Click it and Unblock the Notifications
തന്റെ സ്ഥാനം മെച്ചപ്പെടുത്തിയ ചാഹല് 21-ാമത് എത്തിയിട്ടുണ്ട്. സിംബാവെ ബൗളര് ബ്ലെസിംഗ് മുസറബാനി, ലങ്കന് പേസര് ദുഷ്മന്ദ ചമീര എന്നിവരും സ്ഥാനം മെച്ചപ്പെടുത്തിയവരാണ്. അഞ്ച് സ്ലോട്ട് മുകളിലേക്ക് കയറിയ ഇന്ത്യന് നായകന് ശിഖര് ധവാനും നേട്ടമുണ്ടാക്കിയിട്ടുണ്ട്. ഇപ്പോള് ദക്ഷിണാഫ്രിക്കന് ഓപ്പണര് റീസ ഫെന്റിക്രസിനൊപ്പം 29-ാം സ്ഥാനത്താണ് ധവാന്. ശ്രീലങ്കയ്ക്കെതിരെ ഇന്ത്യയെ നയിക്കുന്നത് ധവാന് ആണ്.
നിലവിലെ പട്ടിക പ്രകാരം ബാറ്റ്സ്മാന്മാരുടെ പട്ടികയില് ഒന്നാമതുള്ളത് ഇംഗ്ലണ്ട് താരം ഡേവിഡ് മലാന് ആണ്. രണ്ടാമത് പാക്കിസ്ഥാന് താരം ബാബര് അസം ആണ്. മൂന്നാമത് ഓസീസിന്റെ ആരോണ് ഫിഞ്ചും നാലാമത് ന്യൂസിലന്ഡിന്റെ ഡിവോണ് കോണ്വേയുമാണുള്ളത്. ഇന്ത്യയുടെ വിരാട് കോഹ്ലിയാണ് അഞ്ചാമത്. ടോപ് ടെന്നില് മറ്റൊരു ഇന്ത്യന് താരവുമില്ല. ബൗളര്മാരുടെ പട്ടികയില് ഒന്നാമത് ദക്ഷിണാഫ്രിക്കയുടെ ടബ്രെയ്സ് ഷംസിയാണുള്ളത്. അഫ്ഗാനിസ്ഥാന്റെ മുഹമ്മദ് നബിയാണ് ഒന്നാം നമ്പര് ഓള്റൗണ്ടര്. ബംഗ്ലാദേശ് താരം ഷാക്കിബ് അല് ഹസന് ആണ് രണ്ടാമതുള്ളത്.
അതേസമയം ശ്രീലങ്കയ്ക്കെതിരായ ഇന്ത്യയുടെ രണ്ടാം ട്വന്റി-20 മത്സരം ഇന്ന് നടക്കും. എന്നാല് ഓള് റൗണ്ടര് ക്രുണാല് പാണ്ഡ്യയ്ക്ക് കൊവിഡ് പോസിറ്റീവായതോടെ ഇന്ത്യന് ക്യാമ്പ് കടുത്ത പ്രതിസന്ധിയിലാണ്. ക്രുണാലുമായി സമ്പര്ക്കത്തിലുണ്ടായിരുന്ന എട്ട് ഇന്ത്യന് താരങ്ങള് ഐസൊലേഷനില് പ്രവേശിച്ചിരിക്കുകയാണ്. ഇതോടെ ഇന്ത്യയ്ക്ക് ശ്രീലങ്കയെ നേരിടുക ഏറെ ബുദ്ധിമുട്ടായി മാറിയിരിക്കുകയാണ്.
നിലവിലെ റിപ്പോര്ട്ട് പ്രകാരം പൃഥ്വി ഷാ, സൂര്യകുമാര് യാദവ്, ഇഷാന് കിഷന്, ഹാര്ദിക് പാണ്ഡ്യ തുടങ്ങിയ താരങ്ങളെല്ലാം ഐസൊലേഷനിലാണ്. നായകന് ശിഖര് ധവാനും ഐസൊലേഷനിലാണെന്നും വാര്ത്തകള് പുറത്തു വരുന്നുണ്ട്. ഈ സാഹചര്യത്തില് ഇന്ത്യയെ നയിക്കാനുള്ള ഉത്തരവാദിത്തം ഭുവനേശ്വര് കുമാറിനായിരിക്കും വന്നു ചേരുക. ഇതോടെ ദേവ്ദത്ത് പടിക്കല്, ഋതുരാജ് ഗെയ്ഗ്വാദ് എന്നിവരുടെ അരങ്ങേറ്റത്തിനും ഇന്നത്തെ മത്സരം സാക്ഷ്യം വഹിക്കുമെന്നും റിപ്പോര്ട്ടുകളുണ്ട്. ഔദ്യോഗിക സ്ഥിരീകരണങ്ങള്ക്കായി കാത്തിരിക്കുകയാണ് ആരാധകര്.
Continue with Google