Click it and Unblock the Notifications
ടി20യില്‍ 10 തുടര്‍ ജയത്തിലേക്ക് ടീമിനെ എത്തിക്കുന്ന നായകനെന്ന ബഹുമതിയും രോഹിത്തിന് കൈയെത്തും ദൂരത്താണ്. 2021ലെ ടി20 ലോകകപ്പിലൂടെയാണ് ഇന്ത്യ ഈ വിജയകുതിപ്പ് തുടര്‍ന്നത്. അഫ്ഗാനിസ്ഥാനെതിരേ 66 റണ്‍സിന് ജയിച്ച ഇന്ത്യ സ്‌കോട്ട്‌ലന്‍ഡിനെ എട്ട് വിക്കറ്റിനും നമീബിയയെ 9 വിക്കറ്റും തോല്‍പ്പിച്ചു. 2021ലെ ലോകകപ്പിന് ശേഷം വിരാട് കോലി ഇന്ത്യയുടെ നായകസ്ഥാനം ഒഴിഞ്ഞിരുന്നു. പിന്നീടാണ് രോഹിത് ശര്‍മ നായകസ്ഥാനത്തേക്കെത്തുന്നത്.
ന്യൂസീലന്‍ഡ് പരമ്പരയിലെ ആദ്യ മത്സരത്തില്‍ അഞ്ച് വിക്കറ്റിനും രണ്ടാം മത്സരത്തില്‍ ഏഴ് വിക്കറ്റിനും മൂന്ന് മത്സരത്തില്‍ 73 റണ്‍സിനുമാണ് ഇന്ത്യ ജയിച്ചത്. പരമ്പര തൂത്തുവാരിയ ഇന്ത്യ വെസ്റ്റ് ഇന്‍ഡീസിനെയും നിലം തൊടാന്‍ അനുവദിച്ചില്ല. ആദ്യ മത്സരത്തില്‍ ആറ് വിക്കറ്റിനും രണ്ടാം മത്സരത്തില്‍ എട്ട് റണ്‍സിനും മൂന്നാം മത്സരത്തില്‍ 17 റണ്‍സിനും ഇന്ത്യ ജയിച്ചു. അവസാനമായി ഇന്ത്യ ടി20 പരമ്പര കളിച്ചത് ശ്രീലങ്കയോടാണ്. ആദ്യ മത്സരത്തില്‍ 62 റണ്‍സും രണ്ടാം മത്സരത്തില്‍ ഏഴ് വിക്കറ്റിനും മൂന്നാം മത്സരത്തില്‍ ആറ് വിക്കറ്റിനുമാണ് ഇന്ത്യയുടെ ജയം.
ഒരു ജയം അകലെ ഇന്ത്യക്ക് ലോക റെക്കോഡ് കുറിക്കാം. ഈ നേട്ടത്തിലേക്ക് ഇന്ത്യയെ എത്തിക്കുന്ന നായകനെന്ന ബഹുമതി രോഹിത്തിന് നേടുകയും ചെയ്യാം. ദക്ഷിണാഫ്രിക്കയ്‌ക്കെതിരായ പരമ്പര നേടാനായാല്‍ ടി20 ലോകകപ്പിന് തയ്യാറെടുക്കുന്ന ഇന്ത്യക്കത് വലിയ ആത്മവിശ്വാസം നല്‍കും. അതുകൊണ്ട് തന്നെ വളരെ പ്രതീക്ഷയോടും കരുതലോടെയുമാവും ഇന്ത്യ പരമ്പരക്കിറങ്ങുക.
ജൂണ്‍ 9ന് ഡല്‍ഹിയിലാണ് ആദ്യ മത്സരം. രണ്ടാം മത്സരം 12ന് കട്ടക്കില്‍ നടക്കുമ്പോള്‍ മൂന്നാം മത്സരം 14ന് വിശാഖപട്ടണത്തും നാലാം മത്സരം 17ാം തീയ്യതി രാജ്‌കോട്ടും അഞ്ചാം മത്സരം 19ാം തീയ്യതി ബംഗളൂരുവിലും നടക്കും. കരുത്തരായ ദക്ഷിണാഫ്രിക്കയോട് ഇന്ത്യക്ക് കാര്യങ്ങള്‍ എളുപ്പമാവില്ലെന്നുറപ്പ്. വിരാട് കോലി, രോഹിത് ശര്‍മ, റിഷഭ് പന്ത്, ശ്രേയസ് അയ്യര്‍, ഇഷാന്‍ കിഷന്‍ എന്നിവരെല്ലാം മോശം ഫോമിലാണ്. എഎപിഎല്ലില്‍ ഇവരൊന്നും പ്രതീക്ഷക്കൊത്ത് ഉയര്‍ന്നിട്ടില്ല.
സൂര്യകുമാര്‍ യാദവ്, അക്ഷര്‍ പട്ടേല്‍, ടി നടരാജന്‍, രവീന്ദ്ര ജഡേജ, ദീപക് ചഹാര്‍ തുടങ്ങിയവരെല്ലാം പരിക്കിന്റെ പിടിയിലുമാണ്. നായകനെന്ന നിലയില്‍ രോഹിത് ശര്‍മക്ക് ദക്ഷിണാഫ്രിക്കന്‍ പരമ്പര എളുപ്പമാവില്ല. നിരവധി വെല്ലുവിളികളെ മറികടന്ന് ചരിത്ര നേട്ടത്തിലേക്കെത്താന്‍ രോഹിത്തിന് സാധിക്കുമോയെന്നത് കാത്തിരുന്ന് തന്നെ കണ്ടറിയണം.
