IND vs NZ: ഹര്‍ദിക് പാണ്ഡ്യയെ എന്തിന് ഒഴിവാക്കി? ടീമില്‍ വേണമായിരുന്നു- ആകാശ് ചോപ്ര

ഇപ്പോഴിതാ ഹര്‍ദിക് പാണ്ഡ്യയെ ഒഴിവാക്കിയതിനെതിരേ ചോദ്യം ഉയര്‍ത്തിയിരിക്കുകയാണ് മുന്‍ ഇന്ത്യന്‍ ഓപ്പണറും അവതാരകനുമായ ആകാശ് ചോപ്ര. ഹര്‍ദിക്കിന് വിശ്രമം നല്‍കേണ്ട യാതൊരു ആവിശ്യവും ഇല്ലായിരുന്നുവെന്നാണ് ആകാശ് പറഞ്ഞത്. 'വിരാട് കോലി,മുഹമ്മദ് ഷമി,ജഡേജ,ബുംറ എന്നിവര്‍ക്കെല്ലാം വിശ്രമം നല്‍കിയതിനെ ന്യായമെന്ന് പറയാം. എന്നാല്‍ ഹര്‍ദിക് പാണ്ഡ്യയെ എന്തിനാണ് പുറത്തിരുത്തിയത്?. അവന്‍ വിശ്രമം ആവിശ്യപ്പെടുന്നുണ്ടോ? അതോ അവനെ ഒഴിവാക്കിയതാണോ?. ടെസ്റ്റില്‍ അവന്‍ കളിക്കുന്നില്ല. ഐപിഎല്ലില്‍ പന്തെറിയുന്നില്ല. ടി20 ലോകകപ്പിലെ അവസാന രണ്ട് മത്സരത്തിലും അവന്‍ ഒന്നും ചെയ്തിട്ടില്ല'- ആകാശ് ചോപ്ര പറഞ്ഞു.

ടി20 ലോകകപ്പില്‍ത്തന്നെ പരിക്ക് ഹര്‍ദിക്കിനെ വേട്ടയാടിയിരുന്നു. താരത്തെ ടീമിലേക്ക് പരിഗണിച്ചതിനെതിരേ തന്നെ വിമര്‍ശനങ്ങള്‍ ഉയര്‍ന്നിരുന്നു. അദ്ദേഹത്തെ മടക്കി അയക്കാന്‍ സെലക്ടര്‍മാര്‍ ആഗ്രഹിച്ചിരുന്നെങ്കിലും ഉപദേഷ്ടാവായ എംഎസ് ധോണിയുടെ നിര്‍ദേശ പ്രകാരമാണ് അദ്ദേഹത്തെ ടീമില്‍ തുടരാന്‍ അനുവദിച്ചത്. ഇത് മണ്ടന്‍ തീരുമാനമായെന്ന് ഇന്ത്യയുടെ ലോകകപ്പിലെ പ്രകടനത്തില്‍ നിന്ന് തന്നെ വ്യക്തം.

ഹര്‍ദിക്കിനെ സംബന്ധിച്ച് കാര്യങ്ങള്‍ ഇനി എളുപ്പമല്ല. ഏറെ നാളുകളായി പരിക്കിന്റെ പിടിയിലുള്ള താരത്തിന് ഫിറ്റ്‌നസും ഫോമും വീണ്ടെടുക്കേണ്ടതായുണ്ട്. അതിന് ആഭ്യന്തര ക്രിക്കറ്റ് കളിക്കാതെ മറ്റ് വഴികളില്ല. മികച്ച രീതിയില്‍ പന്തെറിയാന്‍ സാധിക്കാത്ത പക്ഷം ടീമിലേക്ക് തിരിച്ചെത്തുക കടുപ്പമാകുമെന്നുറപ്പ്. അടുത്ത വര്‍ഷം ഒക്ടോബറില്‍ ടി20 ലോകകപ്പ് ഓസ്‌ട്രേലിയയില്‍ നടക്കാനുണ്ട്. എന്നാല്‍ ഹര്‍ദിക്കിന് ടീമില്‍ ഇടം ലഭിക്കുമോയെന്ന് കണ്ടറിയണം.

ഇന്ത്യ പ്രഖ്യാപിച്ച ടീമില്‍ ഓപ്പണര്‍മാരുടെ നീണ്ടനിരയുള്ളതും ആകാശ് ചോപ്ര ചൂണ്ടിക്കാട്ടി. 'നിരവധി ഓപ്പണര്‍മാരാണ് ടീമിലുള്ളത്. ഐപിഎല്ലിലെ പ്രകടനത്തിന്റെ അടിസ്ഥാനത്തിലാണ് പലരും ടീമിലേക്കെത്തിയത്. എന്നാല്‍ ഐപിഎല്ലില്‍ ഓപ്പണിങ്ങിലിറങ്ങുന്ന താരം ഇന്ത്യന്‍ ടീമിനൊപ്പം അഞ്ചാം നമ്പറിലിറങ്ങിയാല്‍ തുല്യമായ പ്രകടനം കാഴ്ചവെക്കാന്‍ സാധിച്ചേക്കില്ല. മൂന്ന് മത്സര പരമ്പരക്കായി അഞ്ച് ഓപ്പണര്‍മാരാണ് ഇന്ത്യക്കൊപ്പമുള്ളത്. രാഹുലും രോഹിത്തുമാവും ഓപ്പണര്‍മാര്‍. ഇഷാന്‍ കിഷന്‍, വെങ്കടേഷ് അയ്യര്‍, റുതുരാജ് ഗെയ്ക് വാദ് എന്നിവരാണ് ഓപ്പണര്‍മാരായ മറ്റ് താരങ്ങള്‍'- ആകാശ് പറഞ്ഞു.

വെങ്കടേഷ് അയ്യരെ ഇപ്പോള്‍ പരിഗണിക്കേണ്ടിയിരുന്നില്ലെന്നും ആകാശ് പറഞ്ഞു. വെറും ഏഴ് മത്സരങ്ങളുടെ പരിചയസമ്പത്ത് മാത്രമാണ് അവനുള്ളത്. എന്നാല്‍ ഹര്‍ഷല്‍ പട്ടേല്‍, ആവേഷ് ഖാന്‍, മുഹമ്മജ് സിറാജ്, റുതുരാജ് എന്നിവരെ പരിഗണിച്ചത് മികച്ച കാര്യമാണെന്നും ആകാശ് അഭിപ്രായപ്പെട്ടു. റുതുരാജ് സയ്യിദ് മുഷ്താഖ് അലി ട്രോഫിയിലും മികച്ച പ്രകടനം കാഴ്ചവെക്കുന്നുണ്ട്. മൂന്ന് തുടര്‍ അര്‍ധ സെഞ്ച്വറികളാണ് അദ്ദേഹം നേടിയത്.