അച്ചടക്കത്തോടെയുള്ള ബാറ്റിങ്
പേസ് ബൗളിങിനെ തുണയ്ക്കുന്ന പിച്ചുകളില് ഇന്ത്യയുടെ ഏറ്റവും വലിയ വീക്കനെസ് ബാറ്റിങ് തന്നെയാണ്. ഇംഗ്ലണ്ടില് പേസര്മാര് മനോഹരമായി പന്തെറിഞ്ഞിട്ടും ബാറ്റിങ് നിരയുടെ ദയനീയ പ്രകടനമാണ് ഇന്ത്യയെ ചതിച്ചത്. ബാറ്റ്സ്മാന്മാര് കഴിവിനൊത്ത പ്രകടനം നടത്തിയിരുന്നെങ്കില് ഇംഗ്ലണ്ടില് അദ്ഭുതങ്ങള് കാണിക്കാന് ഇന്ത്യക്കാവുമായിരുന്നു.
ഓസ്ട്രേലിയയിലും ബാറ്റ്സ്മാന്മാര്ക്കായിരിക്കും സമ്മര്ദ്ദം. മുന്നിര ബാറ്റ്സ്മാന്മാര് മികച്ച തുടക്കം നല്കിയാല് ഓസ്ട്രേലിയയില് വലിയ സ്കോറുകള് പടുത്തുയര്ത്താന് ഇന്ത്യക്കാവും. ക്യാപ്റ്റന് വിരാട് കോലിയൊഴികെ ബാറ്റിങില് മറ്റുള്ളവര് കൂടി കഴിവിനൊത്ത പ്രകടനം നടത്തിയാല് 400, 450 സ്കോര് നേടി ഓസീസിനെ സമ്മര്ദ്ദത്തിലാക്കാന് ഇന്ത്യക്കു സാധിക്കുമെന്ന കാര്യത്തില് സംശയമില്ല. കാരണം, ഇന്ത്യന് ബൗളിങ് നിര നാട്ടില് മാത്രമല്ല വിദേശത്തും ഉജ്ജ്വലമായാണ് പന്തെറിയുന്നത്.
ശരിയായ ടീം സെലക്ഷന്
ഇംഗ്ലണ്ടിനെതിരായ ടെസ്റ്റ് പരമ്പരയില് ടീം സെലക്ഷനിലെ പാളിച്ചകളും ഇന്ത്യക്കു വിനയായിരുന്നു. സ്പിന്നിനെ തുണയ്ക്കാത്ത ലോര്ഡ്സിലെ പിച്ചില് കുല്ദീപ് യാദവിനെ കളിപ്പിച്ചത് ഇന്ത്യക്കു കനത്ത തിരിച്ചടിയാണ് നല്കിയത്. മല്സരത്തില് വെറും ഒമ്പതോവര് മാത്രമേ കുല്ദീപ് പന്തെറിഞ്ഞുള്ളൂ. വിക്കറ്റ് വീഴ്ത്താന് ശേഷിയുള്ള ഉമേഷ് യാദവിനെ പുറത്തിരുത്തിയാണ് അന്ന് ഇന്ത്യ ഇത്തരമൊരു റിസ്കെടുത്തത്. ഇതു കൂടാതെ പരിക്ക് ഭേദമാവാതിരുന്നിട്ടും സ്പിന്നര് ആര് അശ്വിനെ കളിപ്പിച്ചത് ഇന്ത്യക്കു തിരിച്ചടി നല്കി.
ഓസ്ട്രേലിയയില് ശരിയായ ടീം സെലക്ഷന് ഇന്ത്യക്കു നിര്ണായകമാണ്. ഇവിടെയുള്ള പിച്ചില് നേരത്തേ നടന്ന പര്യടനത്തില് തിളങ്ങിയ മുരളി വിജയിയെപ്പോലുള്ളവര് ഇത്തവണ തീര്ച്ചയായും ടീമിലെത്തേണ്ടതുണ്ട്.
റിഷഭ് പന്തിനെ നിലനിര്ത്തണം
യുവതാരം റിഷഭ് പന്തും വെറ്ററന് പാര്ഥീവ് പട്ടേലുമാണ് ഓസീസിനെതിരായ ടെസ്റ്റ് പരമ്പരയിലെ ഇന്ത്യന് വിക്കറ്റ് കീപ്പര്മാര്. എന്നാല് പാര്ഥീവിനു പകരം പന്തിനെ പ്ലെയിങ് ഇലവനില് ഉള്പ്പെടുത്തുന്നതാവും ഇന്ത്യക്കു ഗുണം ചെയ്യുക. കഴിഞ്ഞ ഇംഗ്ലണ്ട് പര്യടനത്തില് അഞ്ചാമത്തെയും അവസാനത്തെയും ടെസ്റ്റില് പന്ത് സെഞ്ച്വറിയുമായി മിന്നിയിരുന്നു.
അറ്റാക്കിങ് ബാറ്റ്സ്മാനായ പന്ത് ഓസ്ട്രേലിയന് പിച്ചുകളില് തിളങ്ങാന് മിടുക്കുള്ളതാരമാണ്. വിക്കറ്റ്കീപ്പിങില് ഇനിയും മെച്ചപ്പെടാനുണ്ടെങ്കിലും ബാറ്റിങില് പന്തിന്റെ മികവില് ആര്ക്കും ആശങ്കയില്ല. ലോവര് ഓര്ഡര് ബാറ്റിങില് പന്തിനെപ്പോലൊരു താരത്തിന്റെ സാന്നിധ്യം ഇന്ത്യയെ വലിയ സ്കോര് പടുത്തുയര്ത്താന് സ്ഹായിക്കും.