Ind vs Aus T20: ഓസീസ് നിരയില്‍ മാറ്റം, ഗ്രീന്‍ പുറത്ത് പകരം സൂപ്പര്‍ സ്പിന്നര്‍

ഓസ്‌ട്രേലിയ ടീമില്‍ നിന്ന് ഒഴിവാക്കിയ കാമറോന്‍ ഗ്രീന്‍ ഓസ്‌ട്രേലിയ എ ടീമിനുവേണ്ടി കളിക്കും. ഡിസംബര്‍ 17ന് ഇന്ത്യ-ഓസ്‌ട്രേലിയ ടെസ്റ്റ് പരമ്പര ആരംഭിക്കുന്നുണ്ട്. ഇതിന് മുന്നോടിയായി ഇന്ത്യ എയും ഓസ്‌ട്രേലിയയ എയും മൂന്ന് ദിവസ മത്സരം കളിക്കുന്നുണ്ട്. അതില്‍ കളിക്കുന്നതിനായാണ് ഗ്രീനിനെ ടീമില്‍ നിന്ന് ഒഴിവാക്കിയത്.

ഓസ്‌ട്രേലിയക്കുവേണ്ടി 96 ടെസ്റ്റില്‍ നിന്ന് 390 വിക്കറ്റും 29 ഏകദിനത്തില്‍ നിന്ന് 29 വിക്കറ്റും 2 ടി20യില്‍ നിന്ന് 1 വിക്കറ്റുമാണ് ലയണ്‍ വീഴ്ത്തിയത്. ടെസ്റ്റ് പരമ്പരയ്ക്ക് മുമ്പായി താളം കണ്ടെത്തുവാന്‍ ലയണിന് അവസരം നല്‍കേണ്ടതുണ്ട്. അതിന്റെ ഭാഗമായാണ് ഓസീസ് ടീമിന്റെ ഇത്തരമൊരു നീക്കം. ഓസീസിന്റെ പരിമിത ഓവര്‍ ടീമിന്റെ ഭാഗമായിരുന്ന ആഷ്ടന്‍ അഗറിന് പരിക്കേറ്റതും ലയണിനെ ടീമിലേക്ക് പരിഗണിക്കാന്‍ കാരണമായി.

മൂന്ന് മത്സര ടി20 പരമ്പരയില്‍ ഇന്ത്യ 1-0ന് മുന്നിട്ട് നില്‍ക്കുന്നതിനാല്‍ രണ്ടാം മത്സരം ജയിക്കേണ്ടത് ഓസ്‌ട്രേലിയയെ സംബന്ധിച്ച് വളരെ നിര്‍ണ്ണായകമാണ്. ഏകദിന പരമ്പര ഓസ്‌ട്രേലിയ 2-1ന് സ്വന്തമാക്കിയിരുന്നു. ഏകദിനത്തിനെ അപേക്ഷിച്ച് ശക്തമായ നിരയാണ് ഇന്ത്യയുടെ ടി20 ടീം. അവസാന 9 മത്സരങ്ങളിലും ഇന്ത്യയെ ടി20യില്‍ തോല്‍പ്പിക്കാന്‍ ആര്‍ക്കും സാധിച്ചിട്ടില്ല. അതിനാല്‍ത്തന്നെ ആവനാഴിയിലെ എല്ലാ തന്ത്രങ്ങളും പയറ്റാനുള്ള തയ്യാറെടുപ്പിലാണ് ഓസ്‌ട്രേലിയ.

ഒന്നാം ടി20യില്‍ 11 റണ്‍സിനാണ് ഇന്ത്യയുടെ ജയം. ആദ്യം ബാറ്റ് ചെയ്ത ഇന്ത്യ നിശ്ചിത 20 ഓവറില്‍ ഏഴ് വിക്കറ്റ് നഷ്ടത്തില്‍ 161 റണ്‍സെടുത്തപ്പോള്‍ മറുപടിക്കിറങ്ങിയ ഓസ്‌ട്രേലിയക്ക് 20 ഓവറില്‍ ഏഴ് വിക്കറ്റ് നഷ്ടത്തില്‍ 150 റണ്‍സെടുക്കാനെ സാധിച്ചുള്ളു. ഇന്ത്യന്‍ നിരയില്‍ ബാറ്റുകൊണ്ട് രവീന്ദ്ര ജഡേജ (23 പന്തില്‍ 44*),കെ എല്‍ രാഹുല്‍ (40 പന്തില്‍ 51) തിളങ്ങിയപ്പോള്‍ ബൗളിങ്ങില്‍ കണ്‍കഷന്‍ സബ്‌സ്റ്റിട്യൂട്ടായി എത്തിയ യുസ്‌വേന്ദ്ര ചഹാല്‍ തിളങ്ങി. നാല് ഓവറില്‍ 25 റണ്‍സ് വഴങ്ങി മൂന്ന് വിക്കറ്റാണ് ചഹാല്‍ വീഴ്ത്തിയത്. അരങ്ങേറ്റ താരം ടി നടരാജനും മൂന്ന് വിക്കറ്റുകള്‍ സ്വന്തമാക്കി.