T20 WC 2026: അഭിഷേകിന് പിഴച്ചത് അവിടെയാണ്! ഫോമില്ലായ്മക്ക് പിന്നിലെ കാരണം വെളിപ്പെടുത്തി ബാറ്റിംഗ് പരിശീലകൻ

സൂപ്പർ 8 പോരാട്ടത്തിൽ ദക്ഷിണാഫ്രിക്കയോട് 76 റൺസിന് തോറ്റതിന് പിന്നാലെ ഇന്ത്യൻ ബാറ്റിംഗ് നിരയെ വിമർശിച്ച് നിരവധി പേർ രം​ഗത്തെത്തിയിരുന്നു. അഭിഷേക് ശർമ്മയുടെ ഫോം ഇല്ലായ്മയും അദ്ദേഹത്തെ ഒരുപാട് ആശ്രയിക്കുന്ന ഇന്ത്യൻ ശൈലിയും വിമർശന വിധേയമായിട്ടുണ്ട്. ഇതേ വിഷയത്തിൽ ഇപ്പോൾ തുറന്നുസംസാരിച്ചിരിക്കുകയാണ് പരിശീലകൻ റയാൻ ടെൻ ഡോഷ്‌ചേറ്റ്. യുവ ഓപ്പണർ അഭിഷേക് ശർമ്മയുടെ മോശം ഫോമിന് പിന്നിൽ ടൂർണമെന്റിന്റെ തുടക്കത്തിൽ താരത്തിനുണ്ടായ 'ഫുഡ് പോയിസണിംഗ്' വലിയ പങ്കുവഹിച്ചുവെന്ന് അദ്ദേഹം വെളിപ്പെടുത്തി.

ആത്മവിശ്വാസം വീണ്ടെടുക്കണം:

"അഭിഷേക് ശർമ്മയുടെ ഫോമില്ലായ്മ ആശങ്കയുണ്ടാക്കുന്ന ഒന്നാണ്. ലോകകപ്പിന് മുൻപ് താരത്തിനുണ്ടായ ആരോഗ്യപ്രശ്നങ്ങൾ (Stomach illness) അദ്ദേഹത്തിന്റെ മുന്നൊരുക്കങ്ങളെ സാരമായി ബാധിച്ചു. തുടർച്ചയായി മൂന്ന് പൂജ്യങ്ങൾക്ക് പുറത്തായാൽ ഏത് താരത്തിന്റെയും ആത്മവിശ്വാസം കുറയും. അഭിഷേകിനെ പഴയ ഫോമിലേക്ക് തിരികെ കൊണ്ടുവരിക എന്നതാണ് ഇപ്പോൾ കോച്ചിംഗ് സ്റ്റാഫിന്റെ പ്രധാന ജോലി," ഡോഷ്‌ചേറ്റ് വാർത്താസമ്മേളനത്തിൽ പറഞ്ഞു. ദക്ഷിണാഫ്രിക്കയ്‌ക്കെതിരെ 15 റൺസെടുത്ത അഭിഷേക് മാർക്കോ യാൻസന്റെ സ്ലോവർ ബോളിലാണ് പുറത്തായത്.

റിങ്കു സിംഗിന് പിന്തുണ:

