ഇന്ത്യ ഇംഗ്ലണ്ട് ലോകകപ്പില്‍ ഏറ്റുമുട്ടിയപ്പോള്‍ ഫലം ഇങ്ങനെ; ഇത്തവണ സാധ്യത ആര്‍ക്ക്

ഇരു ടീമുകളും ഏറ്റുമുട്ടിയപ്പോള്‍

ഇന്ത്യയും ഇംഗ്ലണ്ടും തമ്മില്‍ ലോകകപ്പില്‍ ഇതുവരെ ഏഴു മത്സരങ്ങളില്‍ ഏറ്റുമുട്ടിയിട്ടുണ്ട്. രണ്ടു ടീമുകളും തമ്മില്‍ 3 മത്സരങ്ങള്‍വീതം ജയിച്ചപ്പോള്‍ ഒരു മത്സരം സമനിലയിലായി. ഇത്തവണ ബര്‍മിങ്ഹാമിലാണ് മത്സരം. വലിയ സ്‌കോര്‍ പിറക്കുമെന്ന് കരുതപ്പെടുന്ന കളിയില്‍ ഫൈനല്‍ മത്സരത്തിന്റെ വീറും വാശിയും പ്രകടനമാകും. ടീമുകള്‍ തമ്മില്‍ നേരത്തെ ഏറ്റുമുട്ടിയപ്പോള്‍ ഫലം എങ്ങിനെയാണെന്ന് കാണാം.

ജയം ഒപ്പത്തിനൊപ്പം

1975ലെ ആദ്യ ലോകകപ്പിലാണ് രണ്ടു ടീമുകളും ആദ്യമായി ഏറ്റുമുട്ടിയത്. അന്ന് ദുര്‍ബലരായിരുന്ന ഇന്ത്യയെ 202 റണ്‍സിന് ഇംഗ്ലണ്ട് തോല്‍പ്പിച്ചു. 1983ല്‍ ഇന്ത്യ ലോകകപ്പ് നേടിയ വര്‍ഷത്തില്‍ ജയം ഇന്ത്യയ്‌ക്കൊപ്പമായിരുന്നു. സെമി ഫൈനലില്‍ ആതിഥേയരായ ഇംഗ്ലണ്ടിനെ 6 വിക്കറ്റിനാണ് ഇന്ത്യ കീഴ്‌പ്പെടുത്തിയത്. 1987ല്‍ ജയം ഇംഗ്ലണ്ടിനൊപ്പം നിന്നു. അന്ന് മുംബൈയില്‍ വെച്ച് 35 റണ്‍സിന് ഇംഗ്ലണ്ട് ജയിച്ചുകയറി.

ബെംഗളുരുവില്‍ സമനില

പിന്നീട് 1992ല്‍ ഓസ്‌ട്രേലിയയില്‍ വെച്ച് ഇംഗ്ലണ്ട് വീണ്ടും ഇന്ത്യയെ തോല്‍പ്പിച്ചു. 9 റണ്‍സിനായിരുന്നു ജയം. 1999ല്‍ ഇംഗ്ലണ്ടില്‍ വീണ്ടും നടന്ന ലോകകപ്പില്‍ ഇന്ത്യ 63 റണ്‍സിന് ജയിച്ചു. 2003ലും ഇന്ത്യയ്ക്കായിരുന്നു ജയം. ഇന്ത്യ ഫൈനലിലെത്തിയ ടൂര്‍ണമെന്റില്‍ 82 റണ്‍സിന് ജയിച്ചു. 2011ല്‍ ഇന്ത്യ ലോകകപ്പ് നേടിയ വര്‍ഷം ബെംഗളുരുവില്‍ ഇരു ടീമുകളും സമനിലയില്‍ കളിയവസാനിപ്പിച്ചു.