160 കോടി രൂപ പിഴയടയ്ക്കണം, ഇല്ലെങ്കില്‍..; ബിസിസിഐയ്ക്ക് ഐസിസിയുടെ മുന്നറിയിപ്പ്

മുംബൈ: ബിസിസിഐയ്ക്ക് 160 കോടി രൂപ പിഴയിട്ട് ഐസിസി. 2016-ലെ ടി20 ലോകകപ്പിന് ഇന്ത്യ വേദിയായപ്പോള്‍ നികുതിയിനത്തില്‍ ഐസിസിക്കു വന്ന നഷ്ടം നികത്താനാണ് വമ്പന്‍ തുക പിഴ ചുമത്തിയിക്കുന്നത്. ലോകകപ്പ് നടത്തിപ്പുമായി ബന്ധപ്പെട്ട് ഇന്ത്യ നികുതി ഇളവു ചെയ്തിരുന്നില്ല. മറ്റൊരു രാജ്യത്തായിരുന്നെങ്കില്‍ ഇതായിരിക്കില്ല സ്ഥിതിയെന്നാണ് ഐസിസിയുടെ വാദം.

ഐപിഎല്‍: ലേലത്തില്‍ വച്ചത് 'ചുളുവില'യ്ക്ക്... വിറ്റത് കോടികള്‍ക്ക്!! തലവര മാറിയ താരങ്ങള്‍

ഡിസംബര്‍ 31-ന് ഉള്ളില്‍ പിഴ അടയ്ക്കണമെന്ന് മുന്‍ ബി.സി.സി.ഐ പ്രസിഡന്റ് ശശാങ്ക് മനോഹര്‍ തലവനായ ഐസിസി നിര്‍ദ്ദേശിച്ചു. പിഴയടയ്ക്കാന്‍ വീഴ്ച്ച വരുത്തിയാല്‍ 2021-ലെ ചാമ്പ്യന്‍സ് ട്രോഫി വേദിയും, 2023-ലെ ഏകദിന ലോകകപ്പ് വേദിയും ഇന്ത്യയില്‍ നിന്നു മാറ്റുമെന്നും അംഗരാജ്യങ്ങള്‍ക്ക് നല്‍കിവരുന്ന വാര്‍ഷിക ലാഭവിഹിതത്തില്‍ നിന്ന് തുക ഈടാക്കുമെന്നും ഐസിസി അറിയിച്ചിട്ടുണ്ട്.

നേരത്തെ, കേന്ദ്ര സര്‍ക്കാര്‍ 2016-ലെ ട്വന്റി 20 ലോകകപ്പിന് നികുതി ഇളവ് നല്‍കിയിരുന്നില്ല. കൂടാതെ, മത്സരം സംപ്രേക്ഷണം ചെയ്ത ബ്രോഡ്കാസ്റ്ററായ സ്റ്റാര്‍ ടിവി നികുതി തുക ഒഴിവാക്കിയാണ് ഐ.സി.സിക്ക് പണം നല്‍കിയതും. ഇതിലൂടെയുണ്ടായ നഷ്ടം തിരിച്ചുപിടിക്കണമെന്ന നിര്‍ദ്ദേശം ഉയര്‍ന്നതോടെയാണ് ബിസിസിഐയ്ക്ക് കര്‍ശന താക്കീത് നല്‍കിയിരിക്കുന്നത്.