അഭിഷേകിനും തിലക് വർമ്മയ്ക്കും പുറമെ ഫിനിഷർ റിങ്കു സിംഗിന്റെ ഫോമില്ലായ്മയും ചർച്ചയാകുന്നുണ്ട്. എന്നാൽ റിങ്കുവിനെ കുറ്റപ്പെടുത്താൻ പരിശീലകൻ തയ്യാറായില്ല. "ടി20 ക്രിക്കറ്റിൽ ഏഴ്, എട്ട് സ്ഥാനങ്ങളിൽ ബാറ്റ് ചെയ്യുക എന്നത് വളരെ കടുപ്പമേറിയ ജോലിയാണ്. നമീബിയക്കെതിരായ മത്സരത്തിലും ഇന്നത്തെ മത്സരത്തിലും വളരെ മോശം സാഹചര്യത്തിലാണ് റിങ്കു ക്രീസിലെത്തിയത്. ബൗണ്ടറികൾ കണ്ടെത്താനുള്ള ശ്രമത്തിനിടെയാണ് അദ്ദേഹം പുറത്തായത്. അദ്ദേഹത്തിന് അർഹമായ അവസരങ്ങൾ ഇതുവരെ ലഭിച്ചിട്ടില്ല," അദ്ദേഹം കൂട്ടിചേർത്തു. ഈ ലോകകപ്പിൽ 82 സ്ട്രൈക്ക് റേറ്റിൽ 24 റൺസ് മാത്രമാണ് റിങ്കുവിന് നേടാനായത്.

വൈസ് ക്യാപ്റ്റനെ പുറത്തിരുത്തിയതിനെതിരെ ആകാശ് ചോപ്ര:

ടീമിന്റെ വൈസ് ക്യാപ്റ്റനായി തിരഞ്ഞെടുക്കപ്പെട്ട അക്ഷർ പട്ടേലിനെ പ്ലേയിംഗ് ഇലവനിൽ നിന്ന് ഒഴിവാക്കിയ തീരുമാനത്തെ ആകാശ് ചോപ്ര രൂക്ഷമായി വിമർശിച്ചു. "പ്ലേയിംഗ് ഇലവനിൽ സ്ഥാനമുറപ്പില്ലാത്ത ഒരാളെ എന്തിനാണ് വൈസ് ക്യാപ്റ്റനാക്കിയത്?" എന്ന് അദ്ദേഹം ചോദിച്ചു. ദക്ഷിണാഫ്രിക്കൻ നിരയിൽ ഇടംകൈയ്യൻ ബാറ്റർമാർ ഉള്ളതിനാൽ അക്ഷറിനെ മാറ്റി വാഷിംഗ്ടൺ സുന്ദറിനെ ഉൾപ്പെടുത്തിയ 'മാച്ച് അപ്പ്' തന്ത്രം പാളിയെന്നും ചോപ്ര നിരീക്ഷിച്ചു. ദക്ഷിണാഫ്രിക്ക അവരുടെ പ്രധാന സ്പിന്നറായ കേശവ് മഹാരാജിനെ കളിപ്പിച്ചപ്പോൾ ഇന്ത്യ സ്വന്തം വൈസ് ക്യാപ്റ്റനെ പുറത്തിരുത്തിയത് മണ്ടത്തരമായെന്നും അദ്ദേഹം കൂട്ടിച്ചേർത്തു.

അഭിഷേകിനെ ആശ്രയിക്കുന്നത് അപകടം - വരുൺ ആരോൺ:

യുവ ഓപ്പണർ അഭിഷേക് ശർമ്മയുടെ ഫോമില്ലായ്മ ഇന്ത്യയുടെ ബാറ്റിംഗ് തകർച്ചയ്ക്ക് പ്രധാന കാരണമായെന്ന് വരുൺ ആരോൺ അഭിപ്രായപ്പെട്ടു. അഭിഷേകിനെ ടീം അമിതമായി ആശ്രയിക്കുന്നുണ്ടെന്നും താരം പരാജയപ്പെടുമ്പോൾ മധ്യനിര സമ്മർദ്ദത്തിലാകുന്നുവെന്നും അദ്ദേഹം പറഞ്ഞു. പന്ത് വേഗത്തിൽ ബാറ്റിലേക്ക് വരുന്നത് ഇഷ്ടപ്പെടുന്ന അഭിഷേകിനെ പൂട്ടാൻ ദക്ഷിണാഫ്രിക്കൻ ബൗളർമാർ പേസ് കുറച്ച് പന്തെറിഞ്ഞത് ഫലപ്രദമായെന്നും വരുൺ ആരോൺ നിരീക്ഷിച്ചു.