ഫിഞ്ചിനെ ഫ്യൂസാക്കി വീണ്ടും ഭുവി
തുടര്ച്ചയായ രണ്ടാം ഏകദിനത്തിലും ഓസീസ് നായകന് ആരോണ് ഫിഞ്ചിനെ തുടക്കത്തില് തന്നെ പുറത്താക്കാന് ഇന്ത്യക്കു സാധിച്ചു. ആദ്യ കളിയിലെ റീപ്ലേ പോലെയാണ് ഫിഞ്ച് ഇത്തണയും ഔട്ടായത്. ആറു റണ്സെടുത്ത താരം ഭുവനേശ്വര് കുമാറിന്റെ ബൗളിങില് ക്ലീന്ബൗള്ഡായി ക്രീസ് വിടുകയായിരുന്നു. ആദ്യ കളിയിലും ഫിഞ്ചിനെ ഭുവി ബൗള്ഡാക്കിയിരുന്നു. ഓസീസ് ഒരു വിക്കറ്റിന് 20 റണ്സ്.
തൊട്ടുപിന്നാലെ കറേ
ഫിഞ്ച് പുറത്തായി തൊട്ടുപിന്നാലെ മറ്റൊരു ഓപ്പണറായ അലെക്സ് കറേയെയും ഇന്ത്യ മടക്കി. ടീം സ്കോറിലേക്ക് ആറു റണ്സ് കൂടി ചേര്ക്കുന്നതിനിടെയാണ് കറേ പുറത്തായത്. മുഹമ്മദ് ഷമിക്കാണ് വിക്കറ്റ്.
27 പന്തില് രണ്ടു ബൗണ്ടറികളോടെ 18 റണ്സെടുത്ത കറേയെ ഷമിയുടെ ബൗളിങില് ശിഖര് ധവാന് പിടികൂടുകയായിരുന്നു.
സൂപ്പര് റണ്ണൗട്ട്
മൂന്നാം വിക്കറ്റില് ഉസ്മാന് ഖവാജ- ഷോണ് മാര്ഷ് സഖ്യം മികച്ച കൂട്ടുകെട്ടുണ്ടാക്കി മുന്നേറവെയാണ് ഇന്ത്യ തിരിച്ചടിക്കുന്നത്. 56 റണ്സിന്റെ കൂട്ടുകെട്ടുമായി ഈ ജോടി കരുത്താര്ജിക്കവെയാണ് ജഡേജ ഇന്ത്യയുടെ രക്ഷകനായത്.
21 റണ്സെടുത്ത ഖവാജയെ ജഡേജ മികച്ച ഫീല്ഡിങിലൂടെ റണ്ണൗട്ടാക്കി. 23 പന്തില് മൂന്നു ബൗണ്ടറികളുള്പ്പെട്ടതായിരുന്നു ഖവാജയുടെ ഇന്നിങ്സ്. ഓസീസ് മൂന്നിന് 82
ഹാന്ഡ്സോംബ് പുറത്ത്
ഓസീസ് നിരയിലെ അപകടകാരിയായ കതാരങ്ങളിലൊരാളായ ഹാന്ഡ്സോംബിനെ അധികനേരം ക്രീസില് നില്ക്കാന് ഇന്ത്യ അനുവദിച്ചില്ല. 20 റണ്സെടുത്ത ഹാന്ഡ്സോംബിനെ ജഡേജയുടെ ബൗളിങില് ധോണി സ്റ്റംപ് ചെയ്തു പുറത്താക്കുകയായിരുന്നു. ടീം സ്കോര് 134ല് വച്ചാണ് ഹാന്ഡ്സോംബിന്റെ മടക്കം.
കൂട്ടുകെട്ട് തകര്ത്ത് ഷമി
അഞ്ചാം വിക്കറ്റില് മാര്ഷ്- സ്റ്റോയ്ണിസ് ജോടി 55 റണ്സിന്റെ കൂട്ടുകെട്ടുണ്ടാക്കി ഇന്ത്യയെ സമ്മര്ദ്ദത്തിലാക്കവെയാണ് ഷമി ടീമിന് ബ്രേക്ക്ത്രൂ നല്കുന്നത്. 29 റണ്സെടുത്ത സ്റ്റോയ്ണിസിനെ ഷമി ധോണിയുടെ കൈകളിലെത്തിക്കുകയായിരുന്നു. 36 പന്തുകള് നേരിട്ട സ്റ്റോയ്ണിസിന്റെ ഇന്നിങ്സില് മൂന്നു ബൗണ്ടറികളുള്പ്പെട്ടിരുന്നു.
