അപ്രതീക്ഷിത പ്രകടനം
അപ്രതീക്ഷിത പ്രകടനമാണ് ഈ ടെസ്റ്റ് പരമ്പരയില് ടീം ഇന്ത്യ കാഴ്ചവച്ചത്. കഴിഞ്ഞ വര്ഷം ഇംഗ്ലണ്ട്, ദക്ഷിണാഫ്രിക്ക എന്നീവിടങ്ങളില് നടന്ന ടെസ്റ്റ് പരമ്പരകളില് തോറ്റ ഇന്ത്യ ഓസീസിന്റെ മണ്ണില് ഇത്രയും ഗംഭീര പ്രകടനം നടത്തുമെന്ന് കടുത്ത ആരാധകര് പോലും പ്രതീക്ഷിച്ചിരുന്നില്ല. എന്നാല് വിരാട് കോലിയും സംഘവും സകല കണക്കുകൂട്ടലുകളും തെറ്റിച്ചുകൊണ്ട് കംഗാരുക്കൂട്ടത്തിനു മേല് ആക്രമിച്ചു കയറുകയായിരുന്നു.
അഡ്ലെയ്ഡില് നടന്ന ആദ്യ ടെസ്റ്റില് ജയിച്ച് മുന്നറിയിപ്പ് നല്കിയ ഇന്ത്യക്കു പക്ഷെ പെര്ത്ത് ടെസ്റ്റില് കനത്ത തോല്വി നേരിട്ടു. എന്നാല് മൂന്നാം ടെസ്റ്റില് ശക്തമായ തിരിച്ചുവരവ് നടത്തി ഇന്ത്യ പരമ്പരയില് 2-1ന് മേല്ക്കൈ നേടുകയായിരുന്നു.
ടോസ് നിര്ണായകം
സിഡ്നി ടെസ്റ്റില് ടോസ് മല്സരവിധി തീരുമാനിക്കുന്നതില് നിര്ണായകമാവും. പരമ്പരയില് ഇതുവരെ നടന്ന മൂന്നു ടെസ്റ്റുകളിലും ടോസ് ലഭിച്ച് ആദ്യം ബാറ്റ് ചെയ്ത ടീമാണ് ജയിച്ചിട്ടുള്ളത്. മാത്രമല്ല വിദേശത്തു കോലിക്കു കീഴില് ടോസ് ലഭിച്ചപ്പോഴാണ് ഇന്ത്യ പല അവിസ്മരണീയ വിജയങ്ങളും സ്വന്തമാക്കിയിട്ടുള്ളത്. സിഡ്നി ടെസ്റ്റില് ടോസ് ലഭിക്കുന്ന ടീം ആദ്യം ബാറ്റിങ് തന്നെയാവും തിരഞ്ഞെടുക്കുകയെന്ന കാര്യം ഉറപ്പാണ്.
രോഹിത്തും ഇഷാന്തുമില്ല, അശ്വിന് കളിച്ചേക്കില്ല
മെല്ബണില് നടന്ന മൂന്നാം ടെസ്റ്റില് ജയിച്ച ടീമില് രണ്ടു മാറ്റങ്ങളുമായിട്ടാവും സിഡ്നിയില് ഇന്ത്യ ഇറങ്ങുക. ഭാര്യയുടെ പ്രസവത്തെ തുടര്ന്ന് മൂന്നാം ടെസ്റ്റിനു ശേഷം വെടിക്കെട്ട് താരം രോഹിത് ശര്മ നാട്ടിലേക്കു മടങ്ങിയിരുന്നു. ജനുവരി എട്ടു മാത്രമേ അദ്ദേഹം ഇനി ടീമിനൊപ്പം ചേരുകയുള്ളൂ. പേസര് ഇഷാന്ത് ശര്മയാണ് നാലാം ടെസ്റ്റില് നിന്നും പിന്മാറിയ മറ്റൊരു താരം. പരിക്കാണ് ഇഷാന്തിനു തിരിച്ചടിയായി മാറിയത്.
അതേസമയം, പരിക്കു മൂലം മൂന്നാം ടെസ്റ്റ് നഷ്ടമായ സ്പിന്നര് ആര് അശ്വിന് സിഡ്നിയിലും കളിക്കാനാവുമോയെന്ന കാര്യം ഉറപ്പില്ല. മല്സരത്തിനു തൊട്ടുമുന്പ് മാത്രമേ അശ്വിന് കളിക്കുമോ ഇല്ലയോ എന്ന കാര്യം തീരുമാനിക്കുകയുള്ളൂ. രോഹിത്, ഇഷാന്ത് എന്നിവര്ക്കു പകരം ലോകേഷ് രാഹുലും ഉമേഷ് യാദവും ഇന്ത്യയുടെ പ്ലെയിങ് ഇലവനില് എത്തിയേക്കും.
സാധ്യതാ ടീം
ഇന്ത്യ- വിരാട് കോലി (ക്യാപ്റ്റന്), മായങ്ക് അഗര്വാള്, ലോകേഷ് രാഹുല്, അജിങ്ക്യ രഹാനെ, ചേതേശ്വര് പുജാര, ഹനുമാ വിഹാരി, റിഷഭ് പന്ത്, രവീന്ദ്ര ജഡേജ, കുല്ദീപ് യാദവ് (ഉമേഷ് യാദവ്), മുഹമ്മദ് ഷമി, ജസ്പ്രീത് ബുംറ, ആര് അശ്വിന്.
ഓസ്ട്രേലിയ- ടിം പെയ്ന് (ക്യാപ്റ്റന്), ആരോണ് ഫിഞ്ച്, മാര്ക്കസ് ഹാരിസ്, ഉസ്മാന് ഖവാജ, ഷോണ് മാര്ഷ്, മാര്നസ് ലാബ്യുഷാഗ്നെ, ട്രാവിസ് ഹെഡ്ഡ്, നതാന് ലിയോണ്, പാറ്റ് കമ്മിന്സ്, മിച്ചെല് സ്റ്റാര്ക്ക്, ജോഷ് ഹാസ്ലല്വുഡ്.