ഇന്ത്യക്കു കിവിഫ്രൈ... പാണ്ഡെ നയിച്ചു, ന്യൂസിലാന്‍ഡിനെ തകര്‍ത്ത് ഇന്ത്യക്ക് ഏകദിന പരമ്പര

വിജയലക്ഷ്യം 300 റണ്‍സ്

ആദ്യം ബാറ്റ് ചെയ്ത ന്യൂസിലാന്‍ഡ് എ 300 റണ്‍സിന്റെ വിജയലക്ഷ്യമാണ് രണ്ടാം ഏകദിനത്തില്‍ ഇന്ത്യക്കു നല്‍കിയത്. ഒമ്പത് വിക്കറ്റിന് അവര്‍ 299 റണ്‍സ് നേടുകയായിരുന്നു. വില്‍ യങിന്റെ (102) സെഞ്ച്വറിയാണ് ആതിഥേയര്‍ക്കു കരുത്തായത്.
106 പന്തില്‍ ആറു ബൗണ്ടറികളും മൂന്നു സിക്‌സറുമുള്‍പ്പെട്ടതാണ് യങിന്റെ ഇന്നിങ്‌സ്. ജോര്‍ജ് വാക്കര്‍ 99 റണ്‍സിന് പുറത്തായി. ഇന്ത്യക്കു വേണ്ടി ഖലീല്‍ അഹമ്മദും നവ്ദീപ് സെയ്‌നിയും രണ്ടു വിക്കറ്റ് വീതമെടുത്തു.

പട നയിച്ച് പാണ്ഡെ

മറുപടി ബാറ്റിങില്‍ ക്യാപ്റ്റന്റെ കളി കെട്ടഴിച്ച പാണ്ഡെ (111*) അപരാജിത സെഞ്ച്വറിയുമായി ഇന്ത്യയുടെ ഹീറോയാവുയായിരുന്നു. ഒരോവര്‍ ബാക്കിനില്‍ക്കെ അഞ്ചു വിക്കറ്റ് മാത്രം നഷ്ടത്തില്‍ ഇന്ത്യ എ ടീം ലക്ഷ്യത്തിലെത്തി.
നാലാമനായി ക്രീസിലെത്തിയ പാണ്ഡെ കീവീസ് ബൗളിങ് ആക്രമണത്തെ കൂസലില്ലാതെയാണ് നേരിട്ടത്. 109 പന്തില്‍ അഞ്ചു ബൗണ്ടറികളും മൂന്നു സിക്‌സറുമുള്‍പ്പെട്ടതായിരുന്നു താരത്തിന്റെ ഇന്നിങ്‌സ്.

പാണ്ഡെ മാത്രമല്ല

ക്യാപ്റ്റന്‍ പാണ്ഡെ മാത്രമല്ല ശ്രേയസ് അയ്യര്‍, വിജയ് ശങ്കര്‍ എന്നിവരും ഇന്ത്യന്‍ വിജയത്തില്‍ നിര്‍ണായക പങ്കുവഹിച്ചു. ഇരുവരും 59 റണ്‍സ് വീതമെടുത്ത് പുറത്താവുകയായിരുന്നു. 63 പന്തില്‍ ആറു ബൗണ്ടറികളും ഒരു സിക്‌സറുമുള്‍പ്പെട്ടതായിരുന്നു ശ്രേയസിന്റെ ഇന്നിങ്‌സ്. 56 പന്തില്‍ നാലു ബൗണ്ടറികളും ഒരു സിക്‌സറുമടക്കമാണ് വിജയ് ഇത്രയും റണ്‍സ് നേടിയത്.
ഓപ്പണര്‍മാരായ മയാങ്ക് അഗര്‍വാളും ശുഭ്മാന്‍ ഗില്ലും 25 റണ്‍സ് വീതം നേടി പുറത്താവുകയായിരുന്നു.