സന്നാഹ മല്‍സരം സമനിലയില്‍... ആശ്വസിക്കാന്‍ വകയില്ലാതെ ഇന്ത്യ

ബൗളിങില്‍ പ്രതീക്ഷ നല്‍കി ഉമേഷും ഇശാന്തും

എസെക്‌സിനെതിരേ ഇന്ത്യന്‍ ബൗളിങ് നിരയില്‍ പേസര്‍മാരായ ഉമേഷ് യാദവിനും ഇശാന്ത് ശര്‍മയ്ക്കും മാത്രമാണ് മികച്ചു നില്‍ക്കാനായത്. ഇരുവരും ചേര്‍ന്ന് ഏഴ് വിക്കറ്റുകളാണ് പിഴുതത്.

18 ഓവറില്‍ 35 റണ്‍സ് വിട്ടുകൊടുത്ത് ഉമേഷ് നാല് വിക്കറ്റുകള്‍ വീഴ്ത്തുകയായിരുന്നു. 19 ഓവറില്‍ 59 റണ്‍സ് വിട്ടുകൊടുത്തായിരുന്നു ഇശാന്തിന്റെ മൂന്ന് വിക്കറ്റ് പ്രകടനം. ഷാര്‍ദുല്‍ താക്കൂര്‍ ഒരു വിക്കറ്റ് നേടി.

എസെക്‌സിന്റെ ചെറുത്ത് നില്‍പ്പ്

എസെക്‌സിനു വേണ്ടി മൂന്ന് താരങ്ങളാണ് അര്‍ധസെഞ്ച്വറിയുമായി തിളങ്ങിയത്. 123 പന്തില്‍ 13 ബൗണ്ടറിയും ഒരു സിക്‌സറും ഉള്‍പ്പെടെ 75 റണ്‍സെടുത്ത പോള്‍ വാള്‍ട്ടറാണ് എസെക്‌സിന്റെ ടോപ്‌സ്‌കോറര്‍. മിഖായേല്‍ കെയ്ല്‍ പെപ്പറും (68) ക്യാപ്റ്റന്‍ ടോം വെസ്റ്റ്‌ലിയും (57) അര്‍ധസെഞ്ച്വറികളുമായി എസെക്‌സ് ഇന്നിങ്‌സിന് കരുത്തേകി. 42 റണ്‍സെടുുത്ത ജെയിംസ് ഫോസ്റ്ററാണ് എസെക്‌സിന്റെ മറ്റൊരു പ്രധാന സ്‌കോറര്‍.

നിരാശപ്പെടുത്തി ധവാനും പുജാരയും

ഇംഗ്ലണ്ട് ടെസ്റ്റ് പരമ്പരയ്ക്കു മുന്നോടിയായി ഇന്ത്യ ശ്രദ്ധിക്കേണ്ടത് ശിഖര്‍ ധവാന്റേയും ചേതേശ്വര്‍ പുജാരയുടെയും പ്രകടനത്തിലാണ്. ഓപ്പണറായ ധവാന് തുടര്‍ച്ചയായ രണ്ടാമിന്നിങ്‌സിലും അക്കൗണ്ട് തുറക്കാന്‍ പോലുമായില്ല. ഈ മോശം പ്രകടനം മറന്ന് ശക്തമായ തിരിച്ചുവരവ് ധവാന്‍ നടത്താന്‍ പരിശ്രമിക്കേണ്ടതുണ്ട്.

ധവാനു പുറമേ ടെസ്റ്റില്‍ ഇന്ത്യ പ്രധാനമായും ആശ്രയിക്കുന്ന താരമാണ് ചേതേശ്വര്‍ പുജാര. എന്നാല്‍, എസെക്‌സിനെതിരായ മല്‍സരത്തില്‍ പുജാര നിരാശപെടുത്തുന്ന പ്രകടനമാണ് കാഴ്ചവച്ചത്.

ഒന്നാമിന്നിങ്‌സില്‍ ഒരു റണ്‍സ് മാത്രമെടുത്ത പുജാര രണ്ടാമിന്നിങ്‌സില്‍ 23 റണ്‍സെടുത്ത് മടങ്ങുകയായിരുന്നു. തങ്ങളുടെ പോരായ്മ പരിഹരിക്കാനുള്ള അവസരമായി ധവാനും പുജാരയും ഈ സന്നാഹ മല്‍സരത്തെ കണ്ടാല്‍ ഇന്ത്യക്ക് അത് മുതല്‍കുട്ടായി മാറും. അല്ലെങ്കില്‍ ഇന്ത്യക്ക് ഇംഗ്ലീഷ് ടെസ്റ്റില്‍ അത് തലവേദനയാവും. രണ്ടാമിന്നിങ്‌സില്‍ ലോകേഷ് രാഹുലും (36*) അജിന്‍ക്യ രഹാനെയും (19*) പുറത്താവാതെ നിന്നു.