നവദീപ് സൈനി പുറത്ത് ടി നടരാജന് അകത്ത്
പരിക്കിന്റെ പിടിയിലായ നവദീപ് സൈനി രണ്ടാം ഏകദിനത്തില് ടീമിലുണ്ടാകില്ല. ആദ്യ മത്സരത്തില്ത്തന്നെ പുറം വേദന അദ്ദേഹത്തെ പ്രയാസപ്പെടുത്തിയിരുന്നു. 10 ഓവറില് 83 റണ്സാണ് സൈനി വിട്ടുകൊടുത്തത്. ഒരു വിക്കറ്റ് മാത്രമാണ് നേടിയത്. അതിനാല്ത്തന്നെ രണ്ടാം മത്സരത്തില് സൈനിക്ക് പകരം മറ്റൊരു പേസ് ബൗളറെത്തും. ഇത്തവണത്തെ ഐപിഎല്ലിലൂടെ ശ്രദ്ധ പിടിച്ചുപറ്റിയ ടി നടരാജന് അവസരം ലഭിക്കാനാണ് സാധ്യത. കാരണം ഇടം കൈയന് പേസര്മാരായി മറ്റാരും ഇന്ത്യന് ടീമിലില്ല. കൂടാതെ മികച്ച രീതിയില് യോര്ക്കര് ചെയ്യാനുള്ള നടരാജന്റെ മികവ് ഓസീസിന് വെല്ലുവിളി ഉയര്ത്തും. ഓസീസ് താരങ്ങള് കളിച്ച് പരിചയ സമ്പത്ത് കുറവുള്ള ബൗളറെന്ന നിലയിലും നടരാജന് ആധിപത്യം കാട്ടാനാവും. ശര്ദുല് ഠാക്കൂറിനെ മറികടന്ന് നടരാജന് പ്ലേയിങ് ഇലവനില് എത്തുമോയെന്ന് കാത്തിരുന്ന് കാണാം.
മായങ്കിന് പകരം മനീഷ് പാണ്ഡെ
ഓപ്പണറെന്ന നിലയില് കെ എല് രാഹുല് തിരിച്ചെത്തേണ്ടതുണ്ട്. അതിനാല്ത്തന്നെ മായങ്ക് അഗര്വാളിനെ പുറത്തിരുത്തി പകരം മനീഷ് പാണ്ഡെയെ ഇന്ത്യ കളിപ്പിച്ചേക്കും. അങ്ങനെ വന്നാല് രാഹുലിന് ധവാനൊപ്പം ഓപ്പണ് ചെയ്യാനാവും. അഞ്ചാം നമ്പറില് മനീഷ് ഇറങ്ങും. മധ്യനിരയില് കളിച്ച് പരിചയസമ്പത്തുള്ള താരമാണ് മനീഷ്. ഓസ്ട്രേലിയക്കെതിരേ മികച്ച റെക്കോഡ് മനീഷിനുണ്ട്. അതിനാല്ത്തന്നെ ഇന്ത്യ ഈ മാറ്റത്തിന് തയ്യാറായേക്കും. മായങ്കും (22) രാഹുലും (12) ആദ്യ മത്സരത്തില് നിരാശപ്പെടുത്തിയിരുന്നു.
ചഹാലിന് പകരം കുല്ദീപ്
ഏകദിനത്തില് ഒരു ഇന്ത്യന് സ്പിന്നറുടെ ഏറ്റവും മോശം പ്രകടനമാണ് ഒന്നാം ഏകദിനത്തില് യുസ് വേന്ദ്ര ചഹാല് വഴങ്ങിയത്. 10 ഓവറില് 89 റണ്സ് വഴങ്ങി 1 വിക്കറ്റാണ് ചഹാല് വീഴ്ത്തിയത്. അതിനാല് ചഹാലിന് പകരം കുല്ദീപ് യാദവിനെ പരീക്ഷിച്ചേക്കും. ഓസീസ് മണ്ണില് മികച്ച ബൗളിങ് പ്രകടനം അവകാശപ്പെടാന് സാധിക്കുന്ന കുല്ദീപിന്റെ ചൈനാമാന് ബൗളിങ് ടീമിന് കരുത്താകുമെന്ന് വിശ്വസിക്കാം. സ്പിന് ഓള്റൗണ്ടറായി രവീന്ദ്ര ജഡേജയും ടീമിലുണ്ട്.