മാര്ഷ്- മാക്സ്വെല് സഖ്യം
ആറാം വിക്കറ്റില് മാര്ഷിന് കൂട്ടായി മാക്സ്വെല് എത്തിയതോടെ ഓസീസ് സ്കോര്ബോര്ഡ് അതിവേഗം ചലിച്ചു. ആക്രമിച്ചു കളിച്ച മാക്സ്വെല് ഇന്ത്യയുടെ ഒരു ബൗളര്മാരെയും വെറുതെവിട്ടില്ല. ഈ സഖ്യം 94 റണ്സ് വാരിക്കൂട്ടി മുന്നേറിയപ്പോള് ഓസീസ് 320നു മുകളില് സ്കോര് ചെയ്യുമെന്ന പ്രതീതിയുണ്ടാക്കി. എന്നാല് മാക്സ്വെല്ലിനെയും മാര്ഷിനെയും ഒരേ ഓവറില് പുറത്താക്കി ഭുവി
ഇന്ത്യയെ രക്ഷിക്കുകയായിരുന്നു
ഇന്ത്യക്കു മികച്ച തുടക്കം
299 റണ്സിന്റെ വിജയലക്ഷ്യവുമായി ഇറങ്ങിയ ഇന്ത്യക്കു മികച്ച തുടക്കമാണ് ഓപ്പണര്മായാ രോഹിത് ശര്മയും ശിഖര് ധവാനും നല്കിയത്. ആദ്യ ഏകദിനത്തില് ഗോള്ഡന് ഡെക്കായി മടങ്ങേണ്ടി വന്ന ധവാന് തുടക്കം മുതല് തകര്ത്തടിക്കുകയായിരുന്നു. അര്ധസെഞ്ച്വറി കൂട്ടുകെട്ടിന് മൂന്നു റണ്സ് മാത്രമകലെ വച്ച് ധവാനെ പുറത്താക്കി ബെറന്ഡോര്ഫാണ് ഇന്ത്യന് കുതിപ്പിന് ബ്രേക്കിട്ടത്. 28 പന്തില് അഞ്ചു ബൗണ്ടറികളോടെ 32 റണ്സെടുത്ത ധവാന് ഖവാജയ്ക്കു ക്യാച്ച് നല്കുകയായിരുന്നു
ഹിറ്റ്മാന്റെ ഊഴം
ധവാന് പുറത്തായതോടെ ഇന്ത്യ ആക്രമണത്തിന്റെ ഉത്തരവാദിത്വം രോഹിത് ഏറ്റെടുക്കുകയായിരുന്നു. ഓസീസ് ബൗളര്മാരെ ഒരു കൂസലുമില്ലാതെയാണ് ഹിറ്റ്മാന് നേരിട്ടത്. രണ്ടാം വിക്കറ്റില് രോഹിതും ക്യാപ്റ്റന് വിരാട് കോലിയും ചേര്ന്ന് 54 റണ്സ് ഇന്ത്യന് സ്കോറിലേക്കു കൂട്ടിച്ചേര്ത്തു.
52 പന്തില് രണ്ടു വീതം ബൗണ്ടറികളും സിക്സറുമടക്കം 42 റണ്സെടുത്ത രോഹിത്തിനെ സ്റ്റോയ്ണിസിന്റെ ബൗളിങില് ഹാന്ഡ്സോംബ് പിടികൂടുകയായിരുന്നു.
വീണ്ടും മികച്ച കൂട്ടുകെട്ട്
മൂന്നാം വിക്കറ്റില് കോലിയും അമ്പാട്ടി റായുഡുവും ചേര്ന്ന് മറ്റൊരു അര്ധസെഞ്ച്വറി കൂട്ടുകെട്ട് കൂടി പടുത്തുയര്ത്തി. വലിയ ഷോട്ടുകള്ക്കു മുതിരാതെ സിംഗിളും ഡബിളുമെടുത്താണ് ഇരുവരും ഇന്ത്യന് സ്കോര് മുന്നോട്ടു നയിച്ചത്.
മാക്സ്വെല്ലാണ് ഈ സഖ്യത്തെ വേര്പിരിച്ചത്.
59 റണ്സിന്റെ കൂട്ടുകെട്ടുണ്ടാക്കാന് ഈ സഖ്യത്തിനായിരുന്നു. 24 റണ്സെടുത്ത റായുഡുവിനെ മാക്സ്വെല്ലിന്റെ ബൗളിങില് സ്റ്റോയ്ണിസ് പുറത്താക്കി.