ഓപ്പണിങിലെ അവ്യക്തത
ടെസ്റ്റ് പരമ്പരയില് ഓപ്പണിങിന്റെ കാര്യത്തില് ഇന്ത്യക്കു ഇപ്പോഴും വ്യക്തതയായിട്ടില്ല. മികച്ച ഫോമിലുള്ള യുവതാരം പൃഥ്വി ഷായ്ക്കു പരിക്കേറ്റത് ഇന്ത്യക്കു അപ്രതീക്ഷിത തിരിച്ചടിയായിട്ടുണ്ട്. പൃഥ്വിയുടെ അഭാവത്തില് ലോകേഷ് രാഹുലിനൊപ്പം ആര് ഓപ്പണറായി കളിക്കുമെന്ന് ഇതുവരെ ഉറപ്പായിട്ടില്ല. മുരളി വിജയ്, രോഹിത് ശര്മ എന്നിവരിലൊരാള് ഓപ്പണറായി എത്തിയേക്കുമെന്നാണ് സൂചന. ഓപ്പണിങിലെ ഈ അവ്യക്തത തന്നെയാണ് ഇന്ത്യയുടെ ഒരു വീക്ക്നെസ്.
പരിശീലന മല്സരത്തില് വിജയ് സെഞ്ച്വറിയോടെ ഫോമിലേക്കുയര്ന്നത് ഇന്ത്യക്കു ആശ്വാസം നല്കുന്നുണ്ട്. മിച്ചെല് സ്റ്റാര്ക്ക്, പാറ്റ് കമ്മിന്സ്, ജോഷ് ്ഹാസ്ല്വുഡ് എന്നിവര് നയിക്കുന്ന ഓസീസ് പേസാക്രമണത്തെ ഓപ്പണര്മാര് എങ്ങനെ അതിജിവീക്കുമെന്നത് ഇന്ത്യയുടെ വിധി നിര്ണയിക്കും.
സ്ലിപ്പിലെ ക്യാച്ചിങ്
സ്ലിപ്പിലെ ക്യാച്ചിങ് ടെസ്റ്റ് മല്സരങ്ങളുടെ ഫലം തന്നെ നിര്ണയിക്കുന്നതില് പ്രധാനമാണ്. ഇന്ത്യയാവട്ടെ കുറച്ചുകാലമായി സ്ലിപ്പിലെ ക്യാച്ചിങില് മോശവുമാണ്. കഴിഞ്ഞ ഇംഗ്ലണ്ട് പര്യടനത്തില് സ്ലിപ്പില് ഇന്ത്യ നഷ്ടപ്പെടുത്തിയ ചില ക്യാച്ചുകള് മല്സരത്തില് നിര്ണായകമാവുകയും ഇന്ത്യയുടെ തോല്വിക്കു തന്നെ ഇതു വഴിവയ്ക്കുകയും ചെയ്തിരുന്നു. പേസര്മാര് ബൗള് ചെയ്യുമ്പോഴാണ് ഇന്ത്യ സ്ലിപ്പില് ഏറെ ക്യാച്ചുകള് പാഴാക്കിയിട്ടുള്ളത്.
പേസും ബൗണ്സുമുള്ള ഓസ്ട്രേലിയന് പിച്ചിലും സ്ലിപ്പിലെ ക്യാച്ചിങ് ദുഷ്കരമാവും. ഇംഗ്ലണ്ടിലെ പിഴവ് ഇന്ത്യ ഇവിടെയും ആവര്ത്തിച്ചാല് ഓസീസിനെ തടഞ്ഞുനിര്ത്താന് കോലിക്കും സംഘത്തിനും വിയര്പ്പൊഴുക്കേണ്ടിവരും.
ലോവര് ഓര്ഡര് ബാറ്റിങ്
ടെസ്റ്റില് ടോപ്പ് ഓര്ഡര് ബാറ്റിങില് മാത്രമല്ല ലോവര് ഓര്ഡര് ബാറ്റിങിലു മികച്ച കൂട്ടുകെട്ടുകളുണ്ടായാല് മാത്രമേ വെല്ലുവിളിയുയര്ത്തുന്ന സ്കോര് പടുത്തുയര്ത്താന് ടീമിനാവുകയുള്ളൂ. കഴിഞ്ഞ ഇംഗ്ലണ്ട് പര്യടനത്തില് ആറാമനായി ക്രീസിലെത്തിയ സാം കറെന്റെ ചില വീരോചിത ഇന്നിങ്സുകളാണ് ഇന്ത്യയുടെ തോല്വിക്കു മുഖ്യ കാരങ്ങളിലൊന്ന്. കറെനെപ്പോലെ അതുപോലയുള്ള പൊസിഷനില് മികച്ച പ്രകടനം നടത്താന് ശേഷിയുള്ള താരങ്ങള് കുറവാണെന്നത് ഇന്ത്യക്കു തിരിച്ചടിയാണ്.
കഴിഞ്ഞ പരിശീലന മല്സരവും ഇന്ത്യയുടെ ഈ വീക്ക്നെസ് തുറന്നുകാട്ടി. ഒരു ഘട്ടത്തില് 500ന് മുകളില് ഇന്ത്യ സ്കോര് ചെയ്യുമെന്ന് കരുതിയിരുന്നെങ്കിലും ലോവര് ഓര്ഡര് ബാറ്റിങ് ചീട്ടുകൊട്ടാരം കണക്കെ തകര്ന്നടിയുകയായിരുന്നു.