Click it and Unblock the Notifications
രോഹിത് ശര്‍മയ്‌ക്കൊപ്പം ഓപ്പണറായി യുവതാരം ശുബ്മാന്‍ ഗില്ലിനെ ഇറക്കാനാണ് ഇന്ത്യയുടെ ആലോചന. എന്നാല്‍ ഓപ്പണറെന്ന നിലയില്‍ മായങ്കിനെക്കാളും കേമനാണോ രോഹിതും ഗില്ലും. ഓസ്‌ട്രേലിയയിലെ രണ്ട് ടെസ്റ്റിലെ ഫോം ഔട്ടിന്റെ പേരില്‍ എങ്ങനെയാണ് മായങ്കിനെ പുറത്തിരുത്താനാവുക. ഇന്ത്യയില്‍ മോഹിപ്പിക്കുന്ന ടെസ്റ്റ് പ്രകടനം അവകാശപ്പെടാന്‍ സാധിക്കുന്ന താരമാണ് മായങ്ക്. അദ്ദേഹത്തിന്റെ ഇന്ത്യയിലെ ടെസ്റ്റ് പ്രകടനത്തിന്റെ കണക്കുകള്‍ നോക്കാം.
99ന് മുകളില്‍ ബാറ്റിങ് ശരാശരി
ഇന്ത്യയിലെ ഫ്‌ളാറ്റ് പിച്ചുകളില്‍ മികച്ച പ്രകടനം പുറത്തെടുക്കാന്‍ കെല്‍പ്പുള്ള താരമാണ് മായങ്ക് അഗര്‍വാള്‍. ഇന്ത്യയില്‍ മികച്ച ബാറ്റിങ് റെക്കോഡ് അദ്ദേഹം സ്വന്തമാക്കിയിട്ടുണ്ട്. നാട്ടില്‍ അഞ്ച് ടെസ്റ്റ് കളിച്ചിട്ടുള്ള മായങ്ക് മൂന്ന് സെഞ്ച്വറിയടക്കം 597 റണ്‍സാണ് നേടിയത്. 99.50 ആണ് അദ്ദേഹത്തിന്റെ ബാറ്റിങ് ശരാശരി. നിലവിലെ ഇന്ത്യന്‍ താരങ്ങളില്‍ കൂടുതല്‍ ശരാശരിയും മായങ്കിനാണ്. 243 റണ്‍സാണ് അദ്ദേഹത്തിന്റെ ഉയര്‍ന്ന സ്‌കോര്‍. ഇത്രയും മികച്ച പ്രകടനം നടത്തിയിട്ടും ടീമില്‍ അവസരം ലഭിക്കാതിരുന്നാല്‍ മായങ്കിനോടുള്ള നീതികേടായി അത് മാറും.
ഓസ്‌ട്രേലിയയില്‍ തിളങ്ങി ഗില്‍
മായങ്കിന്റെ ഫോം ഔട്ടിനെ മുതലാക്കാന്‍ ഗില്ലിന് സാധിച്ചു. അരങ്ങേറ്റ മത്സരത്തില്‍ 45 പുറത്താവാതെ 35 എന്നിങ്ങനെയായിരുന്നു 21കാരന്റെ സ്‌കോര്‍. ഇന്ത്യ 328 റണ്‍സ് ഗാബയില്‍ പിന്തുടരവെ 91 റണ്‍സുമായി ഇന്ത്യയുടെ ടോപ് സ്‌കോററാവാനും ഗില്ലിനായി. ഇതോടെയാണ് മായങ്കിന്റെ തിരിച്ചുവരവ് പ്രതീക്ഷകള്‍ക്ക് കടുത്ത തിരിച്ചടി നേരിടേണ്ടി വന്നത്. ഇന്ത്യയില്‍ ഇതുവരെ ടെസ്റ്റ് പരമ്പര കളിക്കാത്ത താരമായ ഗില്ലിന് തന്നെ രോഹിതിനൊപ്പം അവസരം നല്‍കാനാണ് സാധ്യത.
ഓപ്പണിങ്ങില്‍ രോഹിതും പുലി
ഇന്ത്യയുടെ ടെസ്റ്റ് ഓപ്പണറെന്ന നിലയിലേക്ക് രോഹിത് ശര്‍മ എത്തിയിട്ട് അധികനാളായില്ല. 10 ഇന്നിങ്‌സുകളാണ് ടെസ്റ്റ് ഓപ്പണറെന്ന നിലയില്‍ രോഹിതിന് അവസരം ലഭിച്ചത്. 68.50 ശരാശരിയില്‍ 685 റണ്‍സ് അദ്ദേഹം നേടി. ഇതില്‍ മൂന്ന് സെഞ്ച്വറിയും ഒരു അര്‍ധ സെഞ്ച്വറിയും നേടി. 212 റണ്‍സാണ് ഉയര്‍ന്ന സ്‌കോര്‍. മധ്യനിരയില്‍ 47 ഇന്നിങ്‌സ് കളിച്ച അദ്ദേഹം 39.62 ശരാശരിയില്‍ നേടിയത് 1585 റണ്‍സ്. ഇതില്‍ മൂന്ന് സെഞ്ച്വറിയും 10 അര്‍ധ സെഞ്ച്വറിയും ഉള്‍പ്പെടും. 177 റണ്‍സാണ് ഉയര്‍ന്ന സ്‌കോര്‍.
