്ത്യയുടെ സ്പിന്‍ ആക്രമണം നയിക്കുക. പാര്‍ട് ടൈം ബൗളറായി ഹനുമ വിഹാരിയും സഹായത്തിനെത്തും. ഇശാന്ത് ശര്‍മയും മുഹമ്മദ് ഷമിയുമാണ് പേസര്‍മാര്‍. ചേതേശ്വര്‍ പൂജാര, വിരാട് കോലി, അജിങ്ക്യ രഹാന എന്നിവരാണ് ടീമിലെ പ്രധാന ബാറ്റ്‌സ്മാന്മാര്‍.