Click it and Unblock the Notifications
കാന്ബെറയില് സെയ്നിക്ക് പകരം മീഡിയം പേസറായ ശാര്ദ്ധുല് താക്കൂറും ഷമിക്ക് പകരം പുതുമുഖ താരം ടി നടരാജനും ടീമിലെത്തി. എന്തായാലും പേസിലെ വൈവിധ്യം ഇന്ത്യയെ തുണച്ചു. ഇക്കഴിഞ്ഞ ഐപിഎല്ലില് യോര്ക്കറുകള്ക്കൊണ്ട് പേരെടുത്ത നടരാജന് അരങ്ങേറ്റ മത്സരത്തില് രണ്ടു വിക്കറ്റെടുത്തു. 43 റണ്സ് മാത്രം വിട്ടുനല്കി ജസ്പ്രീത് ബുംറയും രണ്ടു വിക്കറ്റുകള് കണ്ടെത്തി. 45 ആം ഓവറില് ബുംറ കുറിച്ച മാക്സ്വെല്ലിന്റ വിക്കറ്റാണ് മത്സരത്തില് വഴിത്തിരിവായത്.
എന്നാല് ഇവരെക്കാളുപരി ശാര്ദ്ധുല് താക്കൂറിന്റെ പ്രകടനം മൂന്നാം ഏകദിനത്തില് കയ്യടി നേടുന്നുണ്ട്. 302 റണ്സ് പ്രതിരോധിക്കാനിറങ്ങിയ ടീം ഇന്ത്യ ശാര്ദ്ധുല് താക്കൂറിന്റെ മീഡിയം പേസിലാണ് കാര്യങ്ങള് നിയന്ത്രിച്ച് നിര്ത്തിയത്. താരം പത്തോവറില് 51 റണ്സ് മാത്രമേ വഴങ്ങിയുള്ളൂ. ഒപ്പം അപകടകാരിയായ സ്റ്റീവ് സ്മിത്തിനെയും മോയിസസ് ഹെന്റിക്കസിനെയും തുടക്കത്തിലെ പറഞ്ഞയച്ചു. വാലറ്റത്ത് ഷോണ് ആബോട്ടിന്റെയും വിക്കറ്റ് ശാര്ദ്ധുലിനാണ്.
കാന്ബെറയിലെ പ്രകടനം മുന്നിര്ത്തി ശാര്ദ്ധുല് താക്കൂറിനെ 'ആവേശോജ്ജ്വലമായ പാക്കേജ്' എന്നാണ് മുന് ഓസ്ട്രേലിയന് ഓള്റൗണ്ടര് ടോം മൂഡി വിശേഷിപ്പിക്കുന്നത്. മുന്നോട്ട് ഇന്ത്യയുടെ ഏകദിന ടീമില് 29 -കാരനായ ശാര്ദ്ധുല് നിര്ണായക സാന്നിധ്യമാകുമെന്ന് മൂഡി വിലയിരുത്തുന്നു.
'ശാര്ദ്ധുല് താക്കൂര് മികച്ച ബൗളിങ്ങാണ് കാബന്ബെറയിലെ ഏകദിനത്തില് നടത്തിയത്. ഇന്ത്യയുടെ പേസാക്രമണത്തിന് വൈവിധ്യം നല്കാന് ഇദ്ദേഹത്തിന് കഴിഞ്ഞു. സെയ്നിയെ സ്ഥിരം ടെസ്റ്റ് ബൗളറാക്കാനുള്ള ശ്രമത്തിലാണ് ഇന്ത്യന് മാനേജ്മെന്റ്. ഈ അവസരത്തില് ശാര്ദ്ധുലിന് ഏകദിന സ്ക്വാഡില് കൂടുതല് അവസരം ലഭിക്കും. മുന്നോട്ട് ഇന്ത്യയുടെ ഏകദിന ടീമില് നിര്ണായക സ്വാധീനമായി ശാര്ദ്ധുല് താക്കൂര് മാറും', ഇഎസ്പിഎന് ക്രിക്കിന്ഫോയ്ക്ക് നല്കിയ അഭിമുഖത്തില് ടോം മൂഡി അഭിപ്രായപ്പെട്ടു.
വിക്കറ്റെടുക്കാനുള്ള കഴിവാണ് ശാര്ദ്ധുലിനെ ടീമിലെ മറ്റു ബൗളര്മാരില് നിന്നും വ്യത്യസ്തനാക്കുന്നത്. വിക്കറ്റു കണ്ടെത്താന് സഹായിക്കുന്ന നിരവധി 'വേരിയേഷനുകള്' അദ്ദേഹത്തിന്റെ ബൗളിങ്ങില് കാണാം. വേഗവ്യതിയാനമാണ് ആദ്യത്തേത്. യോര്ക്കറുകള് എറിയാന് ശാര്ദ്ധുലിന് ബുട്ടിമുട്ടില്ല. ഒപ്പം പന്തിനെ വായുവില് സ്വിങ് ചെയ്യാനും താരത്തിന് സാധിക്കുന്നു. അതുകൊണ്ട് ഇന്ത്യന് ടീമിന് ലഭിക്കുന്ന ആവേശോജ്ജ്വല പാക്കേജാണ് ശാര്ദ്ധുല് താക്കൂറെന്ന് മൂഡി പറയുന്നു.
Continue with Google