INDvSL: സഞ്ജുവിന്റെ പ്രതിഭയില്‍ വിശ്വസിക്കുന്നു, അവന്‍ ശക്തമായി തിരിച്ചുവരും'- പിന്തുണച്ച് ആകാശ്

മധ്യനിര അവന് അനുയോജ്യമായ പൊസിഷനല്ല

'സഞ്ജു സാംസണെ ബുദ്ധിപരമായി ഉപയോഗിക്കുകയാണ് ശിഖര്‍ ധവാന്‍ ചെയ്യേണ്ടത്. സഞ്ജു സാംസണ്‍ മികച്ച പ്രകടനം നടത്തുമെന്ന് ഞാന്‍ ഇപ്പോഴും വിശ്വസിക്കുന്നു. മധ്യനിരയില്‍ കളിക്കുന്നത് അവന് ഒട്ടും അനുയോജ്യമായ ബാറ്റിങ് പൊസിഷന്‍ അല്ലെന്ന് എനിക്കറിയാം. ഒമ്പത് മത്സരങ്ങള്‍ മാത്രമാണ് അവന്‍ കളിച്ചത്. അവന്റെ പ്രതിഭ അറിയുന്നതിനാല്‍ എല്ലാവര്‍ക്കും വലിയ പ്രതീക്ഷകളാണുള്ളത്.

സഞ്ജു തിരിച്ചുവരും

സഞ്ജുവിന് പ്രതിഭയുണ്ട്. മറ്റ് താരങ്ങളെ അപേക്ഷിച്ച് പരിചയസമ്പന്നനാണവന്‍. അന്താരാഷ്ട്ര തലത്തില്‍ വലിയ അനുഭവസമ്പത്തില്ലെങ്കിലും ഐപിഎല്ലില്‍ കളിച്ച് വളരെ പരിചയസമ്പത്തുണ്ട്. ഒരു ടീമിന്റെ നായകന്‍ കൂടിയാണ് സഞ്ജു. അവനില്‍ ഉയര്‍ന്ന പ്രതീക്ഷയാണ് ഇപ്പോഴുമുള്ളത്. ഫൈനല്‍ ടി20യില്‍ സഞ്ജുവാണ് നട്ടെല്ലെന്ന് ധവാന്‍ വ്യക്തമാക്കി കഴിഞ്ഞു. റുതുരാജ്,ദേവ്ദത്ത്,നിധീഷ് റാണ എന്നിവരുടെ പ്രകടനം ബോണസാണ്. ധവാനും സഞ്ജുവും തിളങ്ങിയാല്‍ എന്താണ് സംഭവിക്കുകയെന്ന് കാണാം. ഈ ശ്രീലങ്കന്‍ ടീമിന് ഫിനിഷ് ചെയ്യാനാകില്ല. രണ്ടാം മത്സരത്തില്‍ത്തന്നെ നന്നായി പ്രയാസപ്പെട്ടു-ആകാശ് പറഞ്ഞു.

ഐപിഎല്ലിലെ മികവ് ആവര്‍ത്തിക്കാനാവുന്നില്ല

ഐപിഎല്ലില്‍ എതിരാളികളുടെ പേടി സ്വപ്‌നമാണ് സഞ്ജു സാംസണ്‍. നിലയുറപ്പിച്ചാല്‍ ബൗളര്‍മാരുടെ അന്തകനാവാന്‍ അദ്ദേഹത്തിന് സാധിക്കും. ഇതിന്റെ തെളിവാണ് മൂന്ന് ഐപിഎല്‍ സെഞ്ച്വറി. 136ന് മുകളിലാണ് ഐപിഎല്ലിലെ അദ്ദേഹത്തിന്റെ സ്‌ട്രൈക്കറേറ്റ്. എന്നാല്‍ അന്താരാഷ്ട്ര ക്രിക്കറ്റിലേക്കെത്തുമ്പോള്‍ സഞ്ജുവെന്ന പുലി എലിയായി മാറുന്നു. നിലവിലെ സാഹചര്യത്തില്‍ ഇനി ദേശീയ ടീമിലിടം പിടിക്കുക സഞ്ജുവിനെ സംബന്ധിച്ച് വളരെ പ്രയാസമുള്ള കാര്യമാണ